Ezekiel 46

Tswana (BAEBELE e e Boitshepo) 1992

← Chapter 45 Jump to: Chapter 47 →

1“Morena Modimo o bua jaana a, re: Kgoro ya lolwapa lwa ka fa teng, e e lebileng ntlheng ya botlhabatsatsi, a e tswalwe ka malatsi a marataro a tiro; mme e re ka letsatsi la sabata e bulwe, le ka letsatsi la go rogwa ga kgwedi a e bulwe.

2A kgosana e tsene ka tsela ya maribela a kgoro ya ka fa ntle; mme e eme fa mophakwaneng wa kgoro, mme baperesiti ba baakanye tshupelelo ya yone ya boleo, le ditshupelo tsa yone tsa kagiso, mme a e obame fa serepuding sa kgoro; foo e tlaa tswela kwa ntle, mme go se tswalwe kgoro go tsamaya go nna maitsebowa.

3A batho ba lefatshe ba obamele fa mojakong wa kgoro eo fa pele ga Jehofa ka bosabata le ka metlha ya go rogwa ga dikgwedi.

4“Tshupelo e e fisiwang, e kgosana e tlaa e isetsang Jehofa ka letsatsi la sabata, e nne dikwanyana di le thataro tse di se nang bogole le phelefu e e se nang bogole.

5Le tshupelo ya boupe e nne emere ya phelefu, mme tshupelo ya boupe ya dikwanyana e nne ka fa motho o nonofileng go ntsha ka teng, le sego sa lookwane sa emere nngwe le nngwe.

6Ka letsatsi la go rogwa ga kgwedi tshupelo e nne kgongwana e e se nang bogole; le dikwanyana di le thataro, le phelefu; e nne tse di se nang bogole.

7A e baakanye tshupelo ya boupe, kgomo emere, le phelefu emere, le dikwanyana ka fa motho o nonofileng ka teng, le selekanyo sa emere se ntshediwe sego sa lookwane.

8E re kgosana e tsena, a e tsene ka tsela ya maribela a kgoro, e be e tswe ka yone.

9“E tlaa re fa batho ba lefatshe ba tla fa pele ga Jehofa mo medirong e e laotsweng, yo o tsenang ka kgoro ya botsheka a ya go obama, a tswe ka kgoro ya borwa; mme yo o tsenang ka kgoro ya borwa a a tswe ka kgoro ya botsheka; a se ka a boa ka kgoro e o tsenyeng ka yone, mme o tlaa tswa fela a siametse pele fela.

10E tlaa re ba tsena, kgosana e tsene, e le mo gare ga bone; le fa ba tswa ba tswe ba le mmogo.

11Mo medirong, le mo medirong e e masisi, tshupelo ya boupe e le kgomo e ntshediwe emere, le phelefu emere, le ga dikwanyana ka fa motho o nonofileng go ntsha ka teng, le emere e ntshediwe sego sa lookwane.

12“E tlaa re fa kgosana e baakanya tshupelo ya pelo fela, e le tshupelo e e fisiwang, kgotsa ditshupelo tsa kagiso e le tshupelo ya pelo fela e e direlwang Jehofa, mongwe a e bulele kgoro e e lebileng kwa botlhabatsatsi, mme e baakanye tshupelo ya yone e e fisiwang, le ditshupelo tsa yone tsa kagiso, jaaka e tle e dire ka letsatsi la sabata; foo a e tswe; mme e tlaa re e sena go tswa a mongwe a tswale kgoro.

13“O baakanyetse Jehofa kwanyana ya ngwaga wa ntlha e e se nang bogole, e le tshupelo e e fisiwang ya malatsi otlhe; o e baakanye ka moso le moso.

14O baakanye tshupelo ya boupe nayo ka moso le moso, e bong kgaogano ya serataro ya emere, le kgaogano ya seraro ya sego ya lookwane, go kolobetsa setou; e le tshupelo ya boupe ya ga Jehofa ya metlha yotlhe ka tao e e sa khutleng.

15A ba baakanye kwanyana jaana, le tshupelo ya boupe, le lookwane, ka moso le moso, e le tshupelo e e fisiwang ya metlha yotlhe.”

16Morena Modimo o bua jaana, a re: “Fa kgosana e naya bomorwa yone bangwe neo, ke boswa jwa gagwe, a e nne jwa bomorwawe; ke boswa jwa bone go bo rua.

17Fa e naya mongwe wa batlhanka ba yone neo, sengwe sa boswa jwa yone, e tlaa nna ya gagwe go ya go fitlha mo ngwageng wa kgololego; foo a e boele mo kgosaneng; mme ka ga boswa jwa yone, e tlaa nna jwa bomorwa yone fela.

18Gape kgosana e se ka ya tsaya ga thuo ya batho, go ba kgarametsa mo bosweng jwa bone; a e neye bomorwaa yone go rua jo e leng boswa jwa yone, gore batho ba me ba se ka ba falalediwa mongwe le mongwe boswa jwa gagwe.”

19Foo a nkisa ka botseno jo bo ka fa lotlhakoreng ga kgoro, mo matlwaneng a a boitshepo a baperesiti, a a lebileng ntlheng ya botsheka; mme bonang, go ne go le felo gongwe ka kwa morago ntlheng ya bophirimatsatsi.

20Mme a nthaya a re: “Felo fa ke gone fa baperesiti ba tlaa apeelang teng tshupelelo ya molato, le tshupelelo ya boleo, fa ba tlaa besang teng tshupelo ya boupe; gore ba se ka ba di ntshetsa kwa lolwapeng lwa ka fa ntle, ba ya go itshepisa batho teng.”

21Foo a nkisa kwa lolwapeng lwa ka fa ntle, a ntsamaisa ka fa dikgokgotšhong tsoo nne tsa lolwapa, mme bonang, mo kgokgotšhong nngwe le nngwe ya lolwapa go ne go le lolwapana.

22Mo dikgokgotšhong tsoo nne tsa lolwapa go ne go le malwapana a a ageletsweng, a le boleele jwa mabogo a le 40, le boatlhamo bo le mabogo a le 30; tse nne tseo mo dikgokgotšhong di ne di le selekanyo se le sengwe fela.

23Go no go le dikago tse di tlhomaganyeng mo tikologong mo go yone, mo tikologong ya one oo mane, go dirilwe go na le mafelo a a apeelang fa tlase ga matshwaragano mo tikologong.

24Foo a nthaya a re: “A, ke one matlo a a apeelang, kwa badiredi ba ntlo ba tlaa apeelang setlhabelo sa batho teng.”

← Chapter 45 Jump to: Chapter 47 →