Ezekiel 33

Tswana (BAEBELE e e Boitshepo) 1992

← Chapter 32 Jump to: Chapter 34 →

1Lefoko la ga Jehofa la tla mo go nna, la re:

2“Morwa motho, bua le bana ba batho ba gaeno, o ba reye o re: Mogang ke lereng tšhaka mo lefatsheng lengwe, fa batho ba lefatshe leo ba tsaya motho mo go bone, ba mmaya molebedi wa bone;

3fa e tlaa re a bona tšhaka e tla mo lefatsheng, mme a letsa lonaka, a tlhagisa batho;

4foo le fa e le mang yo o utlwang tumo ya lonaka, mme a se ka a tlhagisega, fa tšhaka e tlaa e mo tlosa, madi a gagwe a tlaa nna mo tlhogong ya gagwe.

5O utlwile tumo ya lonaka, mme a se ka a tlhagisega, madi a gagwe a tlaa nna mo go ene: le mororo fa a ka bo a ne a tlhagisega o ka bo a golotse mowa wa gagwe.

6Mme fa molebedi a bona tšhaka e tla, mme a sa letse lonaka, mme batho ba sa tlhagisiwe, mme tšhaka e tla, e tlosa motho mongwe mo go bone; o tlosiwa mo boikepong jwa gagwe, mme madi a gagwe ke tlaa a batla mo seatleng sa molebedi.

7“Jalo fela, wena morwa motho, ke go beile molebedi wa ba ntlo ya Iseraele; mme ke gone utlwa lefoko mo molomong wa me, mme o ba neye tlhagiso e e tswang mo go nna.

8Ya re fa ke raya moikepi, ke re: ‘Wena moikepi, ruri o tlaa swa!’ Mme o sa bue go tlhagisa moikepi gore a tswe tseleng ya gagwe; moikepi yoo o tlaa swela mo boikepong jwa gagwe, mme madi a gagwe ke tlaa a lopa mo seatleng sa gago.

9Le fa go ntse jalo fa o tlhagisa moikepi ka ga tsela ya gagwe go mo sokolola mo go yone, mme a sa sokologe mo tseleng ya gagwe; o tlaa swela mo boikepong jwa gagwe, mme wena o bo o golotse mowa wa gago.

10“Le wena, morwa motho, raya ba ntlo ya Iseraele, o re: Lo tle lo bue jaana, lo re: ‘Ditlolo tsa rona le maleo a rona a mo go rona, re tlhorega fela mo go tsone; mme re bo re ka tshela jang?’

11Ba reye o re: Jaaka ke tshedile, go bua Morena Modimo, ga ke na kgatlhego epe mo losong lwa moikepi; fa e se go re moikepi a sokologe mo tseleng ya gagwe, mme a tshele. Sokologang, sokologang mo ditseleng tsa lona tse di bosula; gonne lo ratelang go swa, lona ba ntlo ya Iseraele?

12“Le wena, morwa motho, raya bana ba batho ba gaeno, o re: ‘Tshiamo ya mosiami ga e ketla e mo golola mo motlheng wa tlolo ya gagwe; mme ka ga boikepo jwa moikepi ga a ketla a wa ka jone mo motlheng o o sokologang ka one mo boikepong jwa gagwe. Le ene yo o siameng ga a ketla a nonofa go tshela ka gone, mo motlheng o o leofang ka one.’

13Ya re fa ke raya mosiami ke re: ‘Ruri o tlaa tshela;’ fa a ikanya tshiamo ya gagwe, mme a dira boikepo, ga go ketla go gakologelwa ditiro dipe tsa gagwe tsa tshiamo; mme mo boikepong jo o bo dirileng o tlaa swela mo go jone.

14Gape, ya re fa ke raya moikepi ke re: ‘Ruri o tlaa swa;’ fa a sokologa mo boleong jwa gagwe, mme a dira se se laotsweng le se se siameng;

15fa moikepi a rebola peelo, a busa se o ne a se tsere ka bogodu, a sepela mo ditaong tsa botshelo, a sa dire boikepo bope; ruri o tlaa tshela, ga a ketla a swa.

16Ga go ketla go gakologelwa maleo ape a gagwe a o a dirileng go mo sekisa; o dirile se se laotsweng le se se siameng; ruri o tlaa tshela.

17“Le fa go ntse jalo bana ba batho ba gaeno ba tle ba re: ‘Tsela ya ga Jehofa ga e lekalekane;’ mme ka ga bone, tsela ya bone ga e a lekalekana.

18Mogang mosiami o sokologang mo tshiamong ya gagwe, mme a dira boikepo, o tlaa swela fela mo go jone.

19Mogang moikepi o sokologang mo boikepong jwa gagwe, mme a dira se se laotsweng le se se siameng, o tlaa tshela ka gone.

20Le fa go ntse jalo lo a tle lo re: ‘Tsela ya ga Jehofa ga e lekalekane.’ Lona ba ntlo ya Iseraele, ke tlaa atlhola mongwe le mongwe wa lona ka fa mekgweng ya gagwe.”

21Ga dirala ya re ka ngwaga wa 12 wa botshwaro jwa rona, ka kgwedi ya lesome, ka letsatsi la botlhano la kgwedi, mongwe yo o falotseng kwa Jerusalema a tla kwa go nna, a re: “Motse o kgemethilwe.”

22Jaana seatla sa ga Jehofa sa bo se letse se le mo go nna go le maitsebowa, yo o falotseng a ise a goroge; mme o ne a ntumolotse molomo, ga tsamaya a tla mo mosong; mme molomo wa me o ne o tumolotswe, mme ka bo ke sa tlhole ke le semumu.

23Lefoko la ga Jehofa la tla mo go nna, la re:

24“Morwa motho, ba ba ntseng mo mafelong ale a a kgakgabetseng mo lefatsheng la Iseraele, ba a bua, ba re: ‘Aberahame o ne a le mongwe fela, mme a rua lefatshe; mme rona re bantsi; lefatshe le neilwe rona go nna boswa.’

25“Ke gone o ba reye o re: Morena Modimo o bua jaana, a re: Lo ja selo le madi a sone, lo tsholeletsa medimo ya disetwa ya lona matlho, lo tsholola madi a batho; a lo ka rua lefatshe?

26Lo ema mo tšhakeng ya lona, lo dira tse di makgapha, monwe le mongwe o senya mosadi wa mongwe ka ene; mme a lona lo ka rua lefatshe?

27“O tlaa ba raya jaana, o re: Morena Modimo o bua jaana, a re: Jaaka ke tshedile, ruri ba ba kwa mafelong a a kgakgabetseng ba tlaa wa ka tšhaka, le ene yo o mo nageng e e lobala fela ke tlaa mo neela dibatana di mo ja, le ba ba mo dikagong tse di thata tsa phemelo le mo dikgageng, ba tlaa swa ka kgogodi.

28Ke tlaa dira lefatshe tshwafalo le kgakgamatso, pelafalo ya thata ya lone e tlaa khutla; dithaba tsa Iseraele di tlaa swafala, go ba go se ketla go feta ope ka teng.

29Foo ba tlaa itse fa ke le Jehofa, ke sena go dira lefatshe tshwafalo le kgakgamatso, ka ntlha ya tse di makgapha tsotlhe tsa bone tse ba di dirileng.

30“Ka ga gago, morwa motho, bana ba ba gaeno ba bua ka ga gago fa dithakong le mo mejakong ya mantlo, mme ba raane, mongwe le mongwe a reye wa ga gabo, a re: Ntlong, ke a lo rapela, lo utlwe, go re lefoko la ga Jehofa la reng.

31Ba tle mo go wena, jaaka batho ba tle ba tle, ba dule fa pele ga gago jaaka e ka bo e le batho ba me, ba utlwe mafoko a gago, mme ba se ke ba a dirafatse; gonne ka molomo ba bua lorato lo logolo, mme pelo ya bone e ye le papadi ya bone fela.

32Bona, o ntse mo go bone jaaka pina e e monate ya mongwe yo o nang le lentswe le le kgatlhang, mme a itse go letsa seletso sentle, gonne ba utlwa mafoko a gago, mme ga ba a dire.

33Mogang golo mo go dirafalang, bona, go etla, foo ba tlaa itse fa moperofeti mongwe a kile a ne a le mo go bone.”

← Chapter 32 Jump to: Chapter 34 →