Ezekiel 32

Tswana (BAEBELE e e Boitshepo) 1992

← Chapter 31 Jump to: Chapter 33 →

1Ga dirala ya re ka ngwaga wa 12, ka kgwedi ya 12, ka tsatsi la ntlha la kgwedi, lefoko la ga Jehofa la tla mo go nna, la re:

2“Morwa motho, tlhabeleletsa Faro kgosi ya Egepeto khutsafalelo, o mo reye o re: “O kile wa tshwantshiwa le ledumedi la merafe; le fa go ntse jalo o ntse jaaka kgogela mo mawatleng, mme wa photsega mo dinokeng tsa gago, wa kgobera metsi ka maroo, wa leswefatsa dinoka tsa bone.

3Morena Modimo o bua jaana, a re: Ke tlaa go tsharololela lotloa lwa me ka lesomo le ditšhaba di le dintsi, ba tlaa go ntshetsa kwa ntle ka lotloa lwa me.

4Ke tlaa go tlogela mo lefatsheng, ke go latlhela mo nageng e e lobala fela, ke tlaa rereanyetsa dinonyane tsotlhe tsa loapi mo go wena, ke tlaa kgorisa dibatana tsa lefatshe lotlhe ka wena.

5Ke tlaa baya nama ya gago mo dithabeng, ke tlaa tlatsa megogoro ka bogodimo jwa gago.

6Le lefatshe le o sapang mo go lone ke tlaa le nosa madi a gago, go ya fela kwa dithabeng; mme o tlaa tlala ka meedi ya metsi.

7E tlaa re ke go tima, ke tlaa khurumetsa legodimo, ke tlaa fifatsa dinaledi tsa lona; ke tlaa khurumetsa letsatsi ka leru, le kgwedi ga e ketla e ntsha lesedi la yone.

8Masedi otlhe a legodimo a a betlameng ke tlaa a fifatsa mo godimo ga gago, mme ke tlaa baya lefifi mo fatsheng la gaeno, go bua Morena Modimo.

9“Ke bile ke tlaa gakatsa dipelo tsa ditšhaba di le dintsi, mogang ke tlisang tshenyego ya gago mo merafeng, mo mafatsheng a o se kang wa a itse.

10Ee, ke tlaa gakgamatsa ditšhaba di le dintsi ka wena, dikgosi tsa tsone di tlaa boifa ka mo go tsitlisang marapo ka ga gago, mogang ke kgatikanyang tšhaka ya me fa pele ga tsone; di tlaa nna di roroma tsotlhe ka thata, nngwe le nngwe e roromela botshelo jwa yone tota, mo motlheng wa go wa ga gago.”

11Gonne Morena Modimo o bua jaana, a re: “Tšhaka ya kgosi ya Babilone e tlaa tla mo go wena.

12Ke tlaa usa bontsi jwa gago ka ditšhaka tsa bathata; botlhe ke ba ba boitshegang ba merafe; ba tlaa thopa pelafalo ya Egepeto, mme bontsi jotlhe jwa bone bo tlaa senngwa.

13Ke bile ke tlaa senya le dikgomo tsotlhe tsa teng di nyelele fa metsing a magolo; mme lonao lwa motho ga lo ketla lo tlhola lo a kgobera, le ditlhako tsa dikgomo ga di ketla di a kgobera.

14Foo ke tlaa ikgatisa metsi a bone, ke tlaa eledisa dinoka tsa bone jaaka lookwane, go bua Morena Modimo.

15E tlaa re mogang ke swafatsang ke kgakgabatsa lefatshe la Egepeto, e nne lefatshe le le tlhokang sone se se neng se tletse mo go lone, mogang o ke itayang botlhe ba ba agileng teng, foo ba tlaa itse fa ke le Jehofa.

16E ke khutsafalo e ba tlaa hutsafalang ka yone; bomorwadia merafe ba tlaa hutsafala ka yone; ba tlaa hutsafalela Egepeto le bontsi yotlhe jwa gagwe ka yone.” Go bua Morena Modimo.

17Le gone ga dirala ya re ka ngwaga wa 12, ka letsatsi la 15 la kgwedi, lefoko la ga Jehofa la tla mo go nna, la re:

18“Morwa motho, tlhabeleletsa bontsi jwa Egepeto kuruetso, o ba digele mo mafelong a a tlasetlase a lefatshe, e bong ene Egepeto le bomorwadia merafe e e tumileng, ba ye le ba ba fologelang mo moleteng.

19“ ‘Ana o gaisa mang ka bontle? Fologa, o ye go namaladiwa le ba ba sa rupang.’

20“Ba tlaa wela mo gare ga ba ba bolailweng ka tšhaka; o neeletswe tšhaka; mo tlosetseng koo le bontsintsi jotlhe jwa gagwe.

21Yo o thata mo banonofing o tlaa bua nae a le mo gare ga Bobipo a na le ba ba mo thusang; ba fologile, ba namaletse fela, e bong ba ba sa rupang, ba bolailwe ka tšhaka.

22“Ašure o teng le lesomo lotlhe la gagwe; diphupu tsa gagwe di mo tikologong ya gagwe; botlhe e le ba ba bolailweng, ba ole ka tšhaka:

23Ba diphupu tsa bone di beilweng kwa meseong e e kwa tengteng ga molete, mme lesomo la gagwe le mo tikologong ya phupu ya gagwe; botlhe e le ba ba bolailweng, ba ole ka tšhaka, e le ba ba kileng ba ne ba tsosa theregiso mo fatsheng la batshedi.

24“Elame o teng le bontsi jotlhe jwa gagwe tikologong ya phupu ya gagwe; botlhe ke ba ba bolailweng, ba ole ka tšhaka, ba ba fologetseng kwa mafelong a a kwa tlasetlase a lefatshe ba sa rupa, ba ba kileng ba tsosa theregiso ya bone mo lefatsheng la batshedi, mme ba belege botlhabisa ditlhong jwa bone le ba ba fologelang mo moleteng.

25Ba mo aletse bolao mo gare ga babolaiwi, a na le bontsi jwa gagwe; diphupu tsa gagwe di mo tikologong ya gagwe; botlhe e le ba ba sa rupang, ba bolailwe ka tšhaka; gonne theregiso ya bone e kile ya tsosiwa mo lefatsheng la batshedi; mme ba belege botlhabisa ditlhong jwa bone le ba ba fologelang mo moleteng.

26“Mešeke o teng le Tubale, le bontsi jotlhe jwa gagwe; diphupu tsa gagwe di mo tikologong ya gagwe: botlhe e le ba ba sa rupang, ba bolailwe ka tšhaka; gonne ba ne ba tsosa theregiso ya bone mo lefatsheng la batshedi.

27Ga ba ketla ba robala le bathata ba ba oleng ba sa rupa, ba ba fologetseng mo Bobipong, ba na le dibolao tsa bone tsa ntwa, ba samile ditšhaka tsa bone, le maikepo a bone a mo marapong a bone; gonne ba ne ba le theregiso ya bathata mo lefatsheng la batshedi.

28“Wena o tlaa thubelwa mo gare ga ba ba sa rupang, o tlaa namalala le ba ba bolailweng ka tšhaka.

29“Etome o teng, dikgosi tsa gagwe le dikgosana tsotlhe tsa gagwe, ba namaladitswe e le diganka le ba ba bolailweng ka tshaka; ba tlaa namalala le ba ba sa rupang, ba na le ba ba fologelang mo moleteng.

30“Dikgosana tsa kwa botsheka di teng, tsotlhe fela, le Basitone botlhe, ba ba fologileng le babolaiwi; ba tlhabisiwa ditlhong ke theregiso e ba kileng ba e tsosa ka nonofo ya bone; ba namaletse ba sa rupa, ba na le ba ba bolailweng ka tšhaka, ba belege botlhabisa ditlhong jwa bone le ba ba fologelang mo moleteng.

31“Faro o tlaa ba bona, mme o tlaa gomotsega ka ga bontsi jotlhe jwa gagwe, e bong Faro le mephato yotlhe ya gagwe, ba ba bolailweng ka tšhaka, go bua Morena Modimo.

32“Gonne ke tsentse theregiso ya gagwe mo lefatsheng la batshedi; o tlaa namaladiwa mo gare ga ba ba sa rupang, le ba ba bolailweng ka tšhaka, e bong Faro le bontsi jotlhe jwa gagwe.” Go bua Morena Modimo.

← Chapter 31 Jump to: Chapter 33 →