Ezekiel 17

Tswana (BAEBELE e e Boitshepo) 1992

← Chapter 16 Jump to: Chapter 18 →

1Lefoko la ga Jehofa la tla mo go nna, la re:

2“Morwa motho, ntsha nyoba, o bue setshwantsho le ba ntlo ya Iseraele;

3o re: Morena Modimo o bua jaana, a re: Ntswi yo motona thata yo o diphuka dikgolo le dintlha tse ditelele, a tletse diphafa tse di matsabatsaba, a tla mo Lebanone, a tsaya kala e e kwa godimo ya mosetare;

4a kgaola e e leng yone kalana ya one e e kwa godimodimo, mme a e isa kwa lefatsheng lengwe la thekalano; a e tlhoma mo motseng mongwe wa barekisi.

5A ba a tsaya le peo ya lefatshe, a e jala mo mmung o o ungwisang; a e baya fa metsing a magolo; a e tlhoma jaaka modibonoka.

6Mme ya mela, ya nna mofine o o anamang, o mokhutshwane, o dikala tsa one di menogelang kwa go ene, mme metswe ya one e ne e le tlase ga gagwe; mme ya nna mofine, wa ntsha dikala, wa tlhogisa dikalana.

7“Ga bo go bile go le ntswi yo mongwe yo motona, yo o diphuka ditona le diphafa di le dintsi; mme bonang, mofine oo wa konegela metswe kwa go ene, o le fa o tlhomilweng teng, gore a tle a o nose.

8O ne o tlhomilwe mo mmung o o molemo, fa metsing a magolo, gore o ntshe dikala, le gore o ungwe, gore o tle o nne mofine o montle.

9“Bua, o re: Morena Modimo o bua jaana, a re: A o tlaa segofala? A ga a ketla a khumola metswe ya one, a ba a kgaola loungo lwa one gore o tle o swabe; gore makakaba otlhe a one a e leng gone a tlhogang a swabe; e seng ka thata e kgolo le fa e le ka batho ba le bantsi ba ba ka bong ba o khumola ka metswe?

10Ee, bonang, a o tlaa segofala ka go bo o tlhomilwe? A ga o ketla o swabela ruri, mogang phefo ya botlhabatsatsi e o amang? O tlaa swabela fa o ne o medile teng.”

11Gape lefoko la ga Jehofa la tla mo go nna, la re:

12“A ko o reye ba lekgotla le le borukhutlhi, o re: A ga lo itse se dilo tse di se kayang? O ba reye o re: Bonang, kgosi ya Babilone e ne e tsile mo Jerusalema, ya tshwara kgosi ya teng, le dikgosana tsa teng, ya ba isa kwa ga yone kwa Babilone.

13Ya tsaya wa losika lwa segosi, ya dira kgolagano nae; ya ba ya mo ikanisa, mme ya tlosa bathata ba lefatshe;

14gore bogosi bo nyatsege, gore bo se ka jwa itsholetsa, mme le fa go ntse jalo e le gore bo tlhomame ka go tshegetsa kgolagano ya yone.

15A mo tsuololela ka go roma barongwi ba gagwe kwa Egepeto, gore ba ye go mo naya dipitse le batho ba le bantsi. A o tlaa segofala? A yo o dirang dilo tse di ntseng jalo o tlaa falola? A o ka senya kgolagano, mme a ba a falola?

16“Jaaka ke tshedile, go bua Morena Modimo, ruri mo felong kwa kgosi e agileng teng e e mo dirileng kgosi, e ikano ya yone o e nyaditseng, le e kgolagano ya yone o e sentseng, o tlaa swela kwa go yone mo gare ga Babilone.

17Le gone Faro le ntwa ya gagwe e kgolo le lesomo la gagwe le legolo, ga a ketla a mo tshologela mo ntweng, mogang ba tsosang dithota ba aga dikago tsa tlhabanelo, go tla ba kgaola batho ba le bantsi.

18Gonne o nyaditse ikano ka go senya kgolagano; mme, bonang, o ne a ntshitse seatla, le fa go ntse jalo o dirile dilo tsotlhe tse; ga a ketla a falola.”

19Ke gone Morena Modimo o bua jaana, a re: “Jaaka ke tshedile, ruri ikano ya me e o e nyaditseng, le kgolagano ya me e o e sentseng, ke tlaa go lere fela mo tlhogong ya gagwe.

20Ke tlaa mo tsharololela lotloa lwa me, o tlaa tshwarwa ka seru sa me, mme ke tlaa mo isa kwa Babilone, ke tlaa sekisana nae teng ka ga tlolo e o ntloletseng ka yone.

21Batshabi botlhe ba gagwe mo masomong otlhe a gagwe ba tlaa wa ka tšhaka, ba ba salang ba tlaa gasamesegela kwa diphefong tsotlhe, mme lo tlaa itse fa nna Jehofa ke go buile.”

22Morena Modimo o bua jaana, a re: “Le gone ke tlaa tsaya kala e e godimodimo ya mosetare, ke tlaa e tlhoma; mo dikalaneng tse dintšha tsa kwa godimodimo ke tlaa kgaola e nana, ke e tlhoma mo thabeng e e godileng, e e bonalesegang.

23Ke tlaa e tlhoma mo thabeng ya bogodimo jwa Iseraele; mme e tlaa ntsha dikala, e ungwa loungo, e nna mosetare o montle; mme dinonyane tsotlhe tsa diphuka tsotlhe di tlaa aga tlase ga one; di tlaa aga mo moriting wa dikala tsa one.

24Ditlhare tsotlhe tsa naga di tlaa itse fa nna Jehofa ke folositse setlhare se se godileng, ka goletsa setlhare se se kokobetseng, ke omeleditse setlhare se setala, ka kgabisa setlhare se se omeletseng; nna Jehofa ke buile, ke bile ke dirile.”

← Chapter 16 Jump to: Chapter 18 →