Ezekiel 14

Tswana (BAEBELE e e Boitshepo) 1992

← Chapter 13 Jump to: Chapter 15 →

1Foo ga tla bagolwane bangwe ba Iseraele kwa go nna, mme ba dula fa pele ga me.

2Mme lefoko la ga Jehofa la tla mo go nna, la re:

3“Morwa motho, batho bao ba tshotse medimo ya bone ya disetwa ka pelo, ba beile sekgopiso sa boikepo jwa bone fa pele ga difatlhogo tsa bone. A ke tshwanetse go bodiwa ke bone ka gongwe?

4“Ke gone bua le bone, o ba reye o re, Morena Modimo o bua jaana, a re: Motho mongwe le mongwe wa ntlo ya Iseraele yo o tsholang medimo ya gagwe ya disetwa ka pelo, mme a baya sekgopiso sa boikepo jwa gagwe fa pele ga sefatlhogo sa gagwe, mme a tla mo moperofeting; nna Jehofa ke tlaa mo fetola mo go gone ka fa bontsing jwa medimo ya gagwe ya disetwa,

5gore ke tshware ba ntlo ya Iseraele mo dipelong tsa bone ka tsosi, ka ba itirile baeng mo go nna ka medimo ya bone ya disetwa.

6“Ke gone raya ba ntlo ya Iseraele, o re: Morena Modimo o bua jaana a re: Boang, mme lo itshokolole mo medimong ya lona ya disetwa, lo fularele dilo tsa lona tsotlhe tse di makgapha.

7“Gonne mongwe le mongwe wa ntlo ya Iseraele, le fa e le wa baeng ba ba jakileng mo Iseraele, yo o ikgaoganyang le nna, mme a tshola medimo ya gagwe ya disetwa ka pelo, a baya sekgopiso sa boikepo jwa gagwe fa pele ga sefatlhogo sa gagwe, mme a tla moperofeting, a tla go ipoletsa mo go nna; nna ka nosi ke le Jehofa ke tlaa mo fetola:

8Ke tlaa lebisa sefatlhogo sa me go tlhabana le motho yoo, ke tlaa mo dira segakgamatso, gore a tle a nne sekao le seane, ke tlaa mo kgaola mo gare ga batho ba me; mme lo tlaa itse fa ke la Jehofa.

9“Fa moperofeti a tsietsegile, mme a bua lefoko lengwe, nna Jehofa ke tlaa bo ke tsieditse moperofeti yoo, mme ke tlaa mo otlololela seatla, ke mo senya a tloga mo gare ga batho ba me ba Iseraele.

10Mme ba tlaa belega petso ya boikepo jwa bone; boikepo jwa moperofeti bo tlaa nna fela jaaka boikepo jwa yo o botsang mo go ene;

11gore ba ntlo ya Iseraele ba se ka ba tlhola ba tloga mo go nna ba timela, le fa e le go tlhola ba itshekolola ka ditlolo tsotlhe tsa bone; fa e se gore ba nne batho ba me, le nna ke nne Modimo wa bone.” Go bua Morena Modimo.

12Lefoko la ga Jehofa la tla mo go nna, la re:

13“Morwa motho, mogang lefatshe lengwe le nteofelang ka go dira tlolo nngwe, mme ke le otlololela seatla, ke roba seikokotlelo sa dijo tsa lone, ke le tsosetsa popamo, ke kgaola mo go lone motho le kgomo;

14le fa banna ba bararo ba, ba ka bo ba le mo go lone, e bong Noa, le Daniele, le Jobe, ba ne ba tlaa bo ba ikgolola mewa ya bone bosi fela, ka tshiamo ya bone.” Go bua Morena Modimo.

15“Fa ke ralatsa dibatana tse di bosula lefatshe, mme di le senya, le ba le swafala, go ba go retelela motho go le ralala ka ntlha ya dibatana;

16le fa banna ba bararo ba, ba ka bo ba le mo go lone, jaaka ke tshedile, go bua Morena Modimo, ba ne ba se ketla ba golola bana le fa e le ba basimane le fa e le ba basetsana; go ne go tlaa gololwa bone bosi fela, mme lefatshe le swafale fela.

17“Kgotsa fa ke lere tšhaka mo lefatsheng leo, ke re: Wena tšhaka, ralala lefatshe; ke ba ke kgaola mo go lone motho le kgomo;

18le fa banna ba bararo ba, ba ka bo ba le mo go lone, jaaka ke tshedile, go bua Morena Modimo, ba ne ba se ketla ba golola bana le fa e le ba basimane le fa e le ba basetsana, mme go tlaa gololwa bone fela ka bosi.

19“Kgotsa fa ke lere kgogodi mo lefatsheng leo, ke le goromeletsa tšararego ya me ka madi, go tla ke kgaola mo go lone motho le kgomo;

20le fa Noa le Daniele le Jobe, ba ka bo ba le mo go lone, jaaka ke tshedile, go bua Morena Modimo, ba tlaa bo ba se ketla ba golola ngwana le fa e le wa mosimane le fa e le wa mosetsana; ba ne ba tlaa ikgolola mewa ya bone bosi fela ka tshiamo ya bone.”

21Gonne go bua jaana Morena Modimo, a re: “Bogolo jang mogang ke lereng ditshekiso tsa me tse nne tse di botlhoko mo Jerusalema, e bong tšhaka, popamo, dibatana tse di bosula le kgogodi, go tla ke kgaola mo go one motho le kgomo?

22Le fa go ntse jalo, bonang, go tlaa tlogelwa batshedi ba ba tlaa tlosiwang, bana ba basimane le ba basetsana bonang, ba tlaa tswela kwa go lona, mme lo tlaa bona tsela ya bone le ditiro tsa bone; mme lo tlaa gomotsega ka ga bosula jo ke bo lerileng mo Jerusalema, e bong ka ga tsotlhe tse ke di lerileng mo go one.

23Ba tlaa lo gomotsa mogang lo bonang tsela ya bone le ditiro tsa bone; lo tlaa itse fa tsotlhe tse ke di dirileng mo go one ke sa di dira ka boomo.” Go bua Morena Modimo.

← Chapter 13 Jump to: Chapter 15 →