Ezekiel 3

Tswana (BAEBELE e e Boitshepo) 1992

← Chapter 2 Jump to: Chapter 4 →

1A nthaya, a re: “Morwa motho, ja se o se fitlhelang; o je momenagano o, o itse go ya o bua le ba ntlo ya Iseraele.”

2Jalo ka atlhamolosa molomo wa me, mme a njesa momenagano oo wa lokwalo.

3A nthaya, a re: “Morwa motho, jesa mpa ya gago, mme o tlatse mala a gago ka momenagano o ke o go nayang.” Foo ka o ja; mme mo ganong la me wa bo o ntse jaaka dinotshe ka monate.

4A nthaya, a re: “Morwa motho, tloga o ye kwa go ba ntlo ya Iseraele, mme o bue nabo ka mafoko a me.

5Gonne ga o a rongwa kwa tšhabeng e e loleme losele, le fa e le ba ba puo e e thata, fa e se kwa go ba ntlo ya Iseraele fela.

6E seng kwa ditšhabeng di le dintsi tse di loleme losele, tse di puo e e thata, ba mantswe a bone o sa kakeng wa a tlhaloganya. Ruri fa ke ka bo ke ne ke go roma kwa go bao, ba ka bo ba go reetsa.

7Ba ntlo ya Iseraele ga ba ketla ba go reetsa; gonne ga ba ketla ba reetsa nna; ka go bo botlhe ba ntlo ya Iseraele ba phatla e e logwadi, le pelo e e lesoko.

8Bona, ke gwaladitse sefatlhogo sa gago sa tshwana le difatlhogo tsa bone, ke gwaladitse phatla ya gago ya tshwana le diphatla tsa bone.

9Ke thatafaditse phatla ya gago ya nna jaaka lentswetshipi le le thata bogolo go lekgethu; o se ka wa boifa, o bo o se ka wa tseanngwa ke ponalo ya bone, le fa ba le ntlo e e borukhutlhi.”

10Gape a nthaya, a re: “Morwa motho, mafoko otlhe a me a ke tlaa a buang nao o a amogele ka pelo, o bo o a utlwe ka ditsebe.

11Tloga o ye kwa go bone ba botshwaro, kwa baneng ba batho ba gaeno, mme o bue nabo, o ba bolelele, o re: ‘Morena Modimo o bua jaana;’ o bue fela le fa ba utlwa, le fa ba gana.”

12Foo mowa wa ntsholetsa, mme ka utlwa fa morago ga me lentswe la tsubalalo e kgolo, le re: “A go bakwe kgalalelo ya ga Jehofa mo felong ga gagwe.”

13Mme ka utlwa mosumo wa diphuka tsa ditshedi ka di amana, le modumo wa maoto a a dikologang fa go tsone, e bong modumo wa tsubalalo e kgolo.

14Jalo mowa wa ntsholetsa, wa tsamaya ka nna; mme ka tsamaya ka bogalaka, ka mogote wa mowa wa me, mme seatla sa ga Jehofa sa bo se le mo go nna ka thata.

15Foo ka fitlha mo go ba botshwaro kwa Teleabibe, ba ba agileng fa nokeng ya Kebare, le kwa ba agileng teng; mme ka dula teng malatsi a supa ke gakgametse fela.

16Ga dirala e rile malatsi a supa a sena go feta, lefoko la ga Jehofa la tla mo go nna, la re:

17“Morwa motho, ke go beile molebedi wa ba ntlo ya Iseraele; ke gone utlwa lefoko la molomo wa me, mme o ba neye tlhagiso e e tswang mo go nna.

18Ya re fa ke raya moikepi, ke re: ‘Ruri o tlaa swa;’ mme o sa mo tlhagise, o sa bue go tlhagisa moikepi go mo faposa tseleng ya gagwe ya boikepo, go tla o boloka botshelo jwa gagwe; moikepi yoo o tlaa swela mo boikepong jwa gagwe; mme madi a gagwe ke tlaa a lopa mo seatleng sa gago.

19Le fa go ntse jalo e re fa o tlhagisa moikepi, mme a sa sokologe mo boikepong jwa gagwe, le fa e le mo tseleng ya gagwe ya boikepo, o tlaa swela mo boikepong jwa gagwe; mme wena o bo o golotse mowa wa gago.

20“Gape, ya re fa mosiami a fapoga mo tshiamong ya gagwe, a dira boikepo, mme ke baya sekgopi fa pele ga gagwe, o tlaa swa; e re ka o se ka wa mo tlhagisa, o tlaa swela mo boleong jwa gagwe, mme ditiro tsa gagwe tsa tshiamo tse o kileng a di dira ga di ketla di gakologelwa; mme madi a gagwe ke tlaa a lopa mo seatleng sa gago.

21Le fa go ntse jalo, ya re fa o tlhagisa mosiami, gore mosiami a se ka a leofa, mme a sa leofe, ruri o tlaa tshela, ka a tlhagisegile; le wena o bo o golotse mowa wa gago.”

22Seatla sa ga Jehofa se ne se le teng mo go nna; mme a nthaya, a re: “Nanoga, o tswele kwa lobaleng, mme ke tlaa bua nao teng.”

23Foo ka nanoga, ka tswela kwa lobaleng; mme bonang, kgalalelo ya ga Jehofa ya ema teng, e ntse jaaka kgalalelo e ke e bonyeng fa nokeng ya Kebare; mme ka wela ka sefatlhogo fa fatshe.

24Foo mowa wa tsena mo go nna, wa nkemisa ka dinao; wa bua le nna wa nthaya, wa re: “Ya o itswalele mo ntlong ya gago.

25Wena morwa motho, bona, ba tlaa baya dikgole mo go wena, ba tlaa go golega ka tsone, mme ga o ketla o tswela kwa go bone.

26Le loleme lwa gago ke tlaa lo ngaparisa magalapa a gago, mme o tlaa nna semumu, ga o ketla o nna mmuedi mo go bone; gonne ke ba kgotla e e borukhutlhi.

27Ke tlaa re ke bua nao, ke go tumolole molomo, mme o tlaa ba raya, o re: ‘Morena Modimo o bua jaana, a re:’ Yo o utlwang, a a utlwe; yo o ganang, a a gane; gonne ke kgotla e e borukhutlhi.

← Chapter 2 Jump to: Chapter 4 →