Ezekiel 42

Tswana (BAEBELE e e Boitshepo) 1992

← Chapter 41 Jump to: Chapter 43 →

1Foo a nkisa kwa ntle kwa lolwapeng lwa ka fa ntle, ntlheng ya botsheka; mme a nkisa mo ntlwaneng e e lebaganyeng le felo fa go lomologileng, le e e lebaganyeng le kago ntlheng ya botsheka.

2Fa pele ga boleele jwa mabogo a le lekgolo go no go le mojako wa botsheka, mme boatlhamo bo le mabogo a 50.

3Bolebagana le sebaka sa mabogo a 20 se e leng sa lolwapa lwa ka fa teng, le bolebagana le bophaphatho jwa matlapa jo e leng jwa lolwapa lwa ka fa ntle, go ne go le manno bosepelo kwa godimo bo lebaganye le bosepelo kwa godimo mo tlhatlaganong ya boraro.

4Fa pele ga matlwana go ne go le tsela e e boatlhamo bo le mabogo a le some ka fa teng, e le boleele jwa mabogo a lekgolo; mme mejako ya yone e ne e lebile ntlheng ya botsheka.

5Jaana matlwana a a kwa godimo a bo a le makhutshwane; gonne bosepelo jo bo kwa godimo bo bo ne bo kgoseditse one ao, bogolo go a a ka fa tlase le a a fa gare mo kagong.

6Gonne a ne a tlhatlaganye seraro, mme a se na maotwana a a etsang maotwana a malwapa; ke gone ka moo a a kwa godimodimo a ne a pitlaganye bogolo go a a kwa tlase le a a fa gare, go simolola fa fatshe.

7Lorako lo lo kwa ntle ka fa matlwaneng, bolebana le lolwapa lwa ka fa ntle fa pele ga matlwana, boleele jwa lone e ne e le mabogo a le 50.

8Gonne boleele jwa matlwana a a mo lolwapeng lwa ka fa ntle e ne e le mabogo a le 50; mme bonang, fa pele ga tempele ya bo e le mabogo a le lekgolo.

9Ka fa ntlheng ya botlhabatsatsi botseno bo ne bo huhumela matlwana a, jaaka fa motho a tsena a tswa lolwapeng lwa ka fa ntle.

10Mo bokimeng jwa kago ya lorako lwa lolwapa ntlheng ya botlhabatsatsi fa pele ga felo fa go lomologileng, le fa pele ga kago, go ne go le matlwana.

11Tsela e e fa pele ga yone e ne e tshwana le ponalo ya tsela ya matlwana a a ntlheng ya botsheka; ka fa boleeleng jwa tsone, le ka fa boatlhamong jwa tsone di ne di tshwana fela; mme matso otlhe a yone a ne a le ka fa meagong ya tsone, le ka fa mejakong ya yone.

12Le ka fa mejakong ya matlwana a a ntlheng ya borwa, go ne go le mojako mongwe fa tshimologong ya tsela, e bong tsela e e fa pele ga lorako fela ntlheng ya botlhabatsasi, fa motho a tsena mo go yone.

13Foo a nthaya a re: “Matlwana a a ka fa botsheka, le matlwana a a ka fa borwa, a a fa pele ga felo fa go lomologileng, ke one matlwana a a boitshepo, kwa baperesiti ba ba gaufi le Jehofa ba tlaa jelang teng dilo tse di boitshepo jo bo itshepileng; ba tlaa baya teng dilo tse di boitshepo jo bo itshepileng, le tshupelo ya boupe, le tshupelelo ya boleo, le tshupelelo ya molato; gonne felo foo go boitshepo.

14Ya re fa baperesiti ba tsena, foo ga ba ketla ba tswa mo felong ga boitshepo ba tswela kwa lolwapeng lwa ka fa ntle, mme ba tlaa baya diaparo tsa bone teng tse ba direlang ka tsone; gonne di boitshepo; mme ba tlaa apara diaparo di sele ba itse go atamela kwa go se e leng sa batho fela.”

15Jaana e rile a sena go wetsa go lekanya ntlo ya ka fa teng, a nkisa kwa ntle ka tsela ya kgoro e e lebileng kwa botlhabatsatsi, a e lekanya mo ntlheng tsotlhe.

16Ka fa ntlheng ya botlhabatsatsi a lekanya ka lotlhaka lwa selekanyo, ditlhaka di le 500, ka lotlhaka lwa selekanyo mo ntlheng tsotlhe.

17Ntlheng ya botsheka a lekanya ditlhaka di le 500, ka a lekanya ka lotlhaka lwa selekanyo mo ntlheng tsotlhe.

18Ntlheng ya borwa a lekanya ditlhaka di le 500, ka lotlhaka lwa selekanyo.

19A retologela ntlheng ya bophirimatsatsi, mme a lekanya ditlhaka di le 500 ka lotlhaka lwa selekanyo.

20A e lekanya mo ntlheng tsoo nne; e ne e na le lorako mo tikologong, boleele bo le 500, le boatlhamo bo le 500, go dira tomologano gare ga tse di boitshepo le tse e leng dilo fela.

← Chapter 41 Jump to: Chapter 43 →