Ezekiel 5

Tswana (BAEBELE e e Boitshepo) 1992

← Chapter 4 Jump to: Chapter 6 →

1“Wena, morwa motho, tsaya tšhaka e e bogale, o e tseye jaaka logare lwa mmeodi, mme o ipeole tlhogo le ditedu; foo o tseye dilekanyo tsa pego tsa go lekanya, mme o kgaoganye moriri.

2O fise kgaogano nngwe ya seraro ka molelo mo gare ga motse, malatsi a tlhaselo a sena go feta; o bo o tseye kgaogano e nngwe ya seraro, o iteye ka tšhaka tikologong ya one; kgaogano e nngwe ya seraro o e falaletse mo phefong, mme ke tlaa e somolela tšhaka ke e latela.

3O tseye meriri e le mennye mo palong, mme o di bofelele mo lokojeng lwa gago lwa diaparo.

4Gape o tseye ga yone, o e latlhele mo gare ga molelo, o e fise mo molelong; molelo o tlaa tswa teng o ya le ntlo yotlhe ya Iseraele.”

5Morena Modimo o bua jaana, a re: “Ke ene Jerusalema; ke mmeile mo gare ga merafe, mme go na le mafatshe tikologong ya gagwe.

6O tsuololetse dikatlholo tsa me, ka go dira boikepo bogolo go merafe, o tsuololetse melao ya me bogolo go mafatshe a a mo tikologong ya gagwe; gonne ba latlhile dikatlholo tsa me; le ka ga melao ya me, ga ba a ka ba sepela mo go yone.

7Ke gone ka moo Morena Modimo o bua jaana a re: Ereka lo feretlha bogolo go merafe e e mo tikologong ya lona, mme lo se ka lwa sepela mo melaong ya me, le fa e le go tshegetsa dikatlholo tsa me, le fa e le go dira ka fa ditaelong tsa merafe e e mo tikologong ya lona;”

8ke gone ka moo Morena Modimo o bua jaana, a re: “Bona, nna, e bong nna, ke tlhabana nao; ke tlaa dirafatsa ditshekiso mo gare ga gago mo ponong ya merafe.

9Ke tlaa dira mo go wena se ke iseng ke ke ke se dire, le se ke se ketlang ke tlhola ke dira se se tshwanang naso, ka ntlha ya tse di makgapha tsotlhe tsa gago.

10Ke gone borrabana ba tlaa ja bana ba bone mo gare ga gago, le bana ba tlaa ja borraabo; ke tlaa dirafatsa ditshekiso mo go wena, masalela otlhe a gago ke tlaa a gasamisetsa kwa diphefong tsotlhe fela.

11“Ke gone, jaaka ke tshedile, go bua Morena Modimo: Ruri, e re ka o itshekolotse felo ga me ga boitshepo ka dilo tsotlhe tsa gago tse di tlhoesegileng, le ka tse di makgapha tsotlhe tsa gago, le nna ke tlaa go ngotla ka ntlha ya gone; leitlho la me ga le ketla le rekegela, le gone ga nketla ke tlhomoga pelo gope.

12Ntlha nngwe ya gago ya seraro e tlaa swa ka kgogodi, le ka mmopamo ba tlaa nyelediwa mo gare ga gago; ntlha e nngwe ya seraro e tlaa wa ka tšhaka mo tikologong ya gago; mme ntlha e nngwe ya seraro ke tlaa e gasamisetsa kwa diphefong tsotlhe, mme ke tlaa ba somolela tšhaka ke ba latela.

13“Bogale jwa me bo tlaa dirafadiwa jalo, ke tlaa ikhutsisa tšararego ya me mo go bone, mme ke tlaa gomotsega: mme ba tlaa itse fa go buile nna Morena ka tlhoafalo ya me, ke sena go dirafatsa tšararego ya me mo go bone.

14Gape ke tlaa go dira tshwafalo le kgobo mo gare ga merafe e e mo tikologong ya gago, mo ponong ya botlhe ba ba fetang.

15“Jalo e tlaa bo e le kgobo, le ngongolo, le thuto, le segakgamatso mo merafeng e e mo tikologong ya gago, mogang ke dirafatsang ditshekiso mo go wena ka bogale le ka tšararego, le ka dikgalemo tse di boitshegang. Nna Jehofa ke buile.

16Mogang ke tlisang mo go bone metswi e e bosula ya mmopamo, e e tsamaelang go senya, e ke tlaa e romang e ya go lo senya; ke tlaa lo totisetsa mmopamo, ke tlaa roba seikokotlelo sa lona sa dijo.

17Ke tlaa roma mo go lona popamo le dibatana tse di bosula, mme di tlaa go thukhutha; kgogodi e tlaa go ralala le madi; mme ke tlaa lere tšhaka mo go wena. Nna Jehofa ke buile.”

← Chapter 4 Jump to: Chapter 6 →