Ezekiel 41

Tswana (BAEBELE e e Boitshepo) 1992

← Chapter 40 Jump to: Chapter 42 →

1A nkisa kwa Tempeleng, a lekanya maotwana, boatlhamo bo le jwa mabogo a le marataro ntlheng nngwe, le mabogo a le marataro ntlheng e nngwe, e le jone boatlhamo jwa motlaagana.

2Boatlhamo jwa botseno bo ne bo le mabogo a le some; ditlhakore tsa botseno di ne di le mabogo a le matlhano mo ntlheng nngwe le mabogo a le matlhano ntlheng e nngwe; mme a lekanya boleele jwa yone, mabogo a le 40, le boatlhamo mabogo a le 20.

3Foo a tsenela kwa teng, a lekanya lekotwana lengwe le lengwe la botseno, mabogo a le mabedi; le botseno, mabogo a le marataro; le boatlhamo jwa botseno mabogo a supa.

4A lekanya boleele jwa yone, mabogo a le 20, le boatlhamo mabogo a le 20, fa pele ga Tempele; mme a nthaya a re: “Fa ke felo ga boitshepo jo bo itshepileng.”

5Foo a lekanya lomota lwa ntlo, mabogo a le marataro; le boatlhamo jwa ntlwana nngwe le nngwe ya ka fa ditlhakoreng, mabogo a le mane mo tikologong yotlhe ya ntlo.

6Mantlwana a ka fa ditlhakoreng a ne a tlhatlaganye seraro, nngwe e tlhatlaganye le e nngwe, mme a na a tshwaraganye a le 30; a lomaganye le lomota lwa ntlo lo lo diretsweng matlwana a ka fa ditlhakoreng mo tikologong, gore di tle di lomagane le lona, mme di sa lomagane le lomota lo e leng lwa ntlo tota.

7Matlwana a ka fa ditlhakoreng a ne a re a dikologa ntlo a nne a atlhame bogolo fa go iwa nao kwa godimo; gonne go dikologa ntlo ga nna ga tlhatlogela kwa godimo mo tikologong ya ntlo; ke gone ka moo boatlhamo jwa ntlo jwa nna jwa golela pele go ya kwa godimo; mme go palangwe go ntse jalo, go duwa mo ntlwaneng e e kwa tlase go iwe kwa go e e kwa godimo ka ntlwana e e fa gare.

8Ka ba ka bona fa ntlo e na le serepodi se se tsholetsegileng mo tikologong; metheo ya matlwana a lotlhakore e ne e le selekanyo sa lotlhaka lo lo tletseng lwa mabogo a magolo a le marataro.

9Bokima jwa lomota lo lo diretsweng matlwana a ka fa ditlhakoreng, ka fa ntle, e ne e le mabogo a le matlhano; mo go setseng e ne e le felo ga matlwana a ka fa ditlhakoreng a e leng a ntlo.

10Fa gare ga mantlwana go ne go le sebaka se le katlhamo ya mabogo a le 20 mo tikologong yotlhe fela ya ntlo.

11Mejako ya matlwana a ka fa ditlhakoreng e ne e lebile kwa felong fa go neng go setse, mojako o le mongwe fela o lebile kwa botsheka, o mongwe o lebile kwa borwa; boatlhamo jwa sebaka sa fa go neng go setse e le mabogo a le matlhano mo tikologong.

12Kago e e neng e le fa pele ga felo fa go lomologileng ka fa lotlhakoreng lo lo lebileng kwa bophirimatsatsi e ne e le boatlhamo bo le mabogo a 70; mme lomota lwa kago lo no lo le bokima jwa mabogo a le matlhano mo tikologong, le boleele jwa lone bo ne bo le mabogo a 90.

13Jalo a lekanya ntlo, boleele bo le mabogo a le lekgolo; le felo fa go lomologileng, le kago, e na le dimota tsa yone, boleele bo le mabogo a le lekgolo;

14le gone boatlhamo jwa fa pele ga ntlo, le jwa felo fa go lomologileng mme go lebileng kwa botlhabatsatsi, bo ne bo le mabogo a le lekgolo.

15A lekanya boleele jwa kago fa pele ga felo fa go lomologileng mo go leng kwa morago ga yone, le masepelo a yone a a lebileng kwa godimo mo ntlheng nngwe le mo go e nngwe, mabogo a le lekgolo; le Tempele ya kwa teng, le maribela a lolwapa;

16direpudi, le dipone tse ditshesane, le masepelo a a godimo, mo tikologong mo go tlhatlaganyeng seraro ga one, bolebana le serepudi, tsa bo di khurumeditswe ka dimati kwa godimo, le go tswa fa fatshe go fitlha fa diponeng; mme jaana dipone di ne di khurumeditswe;

17go fitlha mo sebakeng se se okameng mojako, e bong go fitlha kwa ntlong ya kwa teng le ka fa ntle, le fa lomoteng lotlhe mo tikologong ka fa teng le ka fa ntle ka selekanyo.

18Go ne go kwalakwaditswe ditšheruba le makolane; mme go le mokolane fa gare ga tšheruba le tšheruba, mme tšheruba nngwe le nngwe e na le difatlhogo di le pedi;

19ke go re, go ne go le sefatlhogo sa motho se lebile kwa mokolaneng ntlheng nngwe; le sefatlhogo sa ledumedi se lebile kwa mokolaneng ntlheng e nngwe; go ne go dirwa jalo ka ntlo yotlhe fela.

20Go tswa fa fatshe go ya fa godimo ga mojako go ne go kwalakwaditswe ditšheruba le makolane; lomota lwa Tempele lo ne lo ntse jalo.

21Ka ga tempele, mephakwana ya mojako e ne e dirilwe dintlha di le nne tse di lekalekanyeng fela; mme ka ga felo ga boitshepo ka fa pele, ponalo ya teng e ne e tshwana le ponalo ya Tempele.

22Sebeso e ne e le sa logong, se le bogodimo jwa mabogo a le mararo, le boleele jwa sone bo le mabogo a le mabedi; le dinaka tsa sone, le boleele jwa sone, le ditlhakore tsa sone, e ne e le logong; mme a nthaya, a re: Ke lone lomati lwa bojelo lo lo fa pele ga Jehofa.

23Tempele le felo ga boitshepo di ne di na le mejako e le mabedi.

24Ditswalo di ne di na le mefama e e menaganang, mefama e le mebedi; mefama e le mebedi ya setswalo sengwe, le mefama e le mebedi ya setswalo se sengwe.

25Ga bo go kwalakwaditswe mo go tsone, e bong mo ditswalong tsa Tempele ditšheruba le makolane, ga tshwana le mo go kwalakwaditsweng mo dimoteng; mme go le mesepuri e mekima ya logong fa pele ga maribela a kgoro ka fa ntle.

26Go le dipone tse ditshesane le makolane mo ntlheng nngwe le e nngwe mo ditlhakoreng tsa maribela a kgoro; matlwana a ka fa ditlhakoreng a ne a ntse jalo, le mesepuri e mekima.

← Chapter 40 Jump to: Chapter 42 →