Ezekiel 25

Tswana (BAEBELE e e Boitshepo) 1992

← Chapter 24 Jump to: Chapter 26 →

1Lefoko la ga Jehofa la tla mo go nna, la re:

2“Morwa motho, lebisa sefatlhogo sa gago kwa baneng ba Amone, mme o ba perofesetse o ba nyatse.

3O reye bana ba Amone o re: Utlwang, lefoko la Morena Modimo; Morena Modimo o bua jaana, a re: E re ka o nyaditse felo ga me ga boitshepo, jale ka go tlhapadiwa, wa re: ‘Ahe;’ le ka ga lefatshe la Iseraele jale ka le swafadiwa; le ka ga ba ntlo ya Juta jale ka ba isiwa botshwarong.

4Ke gone bona, ke tlaa go neela bana ba botlhabatsatsi gore ba go rue, mme ba tlaa tlhoma mathibelelo a bone mo go wena, ba tlaa dira maago a bone mo go wena; ba tlaa ja maungo a gago, ba tlaa nwa maši a gago.

5Ke tlaa dira Raba gore go nne ntlo ya dikamela, le bana ba Amone gore o nne mabothelo a matsomane; mme lo tlaa itse fa ke le Jehofa.”

6Gonne Morena Modimo o bua jaana, a re: “E re ka o opantse diatla, wa tiba ka dinao, wa itumela ka kilo yotlhe ya mowa wa gago ka ga lefatshe la Iseraele;

7ka re: Bona, ke go otlololetse seatla, ke tlaa go neela merafe gore o thopiwe; ke tlaa go kgaola mo ditšhabeng, ke dira gore o nyelele mo mafatsheng, ke tlaa go senya; mme o tlaa itse fa ke le Jehofa.”

8Morena Modimo o bua jaana, a re: “Ereka boMoabe le Seira ba re: Bonang, ba ntlo ya Juta ba tshwana le merafe yotlhe;

9ke gone bonang, ke tlaa phunya lotlhakore lwa Moabe ka fa ntlheng ya metse, go tswa metseng ya gagwe e e mo melelwaneng ya gagwe, kgalalelo ya lefatshe, e bong Bethe-jesimothe, le Baale-meone, le Kiriathaime,

10ke lo phunyetsa bana ba botlhabatsatsi, ba ya go tlhabana le bana ba Amone, mme ke tlaa ba ntshetsa go ruiwa, gore bana ba Amone ba se tlhole ba gakologelwa mo merafeng.

11Ke tlaa dirafatsa ditshekiso mo Moabe; mme ba tlaa itse fa ke le Jehofa.”

12Morena Modimo o bua jaana, a re: “E re ka Etome a tlhabanye le ba ntlo ya Juta ka go ipusolosa a kgopile thata, mme a ipusoloseditse mo go bone;

13ke gone ka moo Morena Modimo o bua jaana, a re: Ke tlaa otlololela Etome seatla, ke tlaa kgaola ke tlosa gone motho le kgomo, ke tlaa go swafatsa go simolola kwa Temane; go ya fela kwa Detane ba tlaa wa ka tšhaka.

14Ke tlaa baya pusoloso ya me mo Etome ka seatla sa batho ba me ba Iseraele; ba tlaa dira mo Etome ka fa bogaleng jwa me, le ka fa tšararegong ya me; mme ba tlaa itse pusoloso ya me,” go bua Morena Modimo.

15Morena Modimo o bua jaana, a re: “E re ka Bafilisitia ba dirile ka pusoloso, mme ba ipusolositse ka kilo ya mowa go le senya ka bobaba jo bo sa khutleng;

16ke gone ka moo Morena Modimo o bua jaana, a re: Bonang, ke tlaa otlololela Bafilisitia seatla, mme ke tlaa kgaola Bakerethe, ke ba ke senya masalela a ka fa dintshing tsa lewatle.

17Ke tlaa ba ipusolosetsa thata ka dikgalemo tse di šakgetseng; mme ba tlaa itse fa ke le Jehofa, mogang ke ipusolosang mo go bone.”

← Chapter 24 Jump to: Chapter 26 →