Ezekiel 47

Tswana (BAEBELE e e Boitshepo) 1992

← Chapter 46 Jump to: Chapter 48 →

1Mme a mpusetsa kwa mojakong wa ntlo; mme bonang metsi a bo a tswa fa tlase ga serepodi sa ntlo, a tswela ntlheng ya botlhabatsatsi, gonne kgoro ya ntlo e ne e lebile botlhabatsatsi; mme metsi a fologa a tswa fa tlase, a tswa ka fa lotlhakoreng lwa ntlo lwa ka fa tsogong le legolo, go pota sebeso ka fa borwa.

2Foo a nkgogela kwa ntle ka tsela ya kgoro ntlheng ya botsheka, a mpotolosa ka tsela ya ka fa ntle go ya kwa kgorong ya ka fa ntle, ka tsela ya kgoro e e lebileng ntlheng ya botlhabatsatsi; mme bonang, ga bo go tsitla metsi ka fa ntlheng ya letsogo le legolo.

3E rile monna yoo a tswela ntlheng ya botlhabatsatsi a tshotse thodi, a lekanya mabogo a le 1 000, mme a nthalatsa metsi, e le metsi a a fitlhang fa magwejaneng.

4Gape a lekanya a le 1 000, mme a nthalatsa metsi, e le metsi a a fitlhang mo mangoleng. Gape a lekanya a le 1 000, mme a nthalatsa metsi, e le metsi a a tshwarang dinoka.

5Morago ga moo a lekanya a le 1 000; mme ya bo e le noka e ke sa kakeng ka e tshela; gonne metsi a ne a gogomogile, e le metsi a go ka sapiwang mo go one, e le noka e e sa kakeng ya tshelwa.

6Mme a nthaya a re: “Morwa motho, a o bonye selo se?” Foo a nkgoga, a mpusetsa kwa losing lwa noka.

7Jaana e rile ke sena go boa, bonang, fa losing lwa noka ga bo go le ditlhare di le dintsi thata ka fa ntlheng nngwe le nngwe.

8Foo a nthaya a re: “Metsi ao a tswela kwa ntlheng ya lefatshe la botlhabatsatsi, mme a tlaa fologela kwa Araba; mme a tlaa tswelela kwa lewatleng; metsi a a tswedisitsweng a tlaa tsena mo lewatleng; mme metsi a tlaa fodisiwa.

9Go tlaa dirala go re ditshedi tsotlhe tse di nyeulang, gongwe le gongwe kwa dinoka di fitlhang teng, di tlaa tshela; mme go tlaa nna bontsintsi jo bogolo jwa ditlhapi; gonne metsi ao a fitlhile teng, mme metsi a lewatle a tlaa fodisiwa, dilo tsotlhe di tlaa tshela gongwe le gongwe kwa noka e fitlhang teng.

10Go tlaa dirala go re batshwara ditlhapi ba tlaa ema fa go yone; go tswa mo Enegedi go ya fela kwa Enegelaime e tlaa nna felo ga go anega ditloa; ditlhapi tsa tsone di tlaa nna ka fa mehuteng ya tsone, jaaka ditlhapi tsa lewatle le legolo di le dintsi thata.

11Mafelo a lone a a maraga, le dinwedi tsa lone, ga di ketla di fodisiwa; di tlaa neelwa go nna letswai fela.

12Fa nokeng, ka fa losing lwa yone, ka fa ntlheng nngwe le nngwe, go tlaa gola ditlhare dingwe le dingwe tse di jewang, tse lekakaba la tsone le se ketlang le swaba, le tse maungo a tsone a sa tlhaeleng; se tlaa ungwa maungo a maša ka kgwedi nngwe le nngwe, ka metsi a lone a tswa mo felong ga boitshepo; maungo a tsone a tlaa nna dijo, le lekakaba la tsone e tlaa nna la kalafo.”

13Morena Modimo o bua jaana, a re: “O, e tlaa nna molelwane o lo tlaa kgaoganyang ka one lefatshe go nna boswa ka fa ditsong tse di some le metso mebedi tsa Iseraele; Josefe o tlaa bona dikabelo di le pedi.

14Lo tlaa rua lefatshe, mongwe jaaka yo mongwe; le ke le tsholeleditseng seatla ka re: Ke tlaa le naya borraeno, mme lefatshe leo le tlaa newa lona go nna boswa.

15“O, e tlaa nna molelwane wa lefatshe, ntlheng ya botsheka, go tswa lewatleng le legolo, ka tsela ya Hethelone, go ya go fitlha kwa botsenong jwa Setate;

16Hamathe, Berotha, le Siberaime, o o fa gare ga molelwane wa Damaseko le molelwane wa Hamathe; Hasere-hatikone, o o fa molelwaneng wa Haurane.

17Molelwane go tswa kwa lewatleng e tlaa nna Hasere-enone fa molelwaneng wa Damaseko, mme ka fa ntlheng ya botsheka go ya kwa botsheka go molelwane wa Hamathe. Eo ke ntlha ya botsheka.

18“Ntlha ya botlhabatsatsi, fa gare ga Haurane le Damaseko le Gileate le lefatshe la Iseraele, e tlaa nna Joretane; go tswa molelwaneng wa botsheka go ya lewatleng la botlhabatsatsi lo tlaa lekanya. E ke ntlha ya botlhabatsatsi.

19“Ntlha ya borwa go ya kwa borwa go tlaa tswa mo Tamare go ya go fitlha kwa metsing a Meribathekateše, go ya go fitlha kwa molatswaneng wa Egepeto, go ya go fitlha kwa lewatleng le legolo. E ke yone ntlha ya borwa go ya kwa borwa.

20“Ntlha ya bophirimatsatsi e tlaa nna lewatle le legolo, go tswa molelwaneng wa borwa go ya go fitlha bolebana le botseno jwa Hamathe. E ke yone ntlha ya bophirimatsatsi.

21“Lo tlaa ikgaoganyetsa lefatshe leo jalo ka fa ditsong tsa Iseraele.

22Go tlaa dirala go re lo tlaa le kgaoganya ka bola go nna boswa jwa lona le jwa baeng ba ba jakileng mo go lona, ba ba tlaa tsalang bana mo go lona; mme ba tlaa nna mo go lona jaaka ba ba tsaletsweng mo gae mo baneng ba Iseraele; ba tlaa nna le boswa le lona mo ditsong tsa Iseraele.

23Go tlaa dirala go re lotso lo moeng o jakileng mo go lone, lo tlaa mo naya boswa jwa gagwe teng.” Go bua Morena Modimo.

← Chapter 46 Jump to: Chapter 48 →