Ezekiel 31

Tswana (BAEBELE e e Boitshepo) 1992

← Chapter 30 Jump to: Chapter 32 →

1Ga dirala ya re ka ngwaga wa 11, ka kgwedi ya boraro, ka letsatsi la ntlha la kgwedi, lefoko la ga Jehofa la tla mo go nna, la re:

2“Morwa motho, raya Faro kgosi ya Egepeto, le bontsi jwa gagwe, o re: “Ana o tshwana le mang mo bogolong jwa gago?

3Bona, Moasiria e ne e le mosetara mo Lebanone, o o nang le dikala tse dintle, o o nang le togakano e e tshutifatsang, mme o ne o godile thata, setlhoa sa gagwe se le mo dikaleng tse dikima.

4Metsi a ne a mo otla, boteng jwa mo godisa; dinoka tsa gagwe tsa elela tikologong ya fa o tlhomilweng teng; mme a isa meedi ya gagwe kwa ditlhareng tsotlhe tsa naga.

5Ke gone ka moo go gola ga gagwe ga feta ditlhare tsotlhe tsa naga; le dikala tsa gagwe tsa ntsifadiwa, mme ya re a tlhogisa dikala tsa gagwe tsa nna ditelele ka ntlha ya metsi a mantsi.

6Dinonyane tsotlhe tsa loapi tsa aga ditlhaga tsa tsone mo dikaleng tsa gagwe, ditshedi tsotlhe tsa naga tsa tsalela ka fa tlase ga dikala tsa gagwe, le merafe yotlhe e megolo ya aga mo moriting wa gagwe.

7Jalo o ne a le montle mo bogolong jwa gagwe, mo boleeleng jwa dikala tsa gagwe; gonne motswe wa gagwe o ne o le ka fa metsing a mantsi.

8Masetara a a mo tshimong ya Modimo a ne a sa nonofa go mo suba; ditlhare tsa mafire di sa tshwane le dikala tsa gagwe, le ditlhare tsa mapelane di sa nna jaaka dikala tsa gagwe; go ne go se na setlhare sepe mo tshimong ya Modimo se se tshwanang nae mo bontleng jwa gagwe.

9Ke mo dirile montle ka bontsi jwa dikala tsa gagwe; ditlhare tsotlhe tsa Etene, tse di mo tshimong ya Modimo, a di bolaisa pelo.”

10Ke gone ka moo Morena Modimo o bua jaana, a re: “E re ka o godile, mme o beile setlhoa mo dikaleng tse dikima, le pelo ya gagwe e itsholeditse mo bogodimong jwa gagwe,

11ke tlaa mo tsenya mo seatleng sa mononofi wa merafe; ene ruri o tlaa dira nae; ke mo leleketse koo ka ntlha ya boikepo jwa gagwe.

12Baeng ba ba boitshegang ba merafe, ba mo kgaotse, ba mo tlogetse dikala tsa gagwe di wetse mo dithabeng le mo megogorong yotlhe, dikala tsa gagwe di robegetse fa meeding yotlhe ya metse ya lefatshe; mme ditšhaba tsotlhe tsa lefatshe di tlogile mo moriting wa gagwe, di mo tlogetse.

13Dinonyane tsotlhe tsa loapi di tlaa aga mo go koameng ga gagwe, le ditshedi tsotlhe tsa naga di tlaa aga mo dikaleng tsa gagwe,

14e le gore go se nne ditlhare dipe tse di fa metsing tse di ka ikgodisang mo go goleng ga tsone, le fa e le go ipaya setlhoa mo dikaleng tse dikima, le fa e le bathata ba merafe go ema mo bogodimong jwa bone, e bong botlhe ba ba nwang metsi; gonne ba neetswe loso botlhe fela, go ya mafelong a a kwa tlasetlase a lefatshe, mo gare ga bana ba batho, ba na le ba ba fologelang mo moleteng.”

15Morena Modimo o bua jaana, a re: “E rile ka tsatsi le o fologetseng ka lone mo Bobipong, ka tsosa bohutsana; ka mo khurumeletsa boteng, ka kganela dinoka tsa lone, mme metsi a magolo a emisiwa; ka mo hutsafaletsa Lebanone, le ditlhare tsotlhe tsa naga tsa mo idibalela.

16E rile ke mo digela mo Bobipong a na le ba ba fologelang mo moleteng, ka reketlisa merafe ka kgosomelo ya go wa ga gagwe; ditlhare tsotlhe tsa Etene, tse di tlhaotsweng le tse di molemo tsa Lebanone, tsotlhe tse di nwang metsi, tsa gomodiwa mo mafelong a a kwa tlasetlase a lefatshe.

17Tsa ba tsa fologela nae mo Bobipong kwa go ba ba bolailweng ka tšhaka; ee, bone ba e ne e le letsogo la gagwe, mme ba aga mo moriting wa gagwe mo gare ga merafe.

18“Ana jalo mo ditlhareng tsa Etene o tshwana le mang mo kgalalelong le mo go goleng? Le fa go ntse jalo o tlaa folosediwa le ditlhare tsa Etene kwa mafelong a a kwa tlasetlase a lefatshe. O tlaa nna mo gare ga ba ba sa rupang, le ba ba bolailweng ka tšhaka. Yo ke ene Faro, le bontsi jwa gagwe.” Go bua Morena Modimo.

← Chapter 30 Jump to: Chapter 32 →