bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Urdu
/
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
/
Deuteronomy 1
Deuteronomy 1
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 2 →
1
Yih wuhí báteṉ haiṉ, jo Músá ne Yardan ke us pár, biyábán meṉ, ya‘ní us maidán meṉ jo Súf ke muqábil aur Fárán aur Tofal aur Lában aur Hasírát aur Dízahab ke darmiyán hai, sab Isráílíoṉ se kahíṉ.
2
Koh i Sha‘ír kí ráh se Horib se Qádis Barní‘a tak gyárah din kí manzil hai.
3
Aur chálísweṉ baras ke gyárahweṉ mahíne kí pahlí táríḳh ko Músá ne un sab ahkám ke mutábiq, jo Ḳhudáwand ne use baní Isráíl ke liye diye the, un se yih báteṉ kahíṉ;
4
ya‘ní jab us ne Amoríoṉ ke bádsháh Síhon ko, jo Hasbon meṉ rahtá thá, márá, aur Basan ke bádsháh ‘Oj ko, jo ‘Astárát meṉ rahtá thá, Adra‘í meṉ qatl kiyá;
5
to is ke ba‘d Yardan ke pár Moáb ke maidán meṉ Músá is sharí‘at ko yúṉ bayán karne lagá, ki
6
Ḳhudáwand hamáre Ḳhudá ne Horib meṉ ham se yih kahá thá, ki Tum is paháṛ par bahut rah chuke ho;
7
so ab phiro, aur kúch karo, aur Amoríoṉ ke kohistání mulk, aur us ke ás pás ke maidán, aur paháṛí qat‘a, aur nasheb kí zamín, aur junúbí atráf meṉ, aur samundar ke sáhil tak, jo Kan‘áníoṉ ká mulk hai, balki koh i Lubnán aur daryá e Furát tak, jo ek baṛá daryá hai, chale jáo.
8
Dekho, maiṉ ne is mulk ko tumháre sámne kar diyá hai. Pas jáo, aur us mulk ko apne qabze meṉ kar lo, jis kí bábat Ḳhudáwand ne tumháre bápdádá Abrahám aur Izháq aur Ya‘qúb se qasam khákar yih kahá thá, ki wuh use un ko, aur un ke ba‘d un kí nasl ko degá.
9
Us waqt maiṉ ne tum se kahá thá, ki Maiṉ akelá tumhárá bojh nahíṉ uṭhá saktá.
10
Ḳhudáwand tumháre Ḳhudá ne tum ko baṛháyá hai, aur áj ke din ásmán ke tároṉ kí mánind tumhárí kasrat hai.
11
Ḳhudáwand tumháre bápdádá ká Ḳhudá tum ko is se bhí hazár chand baṛháe, aur jo wa‘da us ne tum se kiyá hai, us ke mutábiq tum ko barakat baḳhshe.
12
Maiṉ akelá tumháre janjál, aur bojh, aur jhanjaṭ ká kaise mutahammil ho saktá húṉ?
13
So tum apne apne qabíle se aise ádmíoṉ ko chuno, jo dánishwar aur ‘aqlmand aur mashhúr hoṉ, aur maiṉ un ko tum par sardár baná dúṉgá.
14
Is ke jawáb meṉ tum ne mujh se kahá thá, ki Jo kuchh tú ne farmáyá hai, us ká karná bihtar hai.
15
So maiṉ ne tumháre qabíloṉ ke sardároṉ ko, jo dánishwar aur mashhúr the, lekar un ko tum par muqarrar kiyá, táki wuh tumháre qabíloṉ ke mutábiq, hazároṉ ke sardár, aur saikṛoṉ ke sardár, aur pachás pachás ke sardár, aur das das ke sardár hákim hoṉ.
16
Aur usí mauqa‘ par maiṉ ne tumháre qázíoṉ se tákídan yih kahá, ki Tum apne bháiyoṉ ke muqaddamoṉ ko sunná, par ḳhwáh bháí bháí ká mu‘ámala ho, yá pardesí ká, tum un ká faisala insáf ke sáth karná.
17
Tumháre faisale meṉ kisí kí rú ri‘áyat na ho; jaise baṛe ádmí kí bát sunoge, waise hí chhoṭe kí sunná; aur kisí ádmí ká muṉh dekhkar ḍar na jáná; kyúṉki yih ‘adálat Ḳhudá kí hai: aur jo muqaddama tumháre liye mushkil ho, use mere pás le áná, maiṉ use sunúṉgá.
18
Aur maiṉ ne usí waqt sab kuchh jo tum ko karná hai, batá diyá.
19
Aur ham Ḳhudáwand apne Ḳhudá ke hukm ke mutábiq Horib se kúch karke us baṛe aur haulnák biyábán meṉ se hokar guzre, jise tum ne Amoríon ke kohistání mulk ke ráste meṉ dekhá. Phir ham Qádis Barní‘a meṉ pahuṉche.
20
Waháṉ maiṉ ne tum ko kahá, ki Tum Amoríoṉ ke kohistání mulk tak á gaye ho, jise Ḳhudáwand hamárá Ḳhudá ham ko detá hai.
21
Dekho us mulk ko Ḳhudáwand tumháre Ḳhudá ne tumháre sámne kar diyá hai. So tum jáo, aur jaisá Ḳhudáwand tumháre bápdádá ke Ḳhudá ne tum se kahá hai, tum us par qabza karo aur na ḳhauf kháo, na hirásán ho.
22
Tab tum sab mere pás ákar mujh se kahne lage, ki Ham apne jáne se pahle waháṉ ádmí bhejeṉ, jo jákar hamárí ḳhátir us mulk ká hál daryáft kareṉ aur ákar ham ko batáeṉ ki ham ko kis ráh se waháṉ jáná hogá, aur kaun kaun se shahr hamáre ráste meṉ paṛeṉge.
23
Yih bát mujhe bahut pasand áí: chunáṉchi maiṉ ne qabíle píchhe ek ek ádmí ke hisáb se bárah ádmí chune.
24
Aur wuh rawána húe, aur paháṛ par chaṛh gaye, aur wádí e Iskál meṉ pahuṉchkar us mulk ká hál daryáft kiyá.
25
Aur us mulk ká kuchh phal háth meṉ lekar use hamáre pás láe, aur ham ko yih ḳhabar dí, ki Jo mulk Ḳhudáwand hamárá Ḳhudá ham ko detá hai, wuh achchhá hai.
26
Taubhí tum waháṉ jáne par rází na húe, balki tum ne Ḳhudáwand apne Ḳhudá ke hukm se sarkashí kí,
27
aur apne ḳhaimoṉ meṉ kuṛkuṛáne aur kahne lage, ki Ḳhudáwand ko ham se nafrat hai, isí liye wuh ham ko mulk i Misr se nikál láyá, táki wuh ham ko Amoríoṉ ke háth meṉ giriftár kará de, aur wuh ham ko halák kar ḍáleṉ.
28
Ham kidhar já rahe haiṉ? Hamáre bháiyoṉ ne to yih batákar hamárá hausala toṛ diyá hai, ki Waháṉ ke log baṛe baṛe aur lambe haiṉ; aur un ke shahr baṛe baṛe, aur un kí fasíleṉ ásmán se báteṉ kartí haiṉ. Másiwá is ke ham ne waháṉ ‘Anáqím kí aulád ko bhí dekhá.
29
Tab maiṉ ne tum ko kahá, ki Ḳhaufzada mat ho, aur na un se ḍaro.
30
Ḳhudáwand tumhárá Ḳhudá, jo tumháre áge áge chaltá hai, wuhí tumhárí taraf se jang karegá, jaise us ne tumhárí ḳhátir mulk i Misr meṉ tumhárí áṉkhoṉ ke sámne sab kuchh kiyá;
31
aur biyábán meṉ bhí tum ne yihí dekhá, kí jis tarah insán apne beṭe ko uṭháe húe chaltá hai, usí tarah Ḳhudáwand tumhárá Ḳhudá tumháre is jagah pahuṉchne tak sáre ráste jaháṉ jaháṉ tum gaye, tum ko uṭháe rahá.
32
Taubhí is bát meṉ tum ne Ḳhudáwand apne Ḳhudá ká yaqín na kiyá,
33
jo ráh meṉ tum se áge áge tumháre wáste ḍere ḍálne kí jagah talásh karne ke liye, rát ko ág meṉ aur din ko abr meṉ hokar chalá, táki tum ko wuh rásta dikháe jis se tum chalo.
34
Aur Ḳhudáwand tumhárí báteṉ sunkar g̣azabnák húá, aur us ne qasam khákar kahá, ki
35
Is burí pusht ke logoṉ meṉ se ek bhí us achchhe mulk ko dekhne nahíṉ páegá, jise un ke bápdádá ko dene kí qasam maiṉ ne kháí hai,
36
siwá Yufannah ke beṭe Kálib ke, wuh use dekhegá; aur jis zamín par us ne qadam márá hai, use maiṉ us ko aur us kí nasl ko dúṉgá; is liye ki us ne Ḳhudáwand kí pairawí púre taur par kí.
37
Aur tumháre hí sabab se Ḳhudáwand mujh par bhí g̣ussa húá, aur yih kahá, Tú bhí waháṉ jáne na páegá.
38
Nún ká beṭá Yashú‘ jo tere sámne khaṛá rahtá hai, waháṉ jáegá. So tú us kí hausalaafzáí kar; kyúṉki wuhí baní Isráíl ko us mulk ká málik banáegá.
39
Aur tumháre bál bachche, jin ke báre meṉ tum ne kahá thá ki lúṭ meṉ jáeṉge, aur tumháre laṛke bále, jin ko áj bhale aur bure kí bhí tamíz nahíṉ, yih waháṉ jáeṉge; aur yih mulk maiṉ in hí ko dúṉgá, aur yih us par qabza kareṉge.
40
Par tumháre liye yih hai, ki tum lauṭo, aur bahr i Qulzum kí ráh se biyábán meṉ jáo.
41
Tab tum ne mujhe jawáb diyá, ki Ham ne Ḳhudáwand ká gunáh kiyá hai, aur ab jo kuchh Ḳhudáwand hamáre Ḳhudá ne ham ko hukm diyá hai, us ke mutábiq ham jáeṉge, aur jang kareṉge. So tum sab apne apne jangí hathyár báṉdhkar paháṛ par chaṛh jáne ko ámáda ho gaye.
42
Tab Ḳhudáwand ne mujh se kahá, ki Un se kah de, ki Úpar mat chaṛho, aur na jang karo; kyúṉki maiṉ tumháre darmiyán nahíṉ húṉ; tá aisá na ho ki tum apne dushmanoṉ se shikast kháo.
43
Aur maiṉ ne tum se kah bhí diyá, par tum ne merí na suní; balki tum ne Ḳhudáwand ke hukm se sarkashí kí, aur shoḳhí se paháṛ par chaṛh gaye.
44
Tab Amorí, jo us paháṛ par rahte the, tumháre muqábale ko nikle; aur unhoṉ ne shahd kí makkhiyoṉ kí mánind tumhárá píchhá kiyá, aur Sha‘ír meṉ márte márte tum ko Hurmah tak pahuṉchá diyá.
45
Tab tum lauṭkar Ḳhudáwand ke áge rone lage, par Ḳhudáwand ne tumhárí faryád na suní, aur na tumhárí bátoṉ par kán lagáyá.
46
So tum Qádis meṉ bahut dinoṉ tak paṛe rahe, yaháṉ tak ki ek muddat ho gayí.
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 2 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34