bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Urdu
/
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
/
Deuteronomy 28
Deuteronomy 28
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
← Chapter 27
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 29 →
1
Aur agar tum Ḳhudáwand apne Ḳhudá kí bát ko jánfishání se mánkar us ke in sab hukmoṉ par, jo áj ke din maiṉ tum ko detá húṉ, ihtiyát se ‘amal karo, to Ḳhudáwand tumhárá Ḳhudá dunyá kí sab qaumoṉ se ziyáda tum ko sarfaráz karegá;
2
aur agar tum Ḳhudáwand apne Ḳhudá kí bát suno, to yih sab barakateṉ tum par názil hoṉgí, aur tum ko mileṉgí.
3
Shahr meṉ bhí tum mubárak hoge, aur khet meṉ bhí mubárak hoge.
4
Tumhárí aulád aur tumhárí zamín kí paidáwár, aur tumháre chaupáyoṉ ke bachche, ya‘ní gáe bail kí baṛhtí, aur tumhárí bheṛ bakriyon ke bachche mubárak hoṉge.
5
Tumhárá ṭokrá aur tumhárí kaṭhautí donoṉ mubárak hoṉge.
6
Aur tum andar áte waqt mubárak hoge, aur báhar játe waqt bhí mubárak hoge.
7
Ḳhudáwand tumháre dushmanoṉ ko jo tum par hamla kareṉ, tumháre rúbarú shikast diláegá. Wuh tumháre muqábale ko to ek hí ráste se áeṉge, par sát sát rástoṉ se hokar tumháre áge se bhágeṉge.
8
Ḳhudáwand tumháre ambárḳhánoṉ meṉ, aur sab kámoṉ meṉ, jin meṉ tum háth lagáo, barakat ká hukm degá, aur Ḳhudáwand tumhárá Ḳhudá us mulk meṉ, jise wuh tum ko detá hai, tum ko barakat baḳhshegá.
9
Agar tum Ḳhudáwand apne Ḳhudá ke hukmoṉ ko máno, aur us kí ráhoṉ par chalo, to Ḳhudáwand apní us qasam ke mutábiq, jo us ne tum se kháí, tum ko apní pák qaum banákar qáim rakkhegá.
10
Aur dunyá kí sab qaumeṉ yih dekhkar ki tum Ḳhudáwand ke nám se kahláte ho, tum se ḍar jáeṉgí.
11
Aur jis mulk ko tum ko dene kí qasam Ḳhudáwand ne tumháre bápdádá se kháí thí, us meṉ Ḳhudáwand tumhárí aulád ko aur tumháre chaupáyoṉ ke bachchoṉ ko aur tumhárí zamín kí paidáwár ko ḳhúb baṛhákar tum ko baromand karegá.
12
Ḳhudáwand ásmán ko, jo us ká achchhá ḳhazána hai, tumháre liye khol degá ki tumháre mulk meṉ waqt par meṉh barsáe, aur wuh tumháre sab kámoṉ meṉ jin meṉ tum háth lagáo, barakat degá: aur tum bahut sí qaumoṉ ko qarz doge, par ḳhud qarz nahíṉ loge.
13
Aur Ḳhudáwand tum ko dum nahíṉ, balki sir ṭhahráegá, aur tum past nahíṉ, balki sárfaráz hí rahoge, basharte ki tum Ḳhudáwand apne Ḳhudá ke hukmoṉ ko, jo maiṉ tum ko áj ke din detá húṉ, suno, aur ihtiyát se un par ‘amal karo;
14
aur jin bátoṉ ká maiṉ áj ke din tum ko hukm detá húṉ, un meṉ se kisí se dahine yá báeṉ háth muṛkar âur ma‘búdoṉ kí pairawí aur ‘ibádat na karo.
15
Lekin agar tum aisá na karo, ki Ḳhudáwand apne Ḳhudá kí bát sunkar us ke sab ahkám aur áín par, jo áj ke din maiṉ tum ko detá húṉ, ihtiyát se ‘amal karo, to yih sab la‘nateṉ tum par názil hoṉgí, aur tum ko lageṉgí.
16
Shahr meṉ bhí tum la‘natí hoge, aur khet meṉ bhí la‘natí hoge.
17
Tumhárá ṭokrá aur tumhárí kaṭhautí donoṉ la‘natí ṭhahreṉge.
18
Tumhárí aulád aur tumhárí zamín kí paidáwár, aur tumháre gáe bail kí baṛhtí, aur tumhárí bheṛ bakriyoṉ ke bachche la‘natí hoṉge.
19
Tum andar áte la‘natí ṭhahroge, aur báhar játe bhí la‘natí ṭhahroge.
20
Ḳhudáwand un sab kámoṉ meṉ, jin ko tum háth lagáo, la‘nat aur iztiráb aur phiṭkár ko tum par názil karegá, jab tak ki tum halák hokar jald nest o nábúd na ho jáo; yih tumhárí un bada‘málíoṉ ke sabab se hogá, jin ko karne kí wajh se tum mujh ko chhoṛ doge.
21
Ḳhudáwand aisá karegá, ki wabá tum se lipṭí rahegí, jab tak ki wuh tum ko us mulk se, jis par qabza karne ko tum waháṉ já rahe ho, faná na kar de.
22
Ḳhudáwand tum ko tap i diqq aur buḳhár aur sozish aur shadíd harárat aur talwár aur bád i samúm aur geruí se máregá, aur yih tumháre píchhe paṛe raheṉge, jab tak ki tum faná na ho jáo.
23
Aur ásmán, jo tumháre sir par hai, pítal ká, aur zamín, jo tumháre níche hai, lohe kí ho jáegí.
24
Ḳhudáwand meṉh ke badle tumhárí zamín par ḳhák aur dhúl barsáegá: yih ásmán se tum par paṛtí hí rahegí, jab tak ki tum halák na ho jáo.
25
Ḳhudáwand tum ko tumháre dushmanoṉ ke áge shikast diláegá: tum un ke muqábale ke liye to ek hí ráste se jáoge, aur un ke sámne se sát sát rástoṉ se hokar bhágoge, aur dunyá kí tamám saltanatoṉ meṉ tum máre máre phiroge.
26
Aur tumhárí lásheṉ hawá ke parandoṉ aur zamín ke darandoṉ kí ḳhurák hoṉgí, aur koí un ko haṉkákar bhagáne ko bhí na hogá.
27
Ḳhudáwand tum ko Misr ke phoṛoṉ aur bawásír, aur khujlí, aur ḳhárish meṉ aisá mubtalá karegá, ki tum kabhí achchhe bhí nahíṉ hone ke.
28
Ḳhudáwand tum ko junún aur nábínáí, aur dil kí ghabráhaṭ meṉ bhí mubtalá kar degá.
29
Aur jaisá andhá andhere meṉ ṭaṭoltá hai, waise hí tum do pahar din ko ṭaṭolte phiroge, aur tum apne sab dhandoṉ meṉ nákám rahoge; aur tum par hamesha zulm hí hogá, aur tum luṭte hí rahoge, aur koí na hogá jo tum ko bacháe.
30
‘Aurat se maṉgní to tum karoge lekin dúsrá us se mubásharat karegá: tum ghar banáoge, par us meṉ basne na páoge: tum tákistán lagáoge, par us ká phal isti‘mál na karoge.
31
Tumhárá bail tumhárí áṉkhoṉ ke sámne zabh kiyá jáegá, par tum us ká gosht kháne na páoge: tumhárá gadhá tum se jabran chhín liyá jáegá, aur tum ko phir na milegá: tumhárí bheṛeṉ tumháre dushmanoṉ ke háth lageṉgí, aur koí na hogá, jo tum ko bacháe.
32
Tumháre beṭe aur beṭiyáṉ dúsrí qaum ko dí jáeṉgí, aur tumhárí áṉkheṉ dekheṉgí, aur sáre din un ke liye taraste taraste rah jáeṉgí: aur tumhárá kuchh bas nahíṉ chalegá.
33
Tumhárí zamín kí paidáwár aur tumhárí sárí kamáí ko ek aisí qaum kháegí, jis se tum wáqif nahíṉ; aur tum sadá mazlúm aur dabe hí rahoge,
34
yaháṉ tak ki in bátoṉ ko apní áṉkhoṉ se dekh dekhkar díwáne ho jáoge.
35
Ḳhudáwand tumháre ghuṭnoṉ aur ṭáṉgoṉ meṉ aise bure phoṛe paidá karegá, ki un se tum páṉw ke talwe se lekar sir kí chándí tak shifá na pá sakoge.
36
Ḳhudáwand tum ko aur tumháre bádsháh ko, jise tum apne úpar muqarrar karoge, ek aisí qaum ke bích le jáegá, jise tum aur tumháre bápdádá jánte bhí nahíṉ, aur waháṉ tum âur ma‘búdoṉ kí, jo mahz lakṛí aur patthar haiṉ ‘ibádat karoge.
37
Aur un sab qaumoṉ meṉ, jaháṉ jaháṉ Ḳhudáwand tum ko pahuṉcháegá, tum bá‘is i hairat, aur zarbu’l masal, aur angushtnumá banoge.
38
Tum khet meṉ bahut sá bíj le jáoge, lekin thoṛá sá jama‘ karoge, kyúṉki ṭiḍḍí use cháṭ legí.
39
Tum tákistán lagáoge, aur un par mihnat karoge, lekin na to mai píne aur na angúr jama‘ karne páoge, kyúṉki un ko kíṛe khá jáeṉge.
40
Tumhárí sab hudúd meṉ zaitún ke daraḳht lage hoṉge, par tum un ká tel nahíṉ lagáne páoge, kyúṉki tumháre zaitún ke daraḳhtoṉ ká phal jhaṛ jáyá karegá.
41
Tumháre beṭe aur beṭiyáṉ paidá hoṉgí, par wuh sab tumháre na raheṉge, kyúṉki wuh asír hokar chale jáeṉge.
42
Tumháre sab daraḳhtoṉ, aur tumhárí zamín kí paidáwár par ṭiḍḍiyáṉ qabza kar leṉgí.
43
Pardesí, jo tumháre bích meṉ hogá, wuh tum se baṛhtá aur sarfaráz hotá jáegá, par tum past hí past hote jáoge.
44
Wuh tum ko qarz degá, aur tum use qarz na de sakoge: wuh sir hogá, aur tum dum ṭhahroge.
45
Aur chúṉki tum Ḳhudáwand apne Ḳhudá ke un hukmoṉ aur áín par, jin ko us ne tum ko diyá hai, ‘amal karne ke liye us kí bát nahíṉ sunoge, is liye yih sab la‘nateṉ tum par áeṉgí, aur tumháre píchhe paṛí raheṉgí, aur tum ko lageṉgí, jab tak tumhárá nás na ho jáe:
46
aur wuh tum par aur tumhárí aulád par sadá nishán aur achambhe ke taur par raheṉgí;
47
aur chúṉki tum báwujúd sab chízoṉ kí firáwání ke farhat aur ḳhushdilí se Ḳhudáwand apne Ḳhudá kí ‘ibádat nahíṉ karoge,
48
is liye bhúke aur piyáse aur naṉge, aur sab chízoṉ ke muhtáj hokar tum apne un dushmanoṉ kí ḳhidmat karoge, jin ko Ḳhudáwand tumháre barḳhiláf bhejegá: aur g̣aním tumhárí gardan par lohe ká júá rakkhe rahegá, jab tak wuh tumhárá nás na kar de.
49
Ḳhudáwand dúr se, balki zamín ke kanáre se, ek qaum ko tum par chaṛhá láegá jaise ‘uqáb ṭúṭkar átá hai. Us qaum kí zabán ko tum nahíṉ samjhoge.
50
Us qaum ke log turshrú hoṉge, jo na buḍḍhoṉ ká liház kareṉge, na jawánoṉ par tars kháeṉge.
51
Aur wuh tumháre chaupáyoṉ ke bachchoṉ aur tumhárí zamín kí paidáwár ko kháte raheṉge, jab tak tumhárá nás na ho jáe: aur wuh tumháre liye anáj, yá mai, yá tel yá gáe bail kí baṛhtí, yá tumhárí bheṛ bakriyoṉ ke bachche kuchh nahíṉ chhoṛeṉge, jab tak wuh tum ko faná na kar deṉ.
52
Aur wuh tumháre tamám mulk meṉ tumhárá muhásara tumhárí hí bastiyoṉ meṉ kiye raheṉge, jab tak tumhárí úṉchí úṉchí fasíleṉ, jin par tumhárá bharosá hogá, gir na jáeṉ. Tumhárá muhásara wuh tumháre hí us mulk kí sab bastiyoṉ meṉ kareṉge, jise Ḳhudáwand tumhárá Ḳhudá tum ko detá hai.
53
Tab us muhásare ke mauqa‘ par, aur us áṛe waqt meṉ tum apne dushmanoṉ se tang ákar apne hí jism ke phal ko, ya‘ní apne hí beṭoṉ aur beṭiyoṉ ká gosht, jin ko Ḳhudáwand tumháre Ḳhudá ne tum ko ‘atá kiyá hogá, kháoge.
54
Wuh shaḳhs, jo tum meṉ názparwarda aur názukbadan hogá, us kí bhí apne bháí, aur apní hamág̣osh bíwí, aur apne báqímánda bachchoṉ kí taraf, burí nazar hogí;
55
yaháṉ tak ki wuh in meṉ se kisí ko bhí apne hí bachchoṉ ke gosht meṉ se, jin ko wuh ḳhud kháegá, kuchh nahíṉ degá; kyúṉki us muhásare ke mauqa‘ par, aur us áṛe waqt meṉ, jab tumháre dushman tum ko tumhárí hí sárí bastiyoṉ meṉ tang kar máreṉge, to us ke pás âur kuchh báqí na rahegá.
56
Wuh ‘aurat bhí, jo tumháre darmiyán aisí názparwarda aur názukbadan hogí, ki narmí o nazákat ke sabab se apne páṉw ká talwá bhí zamín se lagáne kí jur’at na kartí ho, us kí bhí apne pahlú ke shauhar aur apne hí beṭe aur beṭí,
57
aur apne hí nauzád bachche kí taraf, jo us kí ránoṉ ke bích se niklá ho, balki apne sab laṛke báloṉ kí taraf, jin ko wuh janegí, burí nazar hogí, kyúṉki wuh tamám chízoṉ kí qillat ke sabab se un hí ko chhip chhipkar kháegí, jab us muhásare ke mauqa‘ par, aur us áṛe waqt meṉ tumháre dushman tumhárí hí bastiyoṉ meṉ tum ko tang kar máreṉge.
58
Agar tum is sharí‘at kí un sab bátoṉ par, jo is kitáb meṉ likhí haiṉ, ihtiyát rakhkar is tarah ‘amal na karo ki tum ko Ḳhudáwand apne Ḳhudá ke jalálí aur muhíb nám ká ḳhauf ho;
59
to Ḳhudáwand tum par ‘ajíb áfateṉ názil karegá, aur tumhárí aulád kí áfatoṉ ko baṛhákar baṛí aur derpá áfateṉ, aur saḳht aur derpá bímáríáṉ kar degá.
60
Aur Misr ke sab rog, jin se tum ḍarte the, tum ko lagáegá, aur wuh tum ko lage raheṉge.
61
Aur un sab bímáríoṉ aur áfatoṉ ko bhí, jo is sharí‘at kí kitáb meṉ mazkúr nahíṉ haiṉ, Ḳhudáwand tum ko lagáegá jab tak tumhárá nás na ho jáe.
62
Aur chúṉki tum Ḳhudáwand apne Ḳhudá kí bát nahíṉ sunoge, is liye kaháṉ to tum kasrat meṉ ásmán ke tároṉ kí mánind ho, aur kaháṉ shumár meṉ thoṛe hí se rah jáoge.
63
Tab yih hogá, ki jaise tumháre sáth bhaláí karne aur tum ko baṛháne se Ḳhudáwand ḳhushnúd húá, aise hí tum ko faná karáne aur halák kar ḍálne se Ḳhudáwand ḳhushnúd hogá; aur tum us mulk se ukháṛ diye jáoge jaháṉ tum us par qabza karne ko já rahe ho.
64
Aur Ḳhudáwand tum ko zamín ke ek sire se dúsre sire tak tamám qaumoṉ meṉ paráganda karegá. Waháṉ tum laḳrí aur patthar ke âur ma‘búdoṉ kí, jin ko tum yá tumháre bápdádá jánte bhí nahíṉ, parastish karoge.
65
Un qaumoṉ ke bích tum ko chain nasíb na hogá, aur na tumháre páṉw ke talwe ko árám milegá; balki Ḳhudáwand tum ko waháṉ dil i larzán, aur áṉkhoṉ kí dhundhláhaṭ, aur jí kí kuṛhan degá.
66
Aur tumhárí ján dubdhe meṉ aṭkí rahegí, aur tum rát din ḍarte rahoge, aur tumhárí zindagí ká koí ṭhikáná na hogá:
67
aur tum apne dilí ḳhauf ke aur un nazzároṉ ke sabab se, jin ko tum apní áṉkhoṉ se dekhoge, subh ko kahoge, ki Ai kásh ki shám hotí! aur shám ko kahoge, Ai kásh ki subh hotí!
68
Aur Ḳhudáwand tum ko kishtiyoṉ meṉ chaṛhákar us ráste se Misr meṉ lauṭá le jáegá jis kí bábat maiṉ ne tum se kahá, ki Tum use phir kabhí na dekhná, aur waháṉ tum apne dushmanoṉ ke g̣ulám aur lauṉḍí hone ke liye apne ko bechoge, par koí ḳharídár na hogá.
← Chapter 27
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 29 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34