bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Urdu
/
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
/
Deuteronomy 9
Deuteronomy 9
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
← Chapter 8
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 10 →
1
Sun le, ai Isráíl: áj tujhe Yardan pár is liye jáná hai, ki tú aisí qaumoṉ par, jo tujh se baṛí aur zoráwar haiṉ, aur aise baṛe shahroṉ par jin kí fasíleṉ ásmán se báteṉ kartí haiṉ, qabza kare.
2
Waháṉ ‘Anáqím kí aulád haiṉ, jo baṛe baṛe aur qaddáwar log haiṉ. Tujhe un ká hál ma‘lúm hai, aur tú ne un kí bábat yih kahte suná hai, ki baní ‘Anáq ká muqábala kaun kar saktá hai?
3
Pas tú áj ke din ján le, ki Ḳhudáwand terá Ḳhudá tere áge áge bhasam karnewálí ág kí tarah pár já rahá hai. Wuh un ko faná karegá, aur wuh un ko tere áge past karegá, aisá ki tú un ko nikálkar jald halák kar ḍálegá, jaisá Ḳhudáwand ne tujh se kahá hai.
4
Aur jab Ḳhudáwand terá Ḳhudá un ko tere áge se nikál chuke, to tú apne dil meṉ yih na kahná, ki Merí sadáqat ke sabab se Ḳhudáwand mujhe is mulk par qabza karne ko yaháṉ láyá, kyúṉki fi’l wáqi‘ in kí sharárat ke sabab se Ḳhudáwand in qaumoṉ ko tere áge se nikáltá hai.
5
Tú apní sadáqat yá apne dil kí rástí ke sabab se us mulk par qabza karne ko nahíṉ já rahá hai; balki Ḳhudáwand terá Ḳhudá in qaumoṉ kí sharárat ke bá‘is in ko tere áge se ḳhárij kartá hai, táki yúṉ wuh us wa‘de ko, jis kí qasam us ne tere bápdádá Abrahám aur Izháq aur Ya‘qúb se kháí púrá kare.
6
G̣araz, tú samajh le, ki Ḳhudáwand terá Ḳhudá terí sadáqat ke sabab se yih achchhá mulk tujhe qabza karne ke liye nahíṉ de rahá hai, kyúṉki tú ek gardankash qaum hai.
7
Is bát ko yád rakh aur kabhí na bhúl, ki tú ne Ḳhudáwand apne Ḳhudá ko biyábán meṉ kis kis tarah g̣ussa diláyá; balki jab se tum mulk i Misr se nikle ho, tab se is jagah pahuṉchne tak, tum barábar Ḳhudáwand se bag̣áwat hí karte rahe.
8
Aur Horib meṉ bhí tum ne Ḳhudáwand ko g̣ussa diláyá; chunáṉchi Ḳhudáwand náráz hokar tum ko nest o nábúd karná cháhtá thá.
9
Jab maiṉ patthar kí donoṉ lauhoṉ ko, ya‘ní us ‘ahd kí lauhoṉ ko jo Ḳhudáwand ne tum se báṉdhá thá, lene ko paháṛ par chaṛh gayá, to maiṉ chálís din aur chálís rát wahíṉ paháṛ par rahá, aur na roṭí kháí, na pání piyá.
10
Aur Ḳhudáwand ne apne háth kí likhí húí patthar kí donoṉ lauheṉ mere supurd kíṉ, aur un par wuhí báteṉ likhí thíṉ, jo Ḳhudáwand ne paháṛ par ág ke bích meṉ se majma‘ ke din tum se kahí thíṉ.
11
Aur chálís din aur chálís rát ke ba‘d Ḳhudáwand ne patthar kí wuh donoṉ lauheṉ, ya‘ní ‘ahd kí lauheṉ, mujh ko díṉ.
12
Aur Ḳhudáwand ne mujh se kahá, Uṭhkar jald yaháṉ se níche já, kyúṉki tere log, jin ko tú Misr se nikál láyá hai, bigaṛ gaye haiṉ. Wuh us ráh se jis ká maiṉ ne un ko hukm diyá jald bargashta ho gaye, aur apne liye ek múrat ḍhálkar baná lí hai.
13
Aur Ḳhudáwand ne mujh se yih bhí kahá, ki Maiṉ ne in logoṉ ko dekh liyá: yih gardankash log haiṉ.
14
So ab, tú mujhe in ko halák karne de, táki maiṉ in ká nám safha e rozgár se miṭá ḍálúṉ, aur maiṉ tujh se ek qaum, jo in se zoráwar aur baṛí ho, banáúṉgá.
15
Tab maiṉ ulṭá phirá aur paháṛ se níche utrá, aur paháṛ ág̣ se dahak rahá thá: aur ‘ahd kí wuh donoṉ lauheṉ mere donoṉ háthoṉ meṉ thíṉ.
16
Aur maiṉ ne dekhá ki tum ne Ḳhudáwand apne Ḳhudá ká gunáh kiyá, aur apne liye ek bachhṛá ḍhálkar baná liyá hai, aur bahut jald us ráh se, jis ká hukm Ḳhudáwand ne tum ko diyá thá, bargashta ho gaye.
17
Tab maiṉ ne un donoṉ lauhoṉ ko apne donoṉ háthoṉ se lekar pheṉk diyá, aur tumhárí áṉkhoṉ ke sámne un ko toṛ ḍálá.
18
Aur maiṉ pahle kí tarah chálís din aur chálís rát Ḳhudáwand ke áge auṉdhá paṛá rahá: maiṉ ne na roṭí kháí, na pání piyá, kyúṉki tum se baṛá gunáh sarzad húá thá, aur Ḳhudáwand ko g̣ussa diláne ke liye tum ne wuh kám kiyá jo us kí nazar meṉ burá thá.
19
Aur maiṉ Ḳhudáwand ke qahr aur g̣azab se ḍar rahá thá, kyúṉki wuh tum se saḳht náráz hokar tum ko nest o nábúd karne ko thá, lekin Ḳhudáwand ne us bár bhí merí sun lí.
20
Aur Ḳhudáwand Hárún se aisá g̣ussa thá, ki use halák karná cháhá, par maiṉ ne us waqt Hárún ke liye bhí du‘á kí.
21
Aur maiṉ ne tumháre gunáh ko, ya‘ní us bachhṛe ko, jo tum ne banáyá thá, lekar ág meṉ jaláyá; phir use kúṭ kúṭkar aisá písá ki wuh gard kí mánind bárík ho gayá; aur us kí us rákh ko us nadí meṉ jo paháṛ se nikalkar níche bahtí thí ḍál diyá.
22
Aur Tab‘erah, aur Massah, aur Qabrot Hattáwah meṉ bhí tum ne Ḳhudáwand ko g̣ussa diláyá.
23
Aur jab Ḳhudáwand ne tum ko Qádis Barní‘a se yih kahkar rawána kiyá, ki Jáo, aur us mulk par, jo maiṉ ne tum ko diyá hai, qabza karo, to us waqt bhí tum ne Ḳhudáwand apne Ḳhudá ke hukm ko ‘udúl kiyá, aur us par ímán na láe, aur us kí bát na mání.
24
Jis din se merí tum se wáqifíyat húí hai, tum barábar Ḳhudáwand se sarkashí karte rahe ho.
25
So wuh chálís din aur chálís rát jo maiṉ Ḳhudáwand ke áge auṉdhá paṛá rahá, isí liye paṛá rahá kyúṉki Ḳhudáwand ne kah diyá tha, ki wuh tum ko halák karegá.
26
Aur maiṉ ne Ḳhudáwand se yih du‘á kí, ki Ai Ḳhudáwand Ḳhudá, tú apní qaum, aur apní mírás ke logoṉ ko jin ko tú ne apní qudrat se naját baḳhshí, aur jin ko tú zoráwar háth se Misr se nikál láyá, halák na kar.
27
Apne ḳhádimoṉ Abrahám, aur Izháq aur Ya‘qúb ko yád farmá, aur is qaum kí ḳhudsarí, aur sharárat, aur gunáh par nazar na kar,
28
tá aisá na ho ki jis mulk se tú ham ko nikál láyá hai, waháṉ ke log kahne lageṉ, ki Chúṉki Ḳhudáwand us mulk meṉ, jis ká wa‘da us ne un se kiyá thá, pahuṉchá na saká, aur chúṉki use un se nafrat bhí thí, is liye wuh un ko nikál le gayá, táki un ko biyábán meṉ halák kar de.
29
Áḳhir yih log terí qaum, aur terí mírás haiṉ, jin ko tú apne baṛe zor aur baland bázú se nikál láyá hai.
← Chapter 8
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 10 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34