Deuteronomy 33

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 32 Jump to: Chapter 34 →

1Aur mard i Ḳhudá Músá ne, jo du‘á e ḳhair dekar apní wafát se pahle baní Isráíl ko barakat dí, wuh yih hai.

2Aur us ne kahá: Ḳhudáwand Síná se áyá Aur Sha‘ír se un par áshkárá húá; Wuh koh i Fárán se jalwagar húá, Aur lákhoṉ qudsíoṉ meṉ se áyá: Us ke dahine háth par un ke liye átashí sharí‘at thí.

3Wuh beshakk qaumoṉ se mahabbat rakhtá hai; Us ke sáre muqaddas log tere háth meṉ haiṉ: Aur wuh tere qadamoṉ meṉ baiṭhe; Ek ek terí bátoṉ se mustafíz hogá.

4Músá ne ham ko sharí‘at Aur Ya‘qúb kí jamá‘at ke liye mírás dí.

5Aur wuh us waqt Yasúrún meṉ bádsháh thá Jab qaum ke sardár ikaṭṭhe Aur Isráíl ke qabíle jama‘ húe.

6Rúbin jítá rahe, aur mar na jáe, Taubhí us ke ádmí thoṛe hí hoṉ;

7Aur Yahúdáh ke liye yih hai jo Músá ne kahá, Ai Ḳhudáwand, tú Yahúdáh kí sun, Aur use us ke logoṉ ke pás pahuṉchá: Wuh apne liye áp apne háthoṉ se laṛá; Aur tú hí us ke dushmanoṉ ke muqábale meṉ us ká madadgár hogá.

8Aur Láwí ke haqq meṉ us ne kahá, Tere Tummím aur Úrím us mard i Ḳhudá ke pás haiṉ, Jise tú ne Massah par ázmá liyá, Aur jis ke sáth Maríbah ke chashme par terá tanazu‘ húá;

9Jis ne apne máṉ báp ke báre meṉ kahá, ki Maiṉ ne in ko dekhá nahíṉ; Aur na us ne apne bháiyoṉ ko apná máná, Aur na apne beṭoṉ ko pahcháná: Kyúṉki unhoṉ ne tere kalám kí ihtiyát kí, Aur wuh tere ‘ahd ko mánte haiṉ.

10Wuh Ya‘qúb ko tere ahkám Aur Isráíl ko terí sharí‘at sikháeṉge. Aur tere áge baḳhúr Aur tere mazbah par púrí soḳhtaní qurbání rakkheṉge.

11Ai Ḳhudáwand, tú us ke mál meṉ barakat de Aur us ke háthoṉ kí ḳhidmat ko qubúl kar: Jo us ke ḳhiláf uṭheṉ un kí kamar ko toṛ de, Aur un kí kamar ko bhí, jin ko us se ‘adáwat hai, táki wuh phir na uṭheṉ.

12Aur Binyamín ke haqq meṉ us ne kahá, Ḳhudáwand ká piyárá salámatí ke sáth us ke pás rahegá; Wuh sáre din use ḍháṉke rahtá hai, Aur wuh us ke kandhoṉ ke bích sukúnat kartá hai.

13Aur Yúsuf ke haqq meṉ us ne kahá, Us kí zamín Ḳhudáwand kí taraf se mubárak ho, Ásmán kí beshqímat ashiyá aur shabnam Aur wuh gahrá pání jo níche hai,

14Aur súraj ke pakáe húe beshbahá phal, Aur chánd kí ugáí húí beshqímat chízeṉ,

15Aur qadím paháṛoṉ kí beshqímat chízeṉ, Aur abadí paháṛoṉ kí beshqímat chízeṉ,

16Aur zamín aur us kí ma‘múrí kí beshqímat chízeṉ, Aur us kí ḳhushnúdí jo jháṛí meṉ rahtá thá, In sab ke i‘tibár se Yúsuf ke sir par Ya‘ní usí ke sir ke chánd par, jo apne bháiyoṉ se judá rahá, barakat názil ho!

17Us ke bail ke pahlauṭhe kí sí us kí shaukat hai; Aur us ke síṉg janglí sáṉḍ ke se haiṉ: Un hí se wuh sab qaumoṉ ko, balki zamín kí intihá ke logoṉ ko dhakelegá. Wuh Ifráím ke lákhoṉ lákh, Aur Munassí ke hazároṉ hazár haiṉ.

18Aur Zabúlún ke báre meṉ us ne kahá, Ai Zabúlún, tú apne báhar játe waqt Aur ai Ishkár, tú apne ḳhaimoṉ meṉ ḳhush rah.

19Wuh logoṉ ko paháṛoṉ par buláeṉge; Aur waháṉ sadáqat kí qurbáníáṉ guzráneṉge: Kyúṉki wuh samundaroṉ ke faiz, Aur ret ke chhipe húe ḳhazánoṉ se bahrawar hoṉge.

20Aur Jadd ke haqq meṉ us ne kahá, Jo koí Jadd ko baṛháe, wuh mubárak ho: Wuh sherní kí tarah rahtá hai, Aur bázú, balki sir ke chánd tak ko, pháṛ ḍáltá hai.

21Aur us ne pahle hisse ko apne liye chun liyá, Kyúṉki shara‘ denewále ká baḳhra waháṉ alag kiyá húá thá; Aur us ne logoṉ ke sardároṉ ke sáth ákar Ḳhudáwand ke insáf ko, Aur us ke ahkám ko, jo Isráíl ke liye the, púrá kiyá.

22Aur Dán ke haqq meṉ us ne kahá, Dán us sher i babar ká bachcha hai, Jo Basan se kúdkar átá hai.

23Aur Naftálí ke haqq meṉ us ne kahá, Ai Naftálí, jo lutf o karam se ásúda, Aur Ḳhudáwand kí barakat se ma‘múr hai: Tú mag̣rib aur junúb ká málik ho.

24Aur Áshar ke haqq meṉ us ne kahá, Áshar ás aulád se málámál ho; Wuh apne bháiyoṉ ká maqbúl ho, Aur apná páṉw tel meṉ ḍuboe.

25Tere benḍe lohe aur pítal ke hoṉge, Aur jaise tere din waisí hí terí quwwat ho.

26Ai Yasúrún, Ḳhudá kí mánind âur koí nahíṉ Jo terí madad ke liye ásmán par Aur apne jáh o jalál meṉ falak par sawár hai.

27Abadí Ḳhudá terí sukúnatgáh hai, Aur níche dáimí bázú haiṉ: Us ne g̣aním ko tere sámne se nikál diyá, Aur kahá, Un ko halák kar de.

28Aur Isráíl salámatí ke sáth, Ya‘qúb ká sotá akelá, Anáj aur mai ke mulk meṉ basá húá hai, Balki ásmán se us par os paṛtí rahtí hai.

29Mubárak hai tú, ai Isráíl; Tú Ḳhudáwand kí bacháí húí qaum hai, so kaun terí mánind hai? Wuhí terí madad kí sipar, Aur tere jáh o jalál kí talwár hai. Tere dushman tere mutí‘ hoṉge, Aur tú un ke úṉche maqámoṉ ko pámál karegá.

← Chapter 32 Jump to: Chapter 34 →