bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Urdu
/
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
/
Deuteronomy 32
Deuteronomy 32
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
← Chapter 31
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 33 →
1
Kán lagáo, ai ásmáno, aur maiṉ bolúṉgá; Aur zamín mere muṉh ki báteṉ sune.
2
Merí ta‘lím meṉh kí tarah barsegí, Merí taqrír shabnam kí mánind ṭapkegí; Jaise narm ghás par phúár paṛtí ho, Aur sabzí par jhaṛiyáṉ.
3
Kyúṉki maiṉ Ḳhudáwand ke nám ká ishtihár dúṉgá: Tum hamáre Ḳhudá kí ta‘zím karo.
4
Wuh wuhí Chaṭán hai: us kí san‘at kámil hai; Kyúṉki us kí sab ráheṉ insáf kí haiṉ: Wuh wafádár Ḳhudá, aur badí se mubarrá hai, Wuh munsif aur barhaqq hai.
5
Yih log us ke sáth burí tarah se pesh áe. Yih us ke farzand nahíṉ. Yih un ká ‘aib hai; Yih sab kajrau aur ṭeṛhí nasl haiṉ.
6
Kyá tum, ai bewuqúf aur kam‘aql logo, Is tarah Ḳhudáwand ko badla doge? Kyá wuh tumhárá báp nahíṉ, jis ne tum ko ḳharídá hai? Us hí ne tum ko banáyá aur qiyám baḳhshá.
7
Qadím aiyám ko yád karo, Nasl dar nasl ke barsoṉ par g̣aur karo: Apne báp se púchho, wuh tum ko batáegá; Buzurgoṉ se suwál karo, wuh tum se bayán kareṉge.
8
Jab Haqq Ta‘álá ne qaumoṉ ko mírás báṉṭí Aur baní Ádam ko judá judá kiyá To us ne qaumoṉ kí sarhaddeṉ Baní Isráíl ke shumár ke mutábiq ṭhahráíṉ.
9
Kyúṉki Ḳhudáwand ká hissa usí ke log haiṉ; Ya‘qúb us kí mírás ká qur‘a hai.
10
Wuh Ḳhudáwand ko wíráne Aur súne haulnák biyábán meṉ milá; Ḳhudáwand us ke chaugird rahá, us ne us kí ḳhabar lí, Aur use apní áṉkh kí putlí kí tarah rakkhá.
11
Jaise ‘uqáb apne ghoṉsle ko hilá hilákar Apne bachchoṉ par manḍlátá hai, Waise hí us ne apne bázúoṉ ko phailáyá, Aur un ko lekar apne paroṉ par uṭhá liyá.
12
Faqat Ḳhudáwand hí ne un kí rahbarí kí, Aur us ke sáth koí ajnabí ma‘búd na thá.
13
Us ne use zamín kí úṉchí úṉchí jagahoṉ par sawár karáyá, Aur us ne khet kí paidáwár kháí; Us ne use chaṭán meṉ se shahd Aur saṉg i ḳhárá meṉ se tel chusáyá,
14
Aur gáeoṉ ká makkhan aur bheṛ bakriyoṉ ká dúdh Aur barroṉ kí charbí Aur Basaní nasl ke meṉḍhe aur bakre Aur ḳhális gehúṉ ká áṭá bhí; Aur tú angúr ke ḳhális ras kí mai piyá kartá thá.
15
Lekin Yasúrún moṭá hokar láteṉ márne lagá: Tú moṭá hokar laddhar ho gayá hai, aur tujh par charbí chhá gayí hai: Tab us ne Ḳhudá ko jis ne use banáyá chhoṛ diyá, Aur apní naját kí Chaṭán kí hiqárat kí.
16
Unhoṉ ne ajnabí ma‘búdoṉ ke bá‘is use g̣airat Aur makrúhát se use g̣ussa diláyá.
17
Unhoṉ ne jinnát ke liye, jo Ḳhudá na the, Balki aise deotáoṉ ke liye, jin se wuh wáqif na the, Ya‘ní naye naye deotáoṉ ke liye, jo hál hí meṉ záhir húe the, Jin se un ke bápdádá kabhí ḍare nahíṉ, qurbání kí.
18
Tú us Chaṭán se g̣áfil ho gayá, jis ne tujhe paidá kiyá thá; Tú Ḳhudá ko bhúl gayá, jis ne tujhe ḳhalq kiyá.
19
Ḳhudáwand ne yih dekhkar un se nafrat kí, Kyúṉki us ke beṭoṉ aur beṭiyoṉ ne use g̣ussa diláyá.
20
Tab us ne kahá, Maiṉ apná muṉh un se chhipá lúṉgá, Aur dekhúṉgá ki un ká anjám kaisá hogá; Kyúṉki wuh gardankash nasl Aur bewafá aulád haiṉ.
21
Unhoṉ ne us chíz ke bá‘is, jo ḳhudá nahíṉ, mujhe g̣airat, Aur apní bátil bátoṉ se mujhe gussa dilayá; So maiṉ bhí un ke zarí‘e se, jo koí ummat nahíṉ, un ko g̣airat Aur ek nádán qaum ke zarí‘e se un ko g̣ussa diláúṉgá.
22
Is liye ki mere g̣usse ke máre ág bhaṛak uṭhí hai, Jo pátál kí tah tak jaltí jáegí, Aur zamín ko us kí paidáwár samet bhasam kar degí, Aur paháṛoṉ kí bunyádoṉ meṉ ág lagá degí.
23
Maiṉ un par áfatoṉ ká ḍher lagáúṉgá, Aur apne tíroṉ ko un par ḳhatm karúṉgá.
24
Wuh bhúk ke máre ghul jáeṉge, aur shadíd harárat Aur saḳht halákat ká luqma ho jáeṉge; Aur maiṉ un par darandoṉ ke dáṉt Aur zamín par ke saraknewále kíṛoṉ ká zahr chhoṛ dúṉgá.
25
Báhar wuh talwár se mareṉge, Aur koṭhriyoṉ ke andar ḳhauf se; Jawán mard aur kuṉwáriyáṉ Dúdh píte bachche aur pakke bálwále sab yúṉ hí halák hoṉge.
26
Maiṉ ne kahá, Maiṉ un ko dúr dúr paráganda karúṉgá, Aur un ká tazkira nau‘ i bashar meṉ se miṭá ḍálúṉgá.
27
Par mujhe dushman kí chheṛ chháṛ ká andesha thá, Ki kahíṉ muḳhálif ulṭá samajhkar, Yúṉ na kahne lageṉ, ki Hamáre hí háth bálá haiṉ, Aur yih sab Ḳhudáwand se nahíṉ húá.
28
Wuh ek aisí qaum haiṉ, jo maslahat se ḳhálí ho; Un meṉ kuchh samajh nahíṉ.
29
Kásh wuh ‘aqlmand hote ki is ko samajhte, Aur apní ‘áqibat par g̣aur karte.
30
Kyúṉkar ek ádmí hazár ká píchhá kartá, Aur do ádmí das hazár ko bhágá dete, Agar un kí Chaṭán hí un ko bech na detí, Aur Ḳhudáwand hí un ko hawále na kar detá?
31
Kyúṉki un kí chaṭán aisí nahíṉ jaisí hamárí Chaṭán hai, Ḳhwáh hamáre dushman hí kyúṉ na munsif hoṉ.
32
Kyúṉki un kí ták Sadúm kí tákoṉ meṉ se Aur ‘Amúrah ke khetoṉ kí hai: Un ke angúr haláhal ke bane húe haiṉ, Aur un ke guchchhe kaṛwe haiṉ.
33
Un kí mai azhdahoṉ ká bis, Aur kále nágoṉ ká zahr i qátil hai.
34
Kyá yih mere ḳhazánoṉ meṉ Sarbamuhr hokar bhará nahíṉ paṛá hai?
35
Us waqt jab un ke páṉw phisaleṉ, To intiqám lená aur badla dená merá kám hogá: Kyúṉki un kí áfat ká din nazdík hai, Aur jo hádise un par guzarnewále haiṉ wuh jald áeṉge.
36
Kyúṉki Ḳhudáwand apne logoṉ ká insáf karegá, Aur apne bandoṉ par tars kháegá; Jab wuh dekhegá ki un kí quwwat játí rahí, Aur koí bhí, na qaidí aur na ázád, báqí bachá.
37
Aur wuh kahegá, Un ke deotá kaháṉ haiṉ? Wuh chaṭán kaháṉ, jis par un ká bharosá thá;
38
Jo un ke zabíhoṉ kí charbí kháte, Aur un ke tapáwan kí mai píte the? Wuhí uṭhkar tumhárí madad kareṉ; Wuhí tumhárí panáh hoṉ.
39
So ab tum dekh lo, ki maiṉ hí wuh húṉ, Aur mere sáth koí deotá nahíṉ. Maiṉ hí már ḍáltá aur maiṉ hí jilátá húṉ. Maiṉ hí zaḳhmí kartá aur maiṉ hí chaṉgá kartá húṉ: Aur koí nahíṉ jo mere háth se chhuṛáe.
40
Kyúṉki maiṉ apná háth ásmán kí taraf uṭhákar Kahtá húṉ, ki Chúṉki maiṉ abadu’l ábád zinda húṉ,
41
Is liye agar maiṉ apní jhalaktí talwár ko tez karúṉ, Aur ‘adálat ko apne háth meṉ le lúṉ, To apne muḳhálifoṉ se intiqám lúṉgá, Aur apne kína rakhnewáloṉ ko badla dúṉgá.
42
Maiṉ apne tíroṉ ko ḳhún pilá pilákar mast kar dúṉgá, Aur merí talwár gosht kháegí: Wuh ḳhún maqtúloṉ aur asíroṉ ká, Aur wuh gosht dushman ke sardároṉ ke sir ká hogá.
43
Ai qaumo, us ke logoṉ ke sáth ḳhushí manáo: Kyúṉki wuh apne bandoṉ ke ḳhún ká intiqám legá, Aur apne muḳhálifoṉ ko badla degá, Aur apne mulk aur logoṉ ke liye kaffára degá.
44
Tab Músá, aur Nún ke beṭe Húsí‘a ne ákar is gít kí sárí báteṉ logoṉ ko kah sunáíṉ.
45
Aur jab Músá yih sárí báteṉ sab baní Isráílíoṉ ko suná chuká,
46
to us ne un se kahá, ki Jo báteṉ maiṉ ne tum se áj ke din bayán kí haiṉ un sab se tum dil lagáná, aur apne laṛkoṉ ko hukm dená ki wuh ihtiyát rakhkar is sharí‘at kí sab bátoṉ par ‘amal kareṉ.
47
Kyúṉki yih tumháre liye koí besúd bát nahíṉ, balki yih tumhárí zindagání hai, aur isí se us mulk meṉ, jaháṉ tum Yardan pár já rahe ho ki us par qabza karo, tumhári ‘umr daráz hogí.
48
Aur usí din Ḳhudáwand ne Músá se kahá, ki
49
Tú is koh i ‘Abárím par chaṛhkar Nabú kí choṭí ko já, jo Yaríhú ke muqábil mulk i Moáb meṉ hai, aur Kan‘án ke mulk ko jise maiṉ mírás ke taur par baní Isráíl ko detá húṉ dekh le.
50
Aur usí paháṛ par, jaháṉ tú jáe wafát pákar apne logoṉ meṉ shámil ho, jaise terá bháí Hárún Hor ke paháṛ par mará, aur apne logoṉ meṉ já milá:
51
is liye ki tum donoṉ ne baní Isráíl ke darmiyán dasht i Sín ke Qádis meṉ Maríbah ke chashme par merá gunáh kiyá, kyúṉki tum ne baní Isráíl ke darmiyán merí taqdís na kí.
52
So tú us mulk ko apne áge dekh legá, lekin tú waháṉ us mulk meṉ, jo maiṉ baní Isráíl ko detá húṉ, jáne na páegá.
← Chapter 31
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 33 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34