Jeremiah 1

Chinese TTVR (現代台語譯本羅馬字版)

Jump to: Chapter 2 →

1Chit-pún chheh sī Iâ-lī-bí ê giân-hêng-lio̍k. Iâ-lī-bí sī Piān-ngá-bín tōe-khu, A-ná-tu̍t -siâⁿ chi̍t ê chè-si Hi-le̍k-ka ê kiáⁿ.

2A-bûn ê kiáⁿ Iok-se-a chòe Iû-tāi -ông tē-cha̍p-saⁿ nî, Siōng Chú ê ōe lîm-kàu Iâ-lī-bí.

3Iok-se-a ê kiáⁿ Iok-ngá-kèng chòe Iû-tāi -ông kî-kan, kàu Iok-se-a ê kiáⁿ Se-tí-ka chòe Iû-tāi -ông chòe-āu chi̍t nî, tē-cha̍p-it nî gō͘--ge̍h, Iâ-lō͘-sat-léng ê chū-bîn siū-lia̍h khì Pa-pí-lûn ê sî, Siōng Chú siông-siông tùi Iâ-lī-bí kóng-ōe.

4Siōng Chú tùi góa kóng,

5“Góa iáu-bē hō͘ lí tī bú-thai chiâⁿ-hêng í-chêng, í-keng kéng lí; lí iáu-bē siⁿ--chhut-lâi í-chêng, chiū kā lí hun-pia̍t-choh-sèng, soán-li̍p lí chòe lia̍t-kok ê sian-ti.”

6Góa ìn kóng, “Chì-koân ê Siōng Chú, lí chai, góa iáu siàu-liân, koh han-bān kóng-ōe.”

7M̄-kú Siōng Chú tùi góa kóng, “Lí m̄-thang kóng lí siàu-liân. Góa kā lí phài-khì tó-ūi, lí tio̍h khì; kiò lí kóng sím-mi̍h, lí tio̍h kóng.

8Lí m̄-bián kiaⁿ in, in-ūi góa kap lí tông-chāi, beh pó-hō͘ lí. Góa Siōng Chú án-ni soan-pò͘!”

9Siōng Chú chiū chhun-chhiú bong góa ê chhùi, tùi góa kóng, “Hiān-chāi, góa chiong góa ê ōe hē tī lí ê chhùi--ni̍h.

10Góa kin-á-ji̍t siū-koân hō͘ lí, hō͘ lí tī lia̍t-kok bān-bîn chòe pu̍ih-chhut kap thiah-húi, phò-hoāi kap thui-hoan, tiông-kiàn kap chai-chèng ê kang-chok.”

11Siōng Chú tùi góa kóng, “ Iâ-lī-bí, lí ū khòaⁿ-kìⁿ sím-mi̍h?” Góa ìn kóng, “Góa khòaⁿ-kìⁿ chi̍t ki hēng-chhiū ê chhiū-ki.”

12Siōng Chú chiū kóng, “Lí khòaⁿ-liáu tio̍h, góa put-sî kéng-kak, beh hō͘ góa ê ōe si̍t-hiān.”

13Siōng Chú koh tùi góa kóng, “Lí ū khòaⁿ-kìⁿ sím-mi̍h?” Góa kóng, “Góa khòaⁿ-kìⁿ chi̍t ê teh kún ê e-á, tùi pak-pêng piàⁿ--lo̍h-lâi.”

14I tùi góa kóng, “Beh ū chai-lān tùi pak-pêng hoat-chhut, lîm-kàu chit-ê tōe só͘-ū ê chū-bîn.

15Góa beh kā pak-hng lia̍t-kok só͘-ū ê lâng tiàu-chi̍p--lâi, hō͘ in tī Iâ-lō͘-sat-léng ta̍k-ê siâⁿ-mn̂g-kháu siat pó-chō, ûi-kong siâⁿ-chhiûⁿ; koh beh kong-kek Iû-tāi ta̍k-ê siâⁿ-tìn.

16Chiah-ê jîn-bîn khì-sak góa, khì kā pa̍t-ê sîn-bêng sio-hiuⁿ, kūi-pài ka-kī ê chhiú chō ê ngó͘-siōng; góa beh in-ūi in ê chōe kā in sím-phòaⁿ, kā in hêng-hoa̍t.

17Só͘-í, Iâ-lī-bí, lí tio̍h chún-pī hó-sè, chiong góa bēng-lēng lí kóng ê ōe lóng kā in kóng; m̄-thang in-ūi in kiaⁿ-hiâⁿ, chiah bián góa hō͘ lí tī in ê bīn-chêng kiaⁿ-hiâⁿ.

18Lí tio̍h ōe-kì--tit, góa kin-á-ji̍t beh hō͘ lí chiâⁿ-chòe kian-kò͘ ê siâⁿ, chiâⁿ-chòe tâng-chhiûⁿ thih-piah, ōe-tàng tùi-khòng choân-kok, tùi-khòng Iû-tāi ê ông, koaⁿ-tiúⁿ, chè-si, kap jîn-bîn.

19In ōe kong-kek lí, m̄-kú bōe iâⁿ lí; in-ūi góa kap lí tông-chāi, beh pó-hō͘ lí. Góa Siōng Chú án-ni soan-pò͘!”

Jump to: Chapter 2 →