Jeremiah 15

Chinese TTVR (現代台語譯本羅馬字版)

← Chapter 14 Jump to: Chapter 16 →

1Siōng Chú tùi góa kóng, “Chiū-sī Mô͘-se kap Sat-bó-ní khiā tī góa ê bīn-chêng thòe Iû-tāi jîn-bîn kî-kiû, góa mā bô beh lîn-bín in. Lí tio̍h chiong in tùi góa ê bīn-chêng kóaⁿ-cháu, kiò in lī-khui!

2In nā mn̄g, ‘Goán beh cháu-khì tó-ūi?’ Lí chiū kā in kóng, Siōng Chú án-ni kóng: Chù-tiāⁿ pīⁿ--sí-ê, ōe pīⁿ-sí; chù-tiāⁿ chiàn--sí-ê, ōe chiàn-sí; chù-tiāⁿ gō--sí-ê, ōe gō-sí; chù-tiāⁿ siū-lia̍h--ê, ōe siū-lia̍h!

3Góa Siōng Chú í-keng koat-tēng, in ōe tú-tio̍h sì hāng chai-hāi: Sí tī to-ē, iá-káu thoa--khì, khong-tiong ê pe-chiáu tok--khì, kap tōe-chiūⁿ ê cháu-siù chia̍h--khì.

4Iû-tāi -ông Hi-se-ka ê kiáⁿ Má-ná-se tī Iâ-lō͘-sat-léng hoān ê chōe, góa beh hō͘ só͘-ū ê jîn-bîn khòaⁿ--tio̍h chiū iàm-ò͘ⁿ.”

5Siōng Chú kóng: Iâ-lō͘-sat-léng ah, sím-mi̍h-lâng ōe khó-lîn lín? Sím-mi̍h-lâng ōe ūi lín pi-siong? Sím-mi̍h-lâng ōe oa̍t-thâu kā lín chhéng-an?

6Lín í-keng lī-khui góa, oa̍t-tńg-sin m̄ chhap góa; góa beh chhun-chhiú kong-kek lín, húi-hoāi lín, bô beh koh lîn-bín lín.

7Góa beh tī chit só͘-chāi ta̍k-ê siâⁿ-tìn, chiong lín kóaⁿ-sòaⁿ, chhin-chhiūⁿ iāⁿ be̍h-hiūⁿ. Góa beh siau-bia̍t lín, thâi-sí lín ê jî-lú, in-ūi lín lóng bô hóe-kái.

8Góa beh hō͘ lín ê kóaⁿ-hū pí hái-soa khah chōe; góa beh hō͘ húi-bia̍t-chiá thàu-tiong-tàu lâi, kong-kek siàu-liân-lâng ê lāu-bú, hō͘ thòng-khó͘ kiaⁿ-hiâⁿ hut-jiân lîm-kàu in.

9Siⁿ chhit ê jî-lú ê lāu-bú soe-jio̍k bô-la̍t; i ê hi-bāng hut-jiân siau-sit, i chiū choa̍t-bāng kiàn-siàu. Góa beh hō͘ in ê tùi-te̍k thâi-sí in chhun--lo̍h-lâi ê lâng, Siōng Chú án-ni soan-pò͘.

10A-bú, góa chin chhiⁿ-chhám! Lí siⁿ góa, góa chiâⁿ-chòe chi̍t ê kap choân-kok jîn-bîn chhiong-tu̍t, hō͘ lâng chí-chek ê lâng. Góa m̄-bat chioh-chîⁿ hō͘ lâng, mā m̄-bat kā pa̍t-lâng chioh-chîⁿ, m̄-kú só͘-ū ê lâng lóng kā góa chiù-chó͘.

11Siōng Chú, góa nā bô chīn-sim ho̍k-sāi lí, nā bô ūi-tio̍h tùi-te̍k ê chai-hō tùi lí khún-kiû, goān in tùi góa ê chiù-chó͘ si̍t-hiān.

12Kiám ū lâng ōe-tàng kòng-tn̄g thih, te̍k-pia̍t sī tùi pak-hng lâi ê tâng kap thih?

13Siōng Chú kóng, “Góa ê chú-bîn tī choân-kok ta̍k só͘-chāi hoān-chōe, só͘-í góa beh chiong in ê châi-hù kap pó-pòe hō͘ tùi-te̍k chhiúⁿ--khì.

14Góa beh hō͘ in tī in m̄-bat ê kok-ka chòe tùi-te̍k ê lô͘-lē; góa ê siū-khì chhin-chhiūⁿ iām-hé kā in sio-bia̍t.”

15Góa chiū tùi Siōng Chú kóng, “Siōng Chú, lí ta̍k-hāng lóng chai; kiû lí ōe-kì-tit góa, koàn-kò͘ góa; kiû lí m̄-thang khoan-iông hiah-ê tùi-te̍k, hō͘ in lâi hāi góa; lí tio̍h ōe-kì-tit góa sī in-ūi lí ê iân-kò͘ siū lêng-jio̍k.

16Siōng Chú — Bān-kun ê Thóng-sòe Siōng-tè, lí tùi góa kóng ê ōe, góa ta̍k-kù lóng ū thiaⁿ, lí ê ōe hō͘ góa ê sim hoaⁿ-hí khoài-lo̍k, in-ūi góa sio̍k tī lí.

17Góa bô kap chhia-hoa-iàn-lo̍k ê lâng chòe-hé iàn-lo̍k. Góa in-ūi lí ê bēng-lēng, ka-kī chi̍t ê chēng-chēng chē--teh, móa-pak hùn-khài.

18Sī-án-chóaⁿ góa ê khó͘-thàng hiah kú bōe soah? Sī-án-chóaⁿ góa siū ê siong bōe-i--tit? Lí kiám chhin-chhiūⁿ ta--khì ê khoe, chhin-chhiūⁿ bōe-khò--tit ê chúi?”

19Siōng Chú chiū ìn góa kóng, “Lí nā oa̍t tò-tńg, góa chiū koh chiap-la̍p lí chòe góa ê po̍k-jîn ho̍k-sāi góa; lí nā kóng pó-kùi ê sìn-sit, bô kóng bô lō͘-ēng ê ōe, chiū ōe-tàng chòe góa ê tāi-giân-jîn. Án-ni, jîn-bîn ōe kui-ǹg lí, m̄-kú lí m̄-thang sūn in.

20Biān-tùi chiah-ê jîn-bîn, góa beh hō͘ lí chiâⁿ-chòe kian-kò͘ ê tâng-chhiûⁿ. In sui-jiân kong-kek lí, m̄-kú bōe iâⁿ lí, in-ūi góa kap lí tông-chāi, beh kái-kiù lí, pó-hō͘ lí.

21Góa beh kiù lí thoat-lī pháiⁿ-lâng ê chhiú, kiông-pō ê lâng ê sè-le̍k. Siōng Chú án-ni soan-pò͘.”

← Chapter 14 Jump to: Chapter 16 →