Jeremiah 32 — Chinese TTVR (現代台語譯本羅馬字版)

1Iû-tāi -ông Se-tí-ka tē-cha̍p nî, chiū-sī Nî-pò͘-kah-nî-sat thóng-tī Pa-pí-lûn tē-cha̍p-poeh nî, Siōng Chú tùi Iâ-lī-bí kóng-ōe.

2Hit-sî, Pa-pí-lûn ê kun-tūi pau-ûi Iâ-lō͘-sat-léng, sian-ti Iâ-lī-bí hō͘ lâng koaiⁿ tī Iû-tāi ông-kiong ê kaⁿ-ga̍k.

3Iû-tāi -ông Se-tí-ka kā sian-ti Iâ-lī-bí koaiⁿ--teh, mn̄g i kóng, “Lí sī-án-chóaⁿ ū-giân Siōng Chú án-ni kóng, ‘Góa beh chiong chit-ê siâⁿ kau hō͘ Pa-pí-lûn -ông; i ōe kong-chiàm chit-ê siâⁿ.

4Iû-tāi -ông Se-tí-ka it-tēng thoat bōe khui Pa-pí-lûn -lâng ê chhiú, ōe hō͘ Pa-pí-lûn -ông tng-bīn sím-mn̄g.

5Pa-pí-lûn -ông ōe kā Se-tí-ka lia̍h-khì Pa-pí-lûn, kā i lâu tī hia, kàu góa kā i koàn-kò͘ ê sî. Siōng Chú koh kóng: Lín kap Pa-pí-lûn -lâng kau-chiàn, it-tēng bōe iâⁿ.’”

6Iâ-lī-bí kóng, “Siōng Chú kā góa kóng,

7‘Lí ê a-chek Sa-liông ê kiáⁿ Hap-ná-be̍k ōe lâi lí chia, kā lí kóng: Chhiáⁿ lí kā góa tī A-ná-tu̍t hit-khu hn̂g bóe--tńg-khì, in-ūi lí sī góa ê chì-chhin, ū koân-lī sio̍k-hôe.’”

8Goán a-chek ê kiáⁿ Hap-ná-be̍k kó-jiân lâi chhē góa, kā góa kóng, “Chhiáⁿ lí kā góa bóe góa tī Piān-ngá-bín tōe-khu A-ná-tu̍t hit-khu hn̂g, in-ūi lí ū kè-sêng ê iu-sian-koân. Chhiáⁿ lí bóe.” Góa chiū chai, Siōng Chú khak-si̍t ū kā góa kóng-ōe.

9Góa chiū ēng chi̍t-pah káu-cha̍p-saⁿ kong-khek ê gûn kā góa ê chek-peh hiaⁿ-tī Hap-ná-be̍k bóe hit-khu hn̂g.

10Góa tī khè-iok-su chhiam-miâ, hong--khí-lâi, chhiáⁿ lâng lâi chòe chèng-jîn, phêng gûn hō͘ Hap-ná-be̍k.

11Góa chiàu hoat-lu̍t ê kui-tēng, chiong hong-ba̍t kap bô hong-ba̍t ê bóe-bōe khè-iok-su,

12tng góa ê chek-peh hiaⁿ-tī Hap-ná-be̍k, chhiam-miâ ê chèng-jîn, kap tī kaⁿ-ga̍k lāi ê Iû-tāi -lâng bīn-chêng kau hō͘ Má-se-ngá ê sun, Nî-lī-a ê kiáⁿ Pa-lio̍k.

13Góa tī in ê bīn-chêng kau-tài Pa-lio̍k, kóng,

14“Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng: Chiong hong-ba̍t kap bô hong-ba̍t ê khè-iok-su lóng siu tiàm hûi-khì lāi-bīn, tn̂g-kî pó-chûn.

15In-ūi Siōng Chú — Bān-kun ê Thóng-sòe, Í-sek-lia̍t ê Siōng-tè kóng: Chiong-lâi, lâng ōe koh tī chit-ê tōe bóe-bōe chhù-the̍h, chhân-hn̂g, kap phû-tô-hn̂g.”

16Góa chiong bóe-bōe ê khè-iok-su kau hō͘ Nî-lī-a ê kiáⁿ Pa-lio̍k liáu-āu, chiū tùi Siōng Chú kî-tó, kóng,

17“Ah! Chì-koân ê Siōng Chú, lí ū ēng koân-lêng kap tōa khùi-la̍t ê chhiú chhòng-chō thiⁿ-tōe; bô chi̍t hāng sū lí chòe bōe kàu.

18Lí ēng chû-ài tùi-thāi chheng-bān lâng, m̄-kú chiàu sī-tōa-lâng ê chōe kā in ê hō͘-tāi pò-èng. Lí sī Chì-tōa Choân-lêng ê Siōng-tè, lí ê chheng-ho͘ sī Siōng Chú — Bān-kun ê Thóng-sòe.

19Lí ê kè-ōe úi-tāi, chòe tāi-chì ū khùi-la̍t; lí chù-ì teh khòaⁿ sè-kan-lâng ê hêng-ûi, chiàu ta̍k-ê lâng ê só͘-chòe kā in pò-èng.

20Lí tī Ai-ki̍p kiâⁿ sîn-jiah kî-sū, kàu kin-á-ji̍t, koh tī Í-sek-lia̍t -lâng kap sè-kan-lâng ê tiong-kan án-ni teh chòe, hō͘ lí ka-kī tī kin-á-ji̍t ū miâ-siaⁿ.

21Lí kiâⁿ sîn-jiah kî-sū, ēng koân-lêng ê chhiú, ū khùi-la̍t ê chhiú-kut, kap tōa koh thang-kiaⁿ ê sū, chhōa lí ê chú-bîn Í-sek-lia̍t chhut Ai-ki̍p,

22chiong lí tùi in lia̍t-chó͘ soan-sè èng-ún beh hō͘ in lâu lin kap bi̍t ê tōe sù hō͘ in.

23In chi̍t-ē ji̍p-lâi chiàm-léng chit-tè thó͘-tōe, soah bô thiaⁿ-thàn lí ê ōe, bô chun-hêng lí ê lu̍t-hoat; lí bēng-lēng in tio̍h si̍t-hêng--ê, in lóng bô chòe, só͘-í lí hō͘ in tú-tio̍h chiah-ê chai-lān.

24Taⁿ, tùi-te̍k í-keng pek-óa--lâi, khí thô͘-tui beh kong-chhú chit-ê siâⁿ. Chit-ê siâⁿ mā in-ūi chiàn-loān, ki-hng, un-e̍k, hām-lo̍h tī lâi kong-kek i ê Pa-pí-lûn -lâng ê chhiú. Siōng Chú lí kóng--ê í-keng si̍t-hiān, lí mā í-keng khòaⁿ--tio̍h.

25Chì-koân ê Siōng Chú, chit-ê siâⁿ í-keng kau hō͘ Pa-pí-lûn -lâng, m̄-kú lí kèng-jiân kiò góa tio̍h ēng gûn bóe chhân-hn̂g, koh chhiáⁿ lâng choh-chèng.”

26Siōng Chú chiū tùi Iâ-lī-bí kóng,

27“Góa sī Siōng Chú, sī choân jîn-lūi ê Siōng-tè; kiám ū sím-mi̍h sū góa chòe bōe kàu?

28Góa beh chiong chit-ê siâⁿ kau hō͘ Pa-pí-lûn -ông Nî-pò͘-kah-nî-sat kap i ê kun-tūi, i beh kong-chiàm chit-ê siâⁿ.

29Kong-chhú chit-ê siâⁿ ê Pa-pí-lûn kun-tūi ōe ji̍p-lâi pàng-hé sio siâⁿ, mā chiong tī chhù-téng kā Pa-le̍k sio-hiuⁿ, kā gōa-pang ê sîn-bêng hiàn tiān-chiú-chè, jiá góa siū-khì hiah-ê lâng ê chhù choân-pō͘ sio-liáu-liáu.

30Í-sek-lia̍t -lâng kap Iû-tāi -lâng tùi siàu-liân ê sî, chiū it-ti̍t chòe góa khòaⁿ-chòe pháiⁿ, kek góa siū-khì ê sū. Siōng Chú án-ni soan-kò.

31Chit-chō siâⁿ tùi khí-chō ê sî kàu kin-á-ji̍t, put-sî kek góa hoat tōa siū-khì, só͘-í góa beh tùi góa ê bīn-chêng kā i siau-bia̍t.

32In-ūi Í-sek-lia̍t -lâng kap Iû-tāi -lâng, pau-koat in ê kun-ông, koaⁿ-oân, chè-si, sian-ti, Iâ-lō͘-sat-léng ê chū-bîn, í-ki̍p Iû-tāi jîn-bîn lóng chòe siâ-ok ê sū, jiá góa siū-khì.

33In ka-chiah-phiaⁿ ǹg góa, bô beh chiàⁿ-bīn khòaⁿ góa. Góa sui-jiân chi̍t-piàn koh chi̍t-piàn kà-sī in, m̄-kú in lóng bô beh thiaⁿ-thàn, m̄ siū koán-kàu,

34tian-tò chiong khó-ò͘ⁿ ê ngó͘-siōng chhāi tī ūi-tio̍h kèng-pài góa lâi khí ê sèng-tiān lāi-bīn, kā chit-keng sèng-tiān phah lâ-sâm.

35In tī Him-lūn-chú Soaⁿ-kok khí pài Pa-le̍k ê soaⁿ-thâu-tôaⁿ, tī hia hiàn hāu-siⁿ cha-bó͘-kiáⁿ hō͘ Mô͘-lo̍k. Chiah-ê tāi-chì góa lóng m̄-bat kiò in chòe, góa liân siūⁿ mā m̄-bat siūⁿ--kè. In kèng-jiân chòe chiah-ê khó-ò͘ⁿ ê sū, hō͘ Iû-tāi hām-lo̍h chōe.”

36Siōng Chú — Í-sek-lia̍t ê Siōng-tè án-ni kóng, “Taⁿ, koan-hē lín teh kóng in-ūi chiàn-loān, ki-hng, un-e̍k hām-lo̍h tī Pa-pí-lûn -ông ê chhiú ê chit-ê siâⁿ,

37góa beh chiong i ê chū-bîn tùi góa tī hùn-lō͘ tōa siū-khì tiong kā in liû-hòng--khì ê lia̍t-kok chū-chi̍p--khí-lâi, chhōa tò-lâi chit-tè thó͘-tōe, hō͘ in tī chia an-ku-lo̍k-gia̍p.

38In beh chòe góa ê chú-bîn, góa beh chòe in ê Siōng-tè.

39Góa beh hō͘ in ū kâng chi̍t ê sim-chì, kiâⁿ kâng tiâu tō-lō͘, éng-oán kèng-ùi góa, hō͘ in kap in ê kiáⁿ-sun hióng-siū hok-khì.

40Góa beh kap in li̍p éng-oán ê iok, bô beh koh pàng-sak in; góa beh sù in hok-khì, hō͘ in choân-sim kèng-ùi góa, bōe koh oa̍t-cháu lī-khui góa.

41Góa beh hoaⁿ-hí si-un hō͘ in, chin-sêng chīn-sim chīn-ì kā in chai-chèng tī chit-tè thó͘-tōe.”

42Siōng Chú koh kóng, “Góa án-chóaⁿ kā chiah-ê it-chhè ê tōa chai-hō kàng-lo̍h hō͘ chiah-ê jîn-bîn, mā beh chhin-chhiūⁿ án-ni chiong góa èng-ún beh hō͘ in ê tōa hok-khì lóng sù hō͘ in.

43Lín só͘ kóng chit-ê í-keng kau hō͘ Pa-pí-lûn -lâng, pìⁿ-chòe hong-po͘, bô lâng mā bô cheng-siⁿ ê só͘-chāi, ōe koh ū lâng lâi bóe-bōe chhân-hn̂g.

44Tī Piān-ngá-bín tōe-khu, Iâ-lō͘-sat-léng chiu-ûi, í-ki̍p tī Iû-tāi, soaⁿ-tōe, soaⁿ-po͘, Nî-kek-hu ê siâⁿ-tìn, lâng beh ēng gûn bóe-bōe thó͘-tōe, tī khè-iok-su chhiam-miâ, kā khè-iok-su hong-ba̍t, chhiáⁿ lâng choh-chèng. Góa beh kā siū-lia̍h ê lâng chhōa--tò-lâi.” Siōng Chú án-ni soan-pò͘.