Jeremiah 39

Chinese TTVR (現代台語譯本羅馬字版)

← Chapter 38 Jump to: Chapter 40 →

1Se-tí-ka thóng-tī Iû-tāi tē-káu nî cha̍p--ge̍h, Pa-pí-lûn -ông Nî-pò͘-kah-nî-sat chhōa i ê tāi-kun lâi ûi-kong Iâ-lō͘-sat-léng.

2Se-tí-ka tē-cha̍p-it nî sì-ge̍h chhoe-káu, Iâ-lō͘-sat-léng -siâⁿ siū kong-phòa.

3Siâⁿ siū kong-phòa ê sî, Pa-pí-lûn -ông ê chiòng-léng, pau-koat Nî-kah Sa-lī-sih, Sam-kah Nî-pho, Sat-se-kim, lēng-gōa koh chi̍t ê Nî-kah Sa-lī-sih, í-ki̍p Pa-pí-lûn -ông kî-tha ê kun-koaⁿ lóng lâi chē tī siâⁿ ê Tiong-iong-mn̂g.

4Iû-tāi -ông Se-tí-ka kap só͘-ū ê kun-peng khòaⁿ-tio̍h Pa-pí-lûn tāi-kun, chiū thàu-mî tô-cháu; tùi ông-kiong hoe-hn̂g ê lō͘, keng-kè nn̄g ê siâⁿ-chhiûⁿ tiong-kan ê mn̂g chhut-siâⁿ; ông ǹg A-la-pa ê hong-hiòng tô-cháu.

5Pa-pí-lûn ê kun-peng tui-jip in, tī Iâ-lī-ko ê pêng-goân jip-tio̍h Se-tí-ka, kā i lia̍h--khí-lâi, lia̍h-khì Pa-pí-lûn -ông Nî-pò͘-kah-nî-sat hia. Hit-sî, Nî-pò͘-kah-nî-sat lâi tī Hap-má tōe-khu ê Lī-pí-la; i chiū tī hia sím-phòaⁿ Se-tí-ka.

6Pa-pí-lûn -ông tī Lī-pí-la thâi-sí Se-tí-ka ê kiáⁿ, hō͘ i chhin-ba̍k khòaⁿ--tio̍h, mā thâi-sí Iû-tāi só͘-ū ê kùi-cho̍k.

7Āu-lâi Pa-pí-lûn -ông ó͘ Se-tí-ka ê nn̄g lúi ba̍k-chiu, ēng tâng-liān kā i liān--teh, beh kā i lia̍h-khì Pa-pí-lûn.

8Pa-pí-lûn -lâng pàng-hé sio ông-kiong kap jîn-bîn ê chhù, thiah-húi Iâ-lō͘-sat-léng ê siâⁿ-chhiûⁿ.

9Hit-sî, sī-ōe-tiúⁿ Nî-pò͘-sat-la-tàn chiong siâⁿ-lāi chhun--lo̍h-lâi ê jîn-bîn, tâu-hâng kui-sūn ê lâng, kap kî-tha ê jîn-bîn lóng lia̍h-khì Pa-pí-lûn.

10I kā jîn-bîn tiong-kan sím-mi̍h lóng bô ê sàn-chhiah-lâng lâu tī Iû-tāi -tōe, kā phû-tô-hn̂g kap chhân-hn̂g pun hō͘ in.

11Koan-hē Iâ-lī-bí, Pa-pí-lûn -ông Nî-pò͘-kah-nî-sat bēng-lēng sī-ōe-tiúⁿ Nî-pò͘-sat-la-tàn, kóng,

12“Góa chiong Iâ-lī-bí kau-tài lí, lí tio̍h hó-hó kā i chiàu-kò͘, m̄-thang kā i siong-hāi; i ū sím-mi̍h iau-kiû, lí tio̍h chiàu án-ni pān-lí.”

13Sī-ōe-tiúⁿ Nî-pò͘-sat-la-tàn, chiong-kun Nî-pò͘-sa-su-pan, chiong-kun Nî-kah Sa-lī-sih, kap Pa-pí-lûn -ông ê koaⁿ-tiúⁿ chiū phài lâng

14chiong Iâ-lī-bí tùi hō͘-ōe-tūi ê tiâⁿ chhōa--chhut-lâi, kau hō͘ Sa-hoan ê sun, A-hi-kam ê kiáⁿ Ki-tāi-lī, hō͘ i kā Iâ-lī-bí chhōa tò-khì in tau. Tùi án-ni, Iâ-lī-bí ōe-tàng tī jîn-bîn ê tiong-kan khiā-khí.

15Iâ-lī-bí iáu koaiⁿ tī hō͘-ōe-tūi ê tiâⁿ ê sî, Siōng Chú tùi i kóng,

16“Lí khì kā Kó͘-si̍t -lâng Í-pek Bí-le̍k kóng, ‘Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng: Góa beh hō͘ góa ê ōe si̍t-hiān tī chit-ê siâⁿ; bô beh sù hok-khì, sī beh kàng chai-hō. Kàu-sî, lí ōe chhin-ba̍k khòaⁿ--tio̍h.

17M̄-kú kàu hit-ji̍t, góa ōe kiù lí; lí bōe hō͘ lâng kau tī lí teh kiaⁿ ê lâng ê chhiú. Siōng Chú án-ni soan-pò͘.

18Góa it-tēng beh kiù lí; lí bōe hō͘ lâng thâi-sí, sìⁿ-miā ōe tit-tio̍h pó-choân, in-ūi lí sìn-khò góa. Siōng Chú án-ni soan-pò͘.’”

← Chapter 38 Jump to: Chapter 40 →