Jeremiah 41

Chinese TTVR (現代台語譯本羅馬字版)

← Chapter 40 Jump to: Chapter 42 →

1Chhit--ge̍h, Iû-tāi -ông ông-ka ê hō͘-tāi, mā-sī koaⁿ-oân, Í-lī-sa-má ê sun, Nî-thàm-ngá ê kiáⁿ Í-si̍t-má-lī chhōa cha̍p ê lâng lâi Bí-su-pa kìⁿ A-hi-kam ê kiáⁿ Ki-tāi-lī. In tī Bí-su-pa chòe-hé chia̍h-pn̄g ê sî,

2Nî-thàm-ngá ê kiáⁿ Í-si̍t-má-lī kap hit cha̍p ê kap i chòe-hé lâi ê lâng, ēng to thâi-sí Pa-pí-lûn -ông chí-phài chòe séng-tiúⁿ, Sa-hoan ê sun, A-hi-kam ê kiáⁿ Ki-tāi-lī.

3Í-si̍t-má-lī mā thâi-sí tī Bí-su-pa só͘-ū kap Ki-tāi-lī chòe-hé ê Iû-tāi -lâng, í-ki̍p chū-chāi tī hia ê Pa-pí-lûn kun-peng.

4Keh-ji̍t, lâng iáu m̄ chai Ki-tāi-lī siū àm-sat ê sū,

5ū poeh-cha̍p ê lâng tùi Sī-kiàm, Sī-lô, Sat-má-lī-a lâi kàu Bí-su-pa. In thì chhùi-chhiu, thiah-phòa saⁿ, koah-siong ka-kī ê seng-khu, tòa sò͘-chè kap jú-hiuⁿ beh khì Siōng Chú ê sèng-tiān hiàn-chè.

6Nî-thàm-ngá ê kiáⁿ Í-si̍t-má-lī tùi Bí-su-pa chhut--lâi, ná kiâⁿ ná háu khì gêng-chiap in. Í-si̍t-má-lī tú-tio̍h in, chiū tùi in kóng, “Chhiáⁿ lâi kìⁿ A-hi-kam ê kiáⁿ Ki-tāi-lī.”

7In chi̍t-ē ji̍p-siâⁿ, Nî-thàm-ngá ê kiáⁿ Í-si̍t-má-lī kap i ê pō͘-hā chiū thâi-sí hiah-ê lâng, kā in ê si-thé hiat tī ta--khì ê thiok-chúi-tî.

8Hit poeh-cha̍p ê lâng tiong-kan ū cha̍p ê tùi Í-si̍t-má-lī kóng, “M̄-thang kā goán thâi-sí. Goán ū chhàng tōa-be̍h, sió-be̍h, iû, kap bi̍t tī hn̂g--ni̍h.” I chiū thêng-chhiú, bô chiong chit cha̍p ê lâng kap kî-tha ê tâng-phōaⁿ chòe-hé thâi-sí.

9Nî-thàm-ngá ê kiáⁿ Í-si̍t-má-lī chiong hiah-ê in-ūi Ki-tāi-lī ê iân-kò͘ hō͘ i thâi-sí ê lâng ê sin-si, lóng hiat lo̍h-khì thiok-chúi-tî hiat kah tīⁿ-tīⁿ-tīⁿ; chit-ê thiok-chúi-tî sī í-chêng Iû-tāi -ông A-sat ūi-tio̍h hông-ōe pak-kok Í-sek-lia̍t -ông Pa-sa ó͘--ê.

10Í-si̍t-má-lī chiong Bí-su-pa chhun--lo̍h-lâi ê jîn-bîn, pau-koat Se-tí-ka -ông ê cha-bó͘-kiáⁿ, kap iáu tòa tī Bí-su-pa ê lâng lóng lia̍h--khí-lâi. Chiah-ê chhun--lo̍h-lâi ê lâng sī sī-ōe-tiúⁿ Nî-pò͘-sat-la-tàn kau-tài A-hi-kam ê kiáⁿ Ki-tāi-lī koán-lí--ê. Nî-thàm-ngá ê kiáⁿ Í-si̍t-má-lī beh chiong chiah-ê lâng lóng lia̍h-khì A-bûn -lâng hia.

11Ka-lī-a ê kiáⁿ Iok-hap-lân kap kun-tè i ê kun-koaⁿ thiaⁿ-tio̍h Nî-thàm-ngá ê kiáⁿ Í-si̍t-má-lī só͘ chòe ê pháiⁿ tāi-chì,

12chiū chhōa só͘-ū ê pō͘-hā beh khì kap Nî-thàm-ngá ê kiáⁿ Í-si̍t-má-lī kau-chiàn, tī Ki-piàn ê tōa chúi-tî piⁿ jip-tio̍h i.

13Hō͘ Í-si̍t-má-lī lia̍h--khì hiah-ê jîn-bîn khòaⁿ-tio̍h Ka-lī-a ê kiáⁿ Iok-hap-lân í-ki̍p kap i chòe-hé lâi ê kun-koaⁿ, lóng chin hoaⁿ-hí.

14Án-ni, hiah-ê hō͘ Í-si̍t-má-lī tùi Bí-su-pa lia̍h--khì ê lâng chiū oa̍t-tńg-sin cháu kè-lâi Ka-lī-a ê kiáⁿ Iok-hap-lân hia.

15Nî-thàm-ngá ê kiáⁿ Í-si̍t-má-lī kap lēng-gōa poeh ê lâng thoat-lī Iok-hap-lân ê chhiú, cháu-khì A-bûn -lâng hia.

16Nî-thàm-ngá ê kiáⁿ Í-si̍t-má-lī thâi-sí A-hi-kam ê kiáⁿ Ki-tāi-lī liáu-āu, chiong chhun--lo̍h-lâi ê jîn-bîn, pau-koat ta-po͘-lâng, peng-á, hū-lú, gín-á, koaⁿ-oân, tùi Bí-su-pa lia̍h-khì Ki-piàn; āu-lâi, Ka-lī-a ê kiáⁿ Iok-hap-lân kap kun-tè i ê kun-koaⁿ chiong hiah-ê lâng lóng kiù--chhut-lâi.

17In khì kàu Pek-lī-hêng hù-kūn ê Ki-lô-tek Kim-hán, tī hia hioh-khùn, chún-pī beh lo̍h-khì Ai-ki̍p,

18thang tô-pī Pa-pí-lûn -lâng. Nî-thàm-ngá ê kiáⁿ Í-si̍t-má-lī àm-sat Pa-pí-lûn -ông só͘ chí-phài chòe séng-tiúⁿ, A-hi-kam ê kiáⁿ Ki-tāi-lī liáu-āu, in chin kiaⁿ Pa-pí-lûn -lâng.

← Chapter 40 Jump to: Chapter 42 →