Jeremiah 23

Chinese TTVR (現代台語譯本羅馬字版)

← Chapter 22 Jump to: Chapter 24 →

1Siōng Chú kóng, “Hiah-ê sat-hāi koh kóaⁿ-sòaⁿ góa chháu-tiûⁿ ê iûⁿ ê bo̍k-chiá ū chai-hō lah!

2Koan-hē chiah-ê tio̍h bo̍k-ióng Siōng Chú chú-bîn ê bo̍k-chiá, Siōng Chú — Í-sek-lia̍t ê Siōng-tè án-ni kóng, ‘Lín bô chiàu-kò͘ góa ê iûⁿ, koh kā in kóaⁿ-sòaⁿ, lín tio̍h chai, góa beh in-ūi lín ê pháiⁿ hêng-ûi kā lín chhú-hoa̍t.

3Góa beh chū-chi̍p hiah-ê chhun--lo̍h-lâi ê iûⁿ, tùi góa kóaⁿ-sòaⁿ in khì ê só͘-chāi kā in chhōa--tò-lâi, hō͘ in siⁿ-thòaⁿ koh ke-thiⁿ chin chōe.

4Góa beh phài sin ê bo̍k-chiá bo̍k-ióng in. Góa ê iûⁿ-kûn bōe koh sit-táⁿ kiaⁿ-hiâⁿ, liân chi̍t chiah to bōe sit-lo̍h.’ Siōng Chú án-ni soan-pò͘.”

5Siōng Chú kóng, “Sî-ji̍t teh-beh kàu, góa beh hō͘ Tāi-pi̍t ê sè-hē hoat chi̍t ki kong-gī ê Ki. I tī-kok hiân-bêng, tī chit-ê thó͘-tōe si-hêng kong-pêng kap chèng-gī.

6In-ūi i ê chip-chèng, Iû-tāi beh tit-tio̍h kái-kiù, Í-sek-lia̍t jîn-bîn ōe-tàng an-ku-lo̍k-gia̍p. Lâng ōe kā i kiò-chòe ‘Siōng Chú sī goán ê kong-gī’.”

7Siōng Chú kóng, “Sî-ji̍t chi̍t-ē kàu, lâng chiù-chōa ê sî bōe koh kóng, ‘Góa kí hit-ūi chhōa Í-sek-lia̍t -lâng chhut Ai-ki̍p éng-oa̍h ê Siōng Chú chiù-chōa.’

8In beh kóng, ‘Góa kí hit-ūi chhōa Í-sek-lia̍t -lâng lī-khui pak-hng ê tōe, lī-khui I kā in liû-hòng--khì ê ta̍k-kok hit-ūi éng-oa̍h ê Siōng Chú chiù-chōa.’ In ōe khiā-khí tī ka-kī ê hiong-thó͘.”

9Kóng-tio̍h hiah-ê sian-ti, góa ê sim chhì-chha̍k, góa kui seng-khu ê kut-thâu kho̍k-kho̍k-tiô; ūi-tio̍h Siōng Chú kap I sîn-sèng ê ōe, góa chhin-chhiūⁿ chiú-chùi ê lâng, bōe-tàng khòng-chè ka-kī.

10Chit-ê tōe sì-kòe lóng sī tùi Siōng Chú put-tiong ê lâng; in ê só͘-chòe siâ-ok, lām-iōng koân-le̍k. In siū chiù-chó͘, tōe chiū khòng-hān, chháu-tiûⁿ ko͘-tâ.

11Siōng Chú kóng: Sian-ti kap chè-si lóng siat-to̍k góa, tī góa ê sèng-tiān chòe siâ-ok ê sū.

12In kiâⁿ ê lō͘ àm koh ku̍t, hō͘ lâng tui-jip, tī hia poa̍h-tó. Góa hêng-hoa̍t in ê ji̍t kàu lah; góa beh hō͘ chai-hō lîm-kàu in.

13Góa khòaⁿ-kìⁿ Sat-má-lī-a ê sian-ti chòe khó-ò͘ⁿ ê sū: In hōng Pa-le̍k sîn-bêng ê miâ kóng ū-giân, chhōa góa ê jîn-bîn Í-sek-lia̍t kiâⁿ chhò-gō͘ ê lō͘.

14Góa khòaⁿ-kìⁿ Iâ-lō͘-sat-léng ê sian-ti chòe khó-phàⁿ ê sū: In hoān kan-îm, kóng pe̍h-chha̍t, ka-kiông pháiⁿ-lâng ê sè-le̍k, só͘-í bô lâng lī-khui siâ-ok. Tùi góa lâi khòaⁿ, in lóng chhin-chhiūⁿ Só͘-to-má, Iâ-lō͘-sat-léng ê chū-bîn chhin-chhiūⁿ Gô-mô͘-la.

15Só͘-í, góa Siōng Chú — Bān-kun ê Thóng-sòe chiam-tùi Iâ-lō͘-sat-léng ê sian-ti kóng: Góa beh hō͘ in chia̍h khó͘-kó, lim to̍k-chúi, in-ūi ta̍k só͘-chāi bô kèng-khiân ê hong-khì sī in chō-sêng--ê.

16Siōng Chú — Bān-kun ê Thóng-sòe tùi Iâ-lō͘-sat-léng jîn-bîn kóng, “M̄-thang thiaⁿ chiah-ê sian-ti ê ōe; in thoân hō͘ lín--ê sī hu-ké ê ǹg-bāng. In kóng ê ū-giân sī ka-kī siūⁿ--ê, m̄-sī góa thoân hō͘ in--ê.

17In it-ti̍t tùi hiah-ê m̄-khéng thiaⁿ góa ê ōe ê lâng kóng, ‘Siōng Chú kóng: Pêng-an bô-sū!’ Koh tùi hiah-ê sim-ngī ê lâng kóng, ‘Chai-hō bōe lîm-kàu lín.’

18“Kiám ū lâng chham-ka Siōng Chú thian-têng ê gī-hōe, bat khòaⁿ--tio̍h á-sī thiaⁿ-tio̍h I kóng-ōe? In kiám ū jīn-chin thiaⁿ I kóng ê ōe?

19Khòaⁿ leh, Siōng Chú ê tōa siū-khì chhin-chhiūⁿ kńg-lê-á-hong, tī pháiⁿ-lâng ê thâu-khak téng tńg-se̍h.

20Kàu Siōng Chú ê kè-ōe oân-choân si̍t-hiān, I ê siū-khì chiah ōe soah; sî-ji̍t chi̍t-ē kàu, lín chiah ōe chheng-chhó bêng-pe̍k chiah-ê sū.

21“Góa bô chhe-phài chiah-ê sian-ti, m̄-kú in ka-kī sì-kòe cháu; góa bô tùi in kóng-ōe, m̄-kú in ka-kī kóng ū-giân.

22In nā bat chham-ka góa tiàu-chi̍p ê gī-hōe, chiū ōe tùi góa ê jîn-bîn thoân-ta̍t góa ê sìn-sit, hō͘ jîn-bîn lī-khui chōe-ok ê lō͘, bô chòe siâ-ok ê sū.

23“Góa Siōng Chú mn̄g lín, ‘Góa kiám kan-ta tī kūn ê só͘-chāi chiah sī Siōng-tè, tī hn̄g-hn̄g ê só͘-chāi chiū m̄-sī Siōng-tè?’

24Góa koh mn̄g lín, ‘Kiám ū lâng ōe-tàng bih tī ún-ba̍t ê só͘-chāi hō͘ góa khòaⁿ bōe tio̍h? Góa kiám m̄-sī chhiong-móa tī thiⁿ-tōe ta̍k kak-lo̍h?’

25Hiah-ê sian-ti ēng góa ê miâ kóng ké ê ū-giân, kóng, ‘Góa ū bāng-kìⁿ! Góa ū bāng-kìⁿ!’

26In sim chûn khúi-chà, kóng pe̍h-chha̍t-ōe beh kàu sím-mi̍h sî?

27In hō͘-siōng kóng ka-kī ê bāng, beh hō͘ góa ê jîn-bîn bōe-kì-tit góa ê miâ, chhin-chhiūⁿ in ê chó͘-sian ūi-tio̍h Pa-le̍k bōe-kì-tit góa ê miâ.

28Kù-chāi hiah-ê chòe bāng ê sian-ti khì kóng in chòe ê bāng; hō͘ hiah-ê thiaⁿ góa sìn-sit ê sian-ti tiong-si̍t thoân-ta̍t góa ê ōe. Be̍h-kó kap be̍h-sūi beh án-chóaⁿ pí?

29Góa ê sìn-sit kiám m̄-sī chhin-chhiūⁿ hé, kiám m̄-sī chhin-chhiūⁿ ōe kòng-chhùi chio̍h-pôaⁿ ê thih-thûi?

30“Góa Siōng Chú án-ni kóng, ‘Chù-ì! Góa beh tùi-hù hiah-ê sian-ti. In hō͘-siōng thau ēng pa̍t-lâng ê ōe tòng-chòe góa ê ōe.’

31Siōng Chú koh kóng, ‘Chù-ì! Góa beh tùi-hù hiah-ê sian-ti. In chiong ka-kī ê ōe tòng-chòe góa ê ōe.’

32Góa beh tùi-hù hiah-ê sian-ti, in-ūi in ê bāng lóng sī phiàn--lâng-ê; in ēng chiah-ê bāng, í-ki̍p pe̍h-chha̍t kap khoa-kháu ê ōe chhōa góa ê jîn-bîn kiâⁿ-ji̍p oai-lō͘. Góa bô chhe-phài in, mā bô bēng-lēng in; in tùi chiah-ê jîn-bîn lóng bô lī-ek. Siōng Chú án-ni soan-kò.”

33Siōng Chú tùi góa kóng, “Góa ê chú-bîn, sian-ti, á-sī chè-si nā mn̄g lí, ‘Siōng Chú ū sím-mi̍h sìn-sit?’ Lí tio̍h kā in kóng, ‘Lín sī Siōng Chú ê tāng-tàⁿ; I beh khì-sak lín.’

34Nā ū sian-ti, chè-si, á-sī góa ê chú-bîn kóng ‘Che chiū-sī Siōng Chú ê sìn-sit’, góa beh hêng-hoa̍t i kap i ê choân-ke.

35Ta̍k-ê lâng tio̍h mn̄g ka-kī ê chhù-piⁿ, pêng-iú, ‘Siōng Chú ū kóng sím-mi̍h? Siōng Chú ū ìn-tap sím-mi̍h?’

36In bōe-tàng koh kóng ‘Che sī Siōng Chú ê sìn-sit’. Nā ū lâng koh kóng chit-kù ōe, góa chiū beh chiong góa ê sìn-sit pìⁿ-chòe i ê tāng-tàⁿ. In lām-sám sú-iōng éng-oa̍h Siōng-tè ê ōe, chiū-sī Siōng Chú — Bān-kun ê Thóng-sòe lán ê Siōng-tè ê ōe.

37Lí tio̍h mn̄g hiah-ê sian-ti, ‘Siōng Chú ū kóng sím-mi̍h? Siōng Chú ū ìn-tap sím-mi̍h?’

38In nā koh kóng ‘Che sī Siōng Chú ê sìn-sit’, chit-kù ōe góa í-keng hoan-hù lín m̄-thang koh kóng; lí tio̍h kā in kóng,

39‘Góa it-tēng beh chiong lín pàng bōe-kì--tit, kā lín í-ki̍p góa sù hō͘ lín kap lín chó͘-sian ê siâⁿ tùi góa bīn-chêng hiat--chhut-khì.

40Góa beh hō͘ lín kú-tn̂g kiàn-siàu, éng-oán bōe bōe-kì-tit chit-ê bú-jio̍k.’”

← Chapter 22 Jump to: Chapter 24 →