Jeremiah 28

Chinese TTVR (現代台語譯本羅馬字版)

← Chapter 27 Jump to: Chapter 29 →

1Se-tí-ka -ông thóng-tī Iû-tāi tē-sì nî gō͘--ge̍h, Ki-piàn -lâng Ap-sok ê kiáⁿ sian-ti Hap-ná-nî-ngá tī Siōng Chú ê sèng-tiān, tī chè-si kap bîn-chiòng ê bīn-chêng kā góa kóng,

2“Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng, ‘Góa í-keng kòng-tn̄g Pa-pí-lûn -ông hō͘ lín ê taⁿ.

3Nn̄g nî lāi, góa beh chiong Pa-pí-lûn -ông Nî-pò͘-kah-nî-sat tùi chit-tè thó͘-tōe chhiúⁿ-khì Pa-pí-lûn ê Siōng Chú sèng-tiān só͘-ū ê khì-khū, lóng poaⁿ tńg-lâi chit-ê só͘-chāi;

4koh beh kā Iok-ngá-kèng ê kiáⁿ Iû-tāi -ông Iok-ngá-kun kap siū-lia̍h khì Pa-pí-lûn só͘-ū ê Iû-tāi -lâng lóng chhōa--tò-lâi, in-ūi góa beh kòng-tn̄g Pa-pí-lûn -ông ê taⁿ.’ Siōng Chú án-ni soan-pò͘.”

5Sian-ti Iâ-lī-bí chiū tī hiah-ê khiā tī Siōng Chú tiān-lāi ê chè-si kap bîn-chiòng ê bīn-chêng, kā sian-ti Hap-ná-nî-ngá kóng,

6“Amen! Goān Siōng Chú ōe án-ni chòe. Goān Siōng Chú si̍t-hiān lí kóng ê ū-giân, chiong Siōng Chú sèng-tiān ê khì-khū kap só͘-ū siū lia̍h--khì ê lâng, lóng tùi Pa-pí-lûn tòa tò-lâi chit-ê só͘-chāi.

7Taⁿ, lí tio̍h chù-ì thiaⁿ góa beh tùi lí kap bîn-chiòng kóng ê ōe.

8Tùi kó͘-chá í-lâi, lí góa í-chêng ê sian-ti lóng bat tùi chin chōe tōe-khu kap kiông-tāi ê kok-ka ū-giân ōe hoat-seng chiàn-cheng, chai-hō, un-e̍k.

9Hiah-ê ū-giân pêng-an ê sian-ti tio̍h ài kàu in ê ōe si̍t-hiān ê sî, lâng chiah ōe sêng-jīn in chin-chiàⁿ sī Siōng Chú chhe-phài--lâi ê sian-ti.”

10Hap-ná-nî-ngá chiū chiong Iâ-lī-bí ām-kún ê taⁿ the̍h--khí-lâi, kā i kòng-tn̄g.

11I koh tùi só͘-ū ê bîn-chiòng kóng, “Siōng Chú án-ni kóng, ‘Nn̄g nî lāi, Siōng Chú beh chhin-chhiūⁿ án-ni, kā Pa-pí-lûn -ông Nî-pò͘-kah-nî-sat hē tī lia̍t-kok ām-kún ê taⁿ kòng-tn̄g.’” Iâ-lī-bí chiū lī-khui hia.

12Sian-ti Hap-ná-nî-ngá kā sian-ti Iâ-lī-bí ām-kún téng-bīn ê taⁿ kòng-tn̄g liáu-āu, Siōng Chú ê ōe lîm-kàu Iâ-lī-bí, kóng,

13“Lí tio̍h khì kā Hap-ná-nî-ngá kóng, ‘Siōng Chú án-ni kóng: Lí kòng-tn̄g chhâ chòe ê taⁿ, m̄-kú Siōng Chú ōe chòe thih ê taⁿ lâi tāi-thòe.

14In-ūi Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng: Góa beh chiong thih ê taⁿ hē tī lia̍t-kok ê ām-kún, hō͘ in ho̍k-sāi Pa-pí-lûn -ông Nî-pò͘-kah-nî-sat; in it-tēng tio̍h ho̍k-sāi i, in-ūi liân iá-gōa ê tōng-bu̍t góa to kau hō͘ i koán-lí.’”

15Sian-ti Iâ-lī-bí koh kā sian-ti Hap-ná-nî-ngá kóng, “ Hap-ná-nî-ngá, tio̍h chù-ì thiaⁿ! Siōng Chú bô chhe-phài lí, lí kèng-jiân hō͘ chiah-ê jîn-bîn siong-sìn lí ê pe̍h-chha̍t-ōe.

16Só͘-í, Siōng Chú án-ni kóng, ‘Góa beh hō͘ lí lī-khui sè-kan; kin-nî lí it-tēng ōe sí, in-ūi lí siàn-tōng lâng pōe-poān Siōng Chú.’”

17Hit-nî chhit--ge̍h, Hap-ná-nî-ngá chiū sí.

← Chapter 27 Jump to: Chapter 29 →