Jeremiah 16

Chinese TTVR (現代台語譯本羅馬字版)

← Chapter 15 Jump to: Chapter 17 →

1Siōng Chú tùi góa kóng,

2“Lí m̄-thang tī chit-ê só͘-chāi chhōa-bó͘ siⁿ hāu-siⁿ cha-bó͘-kiáⁿ.

3Góa kā lí kóng, tī chit-ê só͘-chāi chhut-sì ê gín-á kap in ê pē-bú

4ōe sí tī tì-miā ê pīⁿ; bô lâng ūi in ai-khàu, mā bô lâng kā in bâi-chòng. In ê sin-si ōe pàng tī thô͘-kha chiâⁿ-chòe pûi-liāu. In nā m̄-sī hō͘ lâng thâi-sí, chiū-sī gō-sí; in ê si-thé chiâⁿ-chòe pe-chiáu kap cháu-siù ê chia̍h-mi̍h.

5“Lí m̄-thang ji̍p song-ka ê chhù, mā m̄-thang ūi in ai-khàu, kā in an-ùi; góa bōe koh sù pêng-an hō͘ góa ê chú-bîn, mā bōe koh lîn-bín in, tùi in si chû-ài.

6Bô-lūn hó-gia̍h á-sī sàn-chhiah lóng siâng-khoán ōe sí tī chia, bô lâng kā in bâi-chòng, ūi in ai-khàu; bô lâng ōe koah-siong ka-kī, thì kng-thâu ūi in ai-siong.

7Bô lâng ōe the̍h chia̍h-mi̍h hō͘ song-ka, ūi-tio̍h in ê ke tú--tio̍h ê sū kā in an-ùi; bô lâng ōe ūi-tio̍h in sit-khì pē-bú hō͘ in lim an-ùi ê chiú.

8“Lí m̄-thang ji̍p-khì iàn-lo̍k ê ke kap in chòe-hé lim-chia̍h.

9Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng: Khòaⁿ leh, góa beh tī lín ê ba̍k-chiu chêng, tī lín iáu oa̍h--teh ê sî, hō͘ hoaⁿ-hí khoài-lo̍k ê siaⁿ, hun-iàn hí-khèng ê siaⁿ lóng tùi chit-ê só͘-chāi siau-sit.

10“Lí kā chiah-ê jîn-bîn kóng chiah-ê it-chhè ê ōe ê sî, in ōe mn̄g lí, ‘Sī-án-chóaⁿ Siōng Chú beh kàng chiah tōa ê chai-hō kong-kek goán? Goán sī hoān-tio̍h sím-mi̍h chōe? Tī sím-mi̍h só͘-chāi tek-chōe Siōng Chú — goán ê Siōng-tè?’

11Lí tio̍h kā in kóng, ‘Lín ê chó͘-sian pōe-poān góa khì tè pa̍t-ê sîn-bêng, kā in ho̍k-sāi kèng-pài. In khì-sak góa, bô chun-siú góa ê lu̍t-hoat.

12Lín pí lín ê chó͘-sian só͘ chòe--ê koh-khah khó-ò͘ⁿ, lín ta̍k-ê lâng chiàu kò͘-chip siâ-ok ê sim chòe tāi-chì, bô beh sūn-thàn góa.

13Só͘-í, góa beh kā lín tùi chit-ê tōe kóaⁿ--chhut-khì, khì kàu lín kap lín ê chó͘-sian lóng m̄-bat ê tōe, mî-ji̍t pài pa̍t-ê sîn-bêng; góa bô beh koh lîn-bín lín.’”

14Siōng Chú kóng, “Sî-ji̍t chi̍t-ē kàu, lâng chiù-chōa ê sî bōe kóng, ‘Góa kí hit-ūi chhōa Í-sek-lia̍t -lâng chhut Ai-ki̍p ê éng-oa̍h Siōng Chú chiù-chōa.’

15In beh kóng, ‘Góa kí hit-ūi chhōa Í-sek-lia̍t -lâng lī-khui pak-hng ê tōe, lī-khui I kā in liû-hòng--khì ê ta̍k-kok hit-ūi éng-oa̍h ê Siōng Chú chiù-chōa.’ In-ūi góa beh kā in chhōa tńg-khì góa sù hō͘ in chó͘-sian ê thó͘-tōe.”

16Siōng Chú kóng, “Góa beh phài chin chōe lia̍h-hî ê lâng khì lia̍h chiah-ê lâng, āu-lâi koh phài chin chōe phah-la̍h ê lâng khì tōa-soaⁿ, sió-soaⁿ, kap chio̍h-phāng lia̍h in.

17In it-chhè ê só͘-chòe góa lóng ū khòaⁿ--kìⁿ, in ê chōe-ok tī góa ê bīn-chêng lóng bōe-tàng ún-môa am-khàm.

18Góa beh ka-pē pò-èng in só͘ hoān it-chhè ê chōe, in-ūi in khì pài hiah-ê khó-ò͘ⁿ, bô sìⁿ-miā ê ngó͘-siōng, phah lâ-sâm góa ê thó͘-tōe, ēng thang iàm-ò͘ⁿ ê ké-sîn that-móa góa ê sán-gia̍p.”

19Siōng Chú ah, lí sī góa ê khùi-la̍t, góa ê pó-lúi, sī góa tú-tio̍h gûi-hiám ê sî ê pī-lān-só͘. Bān-kok ōe tùi thiⁿ-piⁿ-hái-kak lâi kàu lí ê bīn-chêng, kóng, “Goán ê chó͘-sian lâu--lo̍h-lâi--ê sī hu-ké, khang-hu, bô lī-ek ê ngó͘-siōng.

20Lâng kiám ōe-tàng ūi ka-kī chō sîn? Chiah-ê ngó͘-siōng lóng m̄-sī chin Sîn.”

21Siōng Chú kóng, “Chit-piàn góa beh hō͘ in chheng-chhó bat góa ê khùi-la̍t kap koân-lêng, in chiū chai góa ê chheng-ho͘ sī Siōng Chú.”

← Chapter 15 Jump to: Chapter 17 →