Jeremiah 44

Chinese TTVR (現代台語譯本羅馬字版)

← Chapter 43 Jump to: Chapter 45 →

1Ē-bīn sī koan-hē tòa tī Ai-ki̍p ê Bi̍t-toa̍t, Tap-pí-le̍k, Bēng-húi-su, Pa-te̍k-lô tōe-khu só͘-ū ê Iû-tāi -lâng, Siōng Chú tùi sian-ti Iâ-lī-bí kóng ê ōe,

2“Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng, ‘Lín ū khòaⁿ-tio̍h góa kàng hō͘ Iâ-lō͘-sat-léng kap Iû-tāi ta̍k siâⁿ-tìn it-chhè ê chai-hō. Taⁿ chiah-ê siâⁿ-tìn í-keng lóng pha-hng, bô lâng tòa.

3Che sī in-ūi in ū chòe siâ-ok ê sū, jiá góa siū-khì. In khì kā in kap lín, í-ki̍p lín ê chó͘-sian m̄-bat ê sîn-bêng sio-hiuⁿ, ho̍k-sāi in.

4Góa chi̍t-piàn koh chi̍t-piàn chhe-phài góa ê po̍k-jîn chin chōe sian-ti khì kā in kóng: Lín chhian-bān m̄-thang chòe góa iàm-ò͘ⁿ oàn-hūn ê sū.

5M̄-kú in m̄ thiaⁿ, bô beh thiaⁿ-thàn, bô beh pàng-sak in siâ-ok ê hêng-ûi, iû-goân kā pa̍t-ê sîn-bêng sio-hiuⁿ.

6Só͘-í, góa chiong chhin-chhiūⁿ hé teh to̍h ê tōa siū-khì piàⁿ-lo̍h tī Iû-tāi ê siâⁿ-tìn kap Iâ-lō͘-sat-léng ê koe-lō͘; kin-á-ji̍t in chiah ōe hiah-ni̍h hong-hòe chhiⁿ-chhìn.’

7“Siōng Chú — Bān-kun ê Thóng-sòe, Í-sek-lia̍t ê Siōng-tè koh kóng, ‘Lín sī-án-chóaⁿ beh chòe chiah-ni̍h siâ-ok ê sū, hāi lín ka-kī, hō͘ lín ê ta-po͘-lâng, cha-bó͘-lâng, gín-á, chia̍h-lin ê eⁿ-á lóng tùi Iû-tāi siū châu-bia̍t, liân chi̍t ê to bô lâu--teh?

8Lín sī-án-chóaⁿ tô-lān lâi Ai-ki̍p, koh chō ngó͘-siōng, kā pa̍t-ê sîn-bêng sio-hiuⁿ, kek góa siū-khì, tì-kàu lín siū siau-bia̍t, tī sè-kài ta̍k-kok chiâⁿ-chòe lâng chiù-chó͘, bú-jio̍k ê tùi-siōng?

9Lín kiám í-keng bōe-kì-tit lín ê chó͘-sian, Iû-tāi lia̍t-ông kap in ê hō͘-hui, í-ki̍p lín ka-kī kap lín ê bó͘, tī Iû-tāi -tōe, Iâ-lō͘-sat-léng ê koe-lō͘ só͘ chòe siâ-ok ê sū?

10Kàu kin-á-ji̍t, lín iáu bô chhàm-hóe, iáu m̄ kiaⁿ, bô beh chun-hêng góa kā lín í-ki̍p lín ê chó͘-sian tēng ê lu̍t-hoat kap kui-lē.’

11“Só͘-í, Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng, ‘Góa koat-tēng beh kàng chai-hō hō͘ lín, kā choân-pō͘ Iû-tāi -lâng lóng siau-bia̍t.

12Chiah-ê koat-sim lâi Ai-ki̍p kià-ku chhun--lo̍h-lâi ê Iû-tāi -lâng, góa beh kā in siau-bia̍t, hō͘ in lóng sí tī Ai-ki̍p, m̄-sī hō͘ lâng thâi-sí chiū-sī iau-sí; bô-lūn chun-kùi á-sī pi-bî, lóng beh in-ūi chiàn-loān, ki-hng sí--khì, chiâⁿ-chòe lâng kiaⁿ-hiâⁿ, chiù-chó͘, thí-chhiò ê tùi-siōng.

13Góa án-chóaⁿ ēng chiàn-loān, ki-hng, un-e̍k hêng-hoa̍t Iâ-lō͘-sat-léng, mā beh án-ni hêng-hoa̍t tòa tī Ai-ki̍p ê Iû-tāi -lâng,

14hō͘ chiah-ê lâi Ai-ki̍p kià-ku iáu oa̍h--teh ê Iû-tāi -lâng, bōe-tàng tô-thoat tò-khì Iû-tāi -tōe; sui-jiân in chin ài-beh tńg--khì, m̄-kú tû-khì chió-sò͘ ê lâng í-gōa, bô lâng ōe-tàng tô-thoat tńg--khì.’”

15Kui tōa-tīn tòa tī Ai-ki̍p -tōe Pa-te̍k-lô ê Iû-tāi -lâng, chiū-sī hiah-ê chai-iáⁿ ka-kī ê bó͘ ū kā pa̍t-ê sîn-bêng sio-hiuⁿ ê ta-po͘-lâng, kap chāi-tiûⁿ ê hū-jîn-lâng, kā Iâ-lī-bí kóng,

16“Goán bô beh thiaⁿ lí hōng Siōng Chú ê miâ tùi goán kóng ê ōe.

17Goán it-tēng beh chiàu goán hē ê goān khì chòe, kā Thian-hō͘ sio-hiuⁿ, hiàn tiān-chiú-chè, kap goán, í-ki̍p goán ê chó͘-sian, kun-ông, koaⁿ-oân tī Iû-tāi ta̍k-ê siâⁿ-tìn kap Iâ-lō͘-sat-léng ê koe-lō͘ só͘ chòe--ê kâng-khoán, in-ūi hit-chūn goán ê niû-si̍t chhiong-chiok, pêng-an bô-sū.

18M̄-kú goán chi̍t-ē bô kā Thian-hō͘ sio-hiuⁿ, hiàn tiān-chiú-chè, chiū ta̍k-hāng lóng bô, sīm-chì sí tī chiàn-loān kap ki-hng.”

19Hiah-ê hū-jîn-lâng mā kóng, “Goán khak-si̍t ū kā Thian-hō͘ sio-hiuⁿ, hiàn tiān-chiú-chè. Goán chiàu Thian-hō͘ ê hêng-siōng chòe piáⁿ hiàn hō͘ i, kā i hiàn tiān-chiú-chè, goán ê tiōng-hu mā lóng chai.”

20Iâ-lī-bí kā hiah-ê hôe-tap i ê ta-po͘-lâng kap cha-bó͘-lâng kóng,

21“Lín kap lín ê chó͘-sian, lín ê kun-ông kap koaⁿ-oân, í-ki̍p kok-lāi ê jîn-bîn tī Iû-tāi ê siâⁿ-tìn kap Iâ-lō͘-sat-léng ê koe-lō͘ sio-hiuⁿ, Siōng Chú kiám ōe bōe-kì--tit, lóng bô kì tī sim-lāi?

22Lín siâ-ok ê hêng-ûi kap só͘ chòe khó-ò͘ⁿ ê sū, Siōng Chú í-keng bô beh koh thun-lún, só͘-í I hō͘ lín ê thó͘-tōe hong-hòe, bô lâng tòa, chiâⁿ-chòe lâng kiaⁿ-hiâⁿ, chiù-chó͘ ê tùi-siōng, kàu kin-á-ji̍t iáu-sī án-ni.

23Lín kā pa̍t-ê sîn-bêng sio-hiuⁿ, tek-chōe Siōng Chú, bô beh thiaⁿ Siōng Chú ê ōe, bô chun-hêng I ê lu̍t-hoat, kui-lē, kap kà-sī, só͘-í kàu kin-á-ji̍t iáu tú-tio̍h chiah-ê chai-hō.”

24Iâ-lī-bí koh kā choân-pō͘ ê lâng, te̍k-pia̍t sī cha-bó͘-lâng kóng, “Só͘-ū lâi tī Ai-ki̍p ê Iû-tāi -lâng, tio̍h chù-ì thiaⁿ Siōng Chú ê ōe.

25Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng: Lín kap lín ê bó͘ kóng ‘Goán it-tēng beh kā Thian-hō͘ siā-goān, kā i sio-hiuⁿ, hiàn tiān-chiú-chè’, chiū án-ni khì chòe. Taⁿ, chòe lín chiàu lín hē ê goān khì siā-goān.

26Lín só͘-ū tòa tī Ai-ki̍p ê Iû-tāi -lâng, tio̍h thiaⁿ Siōng Chú ê ōe. Góa Siōng Chú kí góa úi-tāi ê miâ li̍p-sè: Tī Ai-ki̍p choân-tōe, bōe koh ū jīm-hô chi̍t ê Iû-tāi -lâng chheng-ho͘ góa ê miâ-hō kóng ‘Góa kí éng-oa̍h Chì-koân ê Siōng Chú chiù-chōa’.

27Lín tio̍h chai, góa ōe liû-sim khòaⁿ in, m̄-sī beh sù hok-khì, sī beh kàng chai-hō hō͘ in, tī Ai-ki̍p ê Iû-tāi -lâng it-tēng ōe sí tī chiàn-loān kap ki-hng, kàu choân-pō͘ siau-bia̍t.

28Sui-jiân ū lâng ōe-tàng thoat-lī chiàn-loān, tùi Ai-ki̍p tò-khì Iû-tāi, m̄-kú sī ke̍k chió-sò͘. Hiah-ê lâi Ai-ki̍p kià-ku chhun--lo̍h-lâi ê Iû-tāi -lâng, āu-lâi ōe chai sī siáⁿ-lâng ê ōe ōe si̍t-hiān, sī góa ê, á-sī in ê.

29Góa beh tī chia kā lín hêng-hoa̍t. Che sī góa hō͘ lín ê tiāu-thâu, hō͘ lín chai góa só͘ kóng beh kā lín kàng chai-hō ê ōe it-tēng ōe si̍t-hiān. Siōng Chú án-ni soan-kò.

30Siōng Chú koh án-ni kóng: Góa beh chiong Ai-ki̍p -ông Hoat-ló Ha̍p-hut-la kau hō͘ siūⁿ-beh thâi i ê tùi-te̍k, chhin-chhiūⁿ góa ū chiong Iû-tāi -ông Se-tí-ka kau hō͘ beh thâi i ê tùi-te̍k, Pa-pí-lûn -ông Nî-pò͘-kah-nî-sat ê chhiú kâng-khoán.”

← Chapter 43 Jump to: Chapter 45 →