Jeremiah 8

Chinese TTVR (現代台語譯本羅馬字版)

← Chapter 7 Jump to: Chapter 9 →

1Siōng Chú kóng: Kàu hit-sî, lâng beh chiong Iû-tāi ê chu-ông, koaⁿ-oân, chè-si, sian-ti, í-ki̍p Iâ-lō͘-sat-léng chū-bîn ê kut-thâu, tùi bōng--ni̍h the̍h--chhut-lâi,

2hiat tī ji̍t-thâu, ge̍h-niû, chhiⁿ-sîn ê ē-bīn; chiah-ê thian-thé sī hiah-ê lâng siⁿ-chêng kah-ì, ho̍k-sāi, kun-tè, pok-kòa, pài-pài--ê. Hiah-ê kut-thâu bô lâng ōe koh kā in khioh-khì tâi, ōe tī thô͘-kha chiâⁿ-chòe pûi-liāu.

3Chit-ê siâ-ok ê bîn-cho̍k chhun--lo̍h-lâi ê lâng, tī góa kā in liû-hòng--khì ê kok-ka bô siūⁿ-beh koh oa̍h--lo̍h-khì, lêng-khó sí. Siōng Chú — Bān-kun ê Thóng-sòe án-ni soan-kò.

4Siōng Chú hoan-hù góa tùi I ê chú-bîn kóng: Lâng poa̍h-tó, kiám bô beh peh--khí-lâi; kiâⁿ m̄-tio̍h lō͘, kiám bô beh oa̍t tò-tńg?

5Lín chiah-ê Iâ-lō͘-sat-léng -lâng, sī-án-chóaⁿ lín chi̍t-ē tùi góa put-tiong chiū it-ti̍t pōe-poān góa? Lín ná kò͘-chip ài khi-phiàn, m̄-khéng hoán-hóe?

6Góa chù-ì kā in thiaⁿ, in lóng bô kóng si̍t-ōe, bô lâng ūi-tio̍h ka-kī só͘ chòe ê pháiⁿ-sū hoán-séng kóng, “Góa ná ōe chòe chit-khoán pháiⁿ tāi-chì?” In ta̍k-ê lâng lóng oat-khì kiâⁿ ka-kī ê lō͘, chhin-chhiūⁿ chiàn-bé chhiong ji̍p-khì chiàn-tiûⁿ.

7Khong-tiong ê ho̍h chai-iáⁿ chiàu kùi-choeh chhian-sóa, pan-kah, ìⁿ-á, kap gān mā chai thang chiàu sî-kan sóa-ūi, góa ê chú-bîn kèng-jiân m̄ bat Siōng Chú ê bēng-lēng!

8Lín ná ōe kóng “Goán sī ū tì-hūi ê lâng; goán ū Siōng Chú ê lu̍t-hoat”? Kî-si̍t lu̍t-hoat-kàu-su í-keng ēng in pe̍h-chha̍t ê bûn-pit oai-khiok lu̍t-hoat ê ì-sù.

9Hiah-ê ū tì-hūi ê lâng ōe tú-tio̍h kiàn-siàu, ōe kiaⁿ-hiâⁿ, ōe siū sím-phòaⁿ. In khì-sak Siōng Chú ê ōe, ná ū sím-mi̍h tì-hūi?

10Só͘-í, góa beh chiong in ê bó͘ hō͘ pa̍t-lâng, in ê chhân-hn̂g hō͘ lâng chiàm--khì. In tùi siōng pi-bî--ê kàu siōng ū koân-sè--ê lóng siàu-siūⁿ put-gī-chi-châi, liân sian-ti kap chè-si to lóng hêng-ûi khúi-chà.

11Góa ê chú-bîn siū-tio̍h siong-hāi, in lóng bô-iàu-bô-kín. In kóng, “Pêng-an bô-sū! Pêng-an bô-sū!” Kî-si̍t lóng bô pêng-an.

12In chòe khó-ò͘ⁿ ê sū, kiám chai kiàn-siàu? In si̍t-chāi ū-kàu bōe-kiàn-siàu! In ōe chhin-chhiūⁿ pa̍t-kok ê lâng hō͘ tùi-te̍k thâi-sí, góa kā in hêng-hoa̍t, in ōe oân-choân húi-bia̍t. Siōng Chú án-ni soan-kò.

13Góa beh hō͘ in lóng bô siu-sêng; phû-tô-chhiū bô siⁿ phû-tô, bû-hoa-kó-chhiū bô kiat bû-hoa-kó, chhiū-hio̍h lóng ta-ta--khì. Góa hō͘ in--ê, lóng bô--khì lah. Siōng Chú án-ni soan-kò.

14Jîn-bîn kóng, “Lán ná iáu chē tī chia? Lán tio̍h sio-chio lâi-khì kian-kò͘ ê siâⁿ, sí tiàm hia! Siōng Chú — lán ê Siōng-tè chù-tiāⁿ beh kā lán siau-bia̍t lah, I beh hō͘ lán lim khó͘-chúi, in-ūi lán ū tek-chōe Siōng Chú.

15Lán kî-thāi hô-pêng hoân-êng, m̄-kú ta̍k-hāng lóng bô sūn-lī; kî-thāi i-tī ê ki-hōe, m̄-kú kiaⁿ-hiâⁿ hut-jiân lâi kàu.

16Chiàn-bé phn̍gh-phn̍gh-háu ê siaⁿ tùi Tān thoân--chhut-lâi; ióng-chòng ê bé hiu-hiu-kiò, tāi-tōe in-ūi in ê siaⁿ tín-tāng. Tùi-te̍k lâi beh húi-bia̍t chit-tè thó͘-tōe kap tōe-chiūⁿ só͘-ū ê it-chhè, thun-bia̍t chiah-ê siâⁿ-tìn kap lāi-bīn ê chū-bîn.”

17Siōng Chú kéng-kò I ê chú-bîn, kóng, “Góa beh phài bōe-tàng ēng hoat-su̍t khòng-chè ê to̍k-chôa khì lín hia kā lín.”

18Góa siong-sim kah bô io̍h thang i; góa ê sim-sîn soe-lám kiông-beh hūn--khì.

19Thiaⁿ! Góa ê tông-pau ai-kiò ê siaⁿ, tùi chin hn̄g ê só͘-chāi thoân--lâi: Siōng Chú kiám bô tī Sek-an? Sek-an ê ông kiám bô tī siâⁿ-lāi? Siōng Chú kóng, “In sī-án-chóaⁿ pài tiau-khek ê ngó͘-siōng, pài gōa-pang hu-bû ê sîn-bêng jiá góa siū-khì?”

20Góa ê tông-pau kóng, “Siu-sêng í-keng kè, joa̍h-thiⁿ í-keng kiat-sok, m̄-kú goán iáu-bē tit-tio̍h kái-kiù.”

21Góa in-ūi tông-pau siū húi-bia̍t sim chhùi--khì; góa hui-siông pi-siong, kiaⁿ-hiâⁿ sit-sîn.

22Ki-lia̍t kiám bô jú-hiuⁿ? Hia kiám bô i-seng? Góa ê tông-pau ná iáu-bē tit-tio̍h i-tī?

← Chapter 7 Jump to: Chapter 9 →