Jeremiah 48 — Chinese TTVR (現代台語譯本羅馬字版)

1Koan-hē Mô͘-ap, Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng, “ Nî-pho chhám ah, i ōe hong-hòe; Ki-lia̍t-têng siū bú-jio̍k, hō͘ lâng chiàm-léng, i ê pó-lúi siū húi-hoāi, chū-bîn siū lêng-jio̍k.

2Mô͘-ap bōe koh ū chhàn-lān ê êng-kng; ū lâng tī Hi-si̍t-pún siat-kè beh hāi Mô͘-ap, kóng, ‘Lâi, lán lâi kā siau-bia̍t, hō͘ i bōe-tàng chiâⁿ-chòe chi̍t kok.’ Má-tek-bián -siâⁿ ah, tio̍h tiām-tiām, m̄-thang chhut-siaⁿ; ū kun-tūi beh lâi kong-kek lí.

3Tùi Hô-lô-liām thoân-chhut ai-khàu ê siaⁿ, ‘Hong-hòe lah, lóng-chóng húi-bia̍t lah!’

4“ Mô͘-ap siū húi-bia̍t, tī hia thoân-chhut gín-á teh háu ê siaⁿ.

5Lâng peh Ló͘-hi ê soaⁿ-phiâⁿ, ná peh ná khàu; in lo̍h Hô-lô-liām ê soaⁿ-phiâⁿ, thiaⁿ-tio̍h húi-bia̍t ai-khàu ê siaⁿ,

6‘Tio̍h tô-cháu, sûi-lâng kò͘ sìⁿ-miā, chhin-chhiūⁿ khòng-iá ê iá-lû.’

7“ Mô͘-ap ah, lí khò ka-kī ê kun-le̍k kap châi-hù, m̄-kú kâng-khoán ōe siū cheng-ho̍k. Lí ê sîn-bêng Ki-boat kap i ê chè-si, í-ki̍p koaⁿ-oân, lóng ōe siū liû-hòng, chòe-chi̍t-ē siū chhian-sóa.

8Lín ta̍k-ê siâⁿ lóng ōe siū húi-bia̍t, bô chi̍t ê siâⁿ ōe-tàng pī-bián; soaⁿ-kok siū húi-hoāi, pêng-goân siū thún-ta̍h. Siōng Chú án-ni soan-pò͘.

9“Tio̍h kā Mô͘-ap tàu nn̄g ki si̍t, hō͘ i thang pe-cháu; i ê siâⁿ-tìn ōe pha-hng, bô lâng khiā-khí.”

10Pîn-tōaⁿ m̄ chòe Siōng Chú ê kang--ê, ōe siū chiù-chó͘; m̄ gia̍h ka-kī ê to khì thâi te̍k-jîn--ê, ōe siū chiù-chó͘.

11Mô͘-ap tùi khai-kok í-lâi chiū chin thài-pêng, m̄-bat siū hòng-tio̍k; i chhin-chhiūⁿ hong-ba̍t tī chiú-àng lāi ê chiú, m̄-bat hō͘ lâng tò-lâi tò-khì, só͘-í chu-bī goân-chāi, khì-bī bô piàn.

12Siōng Chú kóng, “Khòaⁿ leh, sî-ji̍t chi̍t-ē kàu, góa beh phài lâng kā Mô͘-ap tò hìⁿ-sak, chhin-chhiūⁿ kā chiú tò-tiāu kâng-khoán. In ōe kā chiú tò kah khang-khang-khang, koh kā chiú-àng siak-phòa.

13Mô͘-ap ōe in-ūi i ê sîn-bêng Ki-boat kiàn-siàu, chhin-chhiūⁿ Í-sek-lia̍t -lâng ūi-tio̍h in só͘ óa-khò Pek-te̍k-lī ê sîn-bêng kiàn-siàu kâng-khoán.

14Mô͘-ap ah, lí ná ōe-tàng chū-chheng sī eng-hiông, sī gâu sio-chiàn ê ióng-sū?

15Mô͘-ap ōe siū húi-hoāi, tùi-te̍k chiàm-léng i ê siâⁿ-tìn; te̍k-soán ê chòng-teng lóng siū thâi-sí. Mô͘-ap ê chiong-kio̍k pek-kūn lah, i ê chai-lān ōe kín-kín kàu.” Tōa-kun-ông, Siōng Chú — Bān-kun ê Thóng-sòe án-ni soan-pò͘.

17“ Mô͘-ap chiu-ûi ê kok-ka, jīn-bat i ê bîn-cho̍k ah, lín lóng tio̍h ūi Mô͘-ap pi-siong, kóng, ‘I ê tōa koân-sè pang--khì, i ê êng-kng bô--khì lah!’

18Tí-pún ê chū-bîn ah, tio̍h tùi lí êng-kng ê chō-ūi lo̍h--lâi, chē tī ta-sò ê thô͘-kha; in-ūi húi-bia̍t Mô͘-ap --ê í-keng kàu, i beh thiah-húi lí ê pó-lúi.

19A-lô-ní ê chū-bîn ah, tio̍h khiā tī lō͘-piⁿ khòaⁿ, mn̄g hiah-ê tô-lān ê lâm-lú, kóng, ‘Tàu-tóe hoat-seng sím-mi̍h tāi-chì?’

20In ōe ìn kóng, ‘ Mô͘-ap lûn-hām lah!’ Lín tio̍h ūi i ai-siong thî-khàu; tio̍h tī A-lūn-hô soan-pò͘, kóng, ‘ Mô͘-ap bia̍t-bông lah!’

21“Sím-phòaⁿ í-keng lîm-kàu pêng-goân ta̍k só͘-chāi, chiū-sī Mô͘-ap bô-lūn hn̄g á-sī kūn só͘-ū ê siâⁿ-tìn, kàu tī Hô-lûn, Ngá-cha̍p, Bí-hoat-ap, Tí-pún, Nî-pho, Pek Te-pí-la-thài-im, Ki-lia̍t-têng, Pek Ka-boa̍t, Pek Bí-un, Ka-lio̍k, Pho-su-la.

25Mô͘-ap ê koân-sè bô--khì, kun-le̍k choân-sit lah!” Siōng Chú án-ni soan-pò͘.

26Siōng Chú kóng, “Lín tio̍h kā Mô͘-ap koàn hō͘ chùi; in-ūi i chū-ko, pōe-ge̍k góa; i ōe tī ka-kī thò͘--chhut-lâi ê lah-sap-mi̍h tiong-kan kō-lâi-kō-khì, hō͘ lâng thí-chhiò.

27Mô͘-ap ah, lí kiám m̄-sī bat thí-chhiò Í-sek-lia̍t? Lí ta̍k-piàn kóng-tio̍h Í-sek-lia̍t, kiám m̄-sī iô-thâu, kā i tòng-chòe hō͘ lâng lia̍h--tio̍h ê chha̍t-á?

28Mô͘-ap -lâng ah, tio̍h tô-cháu lī-khui siâⁿ-tìn, khì tòa tī soaⁿ-giâm, chhin-chhiūⁿ hún-chiáu tī ài-kháu choh-siū.

29Iû-tāi ê jîn-bîn kóng, ‘Thiaⁿ-kóng Mô͘-ap -lâng hui-siông kiau-ngō͘, chū-ko chū-tāi, kiau-ngō͘ kàu-ke̍k; ka-kī lia̍h-chòe liáu-put-khí.’

30Góa chai in ê chū-tāi sī khang-hu, só͘ khoa-kháu--ê lóng sī phòng-hong.” Siōng Chú án-ni soan-pò͘.

31Só͘-í, góa ūi-tio̍h Mô͘-ap thî-khàu, ūi-tio̍h Mô͘-ap choân-kok thî-khàu; lâng mā beh ūi-tio̍h Kiat-ní Hap-lia̍t-siat ê lâng ai-siong.

32Se-pí-má, góa ūi-tio̍h lí ai-khàu, pí ūi Ngá-siā khàu koh-khah tōa-siaⁿ. Lí chhin-chhiūⁿ phû-tô-chhiū, ki chhun-kè tōa-hái, soan kàu Ngá-siā ê hái. M̄-kú húi-bia̍t-chiá lâi lah, beh chiong lí teh-beh siu-sêng ê ké-chí kap phû-tô lóng húi-tiāu.

33Siōng Chú kóng, “ Mô͘-ap pûi ê chhân-hn̂g siau-sit, bô koh ū hoaⁿ-hí khoài-lo̍k ê siaⁿ! Góa hō͘ chiú-khut bô koh chhut chiú, bô lâng tī hia ta̍h chiú chhut hoaⁿ-hí ê siaⁿ; sui-jiân ū hoah ê siaⁿ, m̄-kú m̄-sī hoaⁿ-hí ê siaⁿ.”

34Hi-si̍t-pún -lâng ai-khàu ê siaⁿ thoân kàu Í-lī-a-lī, thàng kàu Ngá-cha̍p; koh tùi Só-ní it-ti̍t thoân kàu Hô-lô-liām, ti̍t-kàu I-ki-la Si-lī-si-a, in-ūi liân Lêng-lîm ê khoe-chúi to ta-ta--khì.

35Siōng Chú kóng, “Hiah-ê tī Mô͘-ap ê soaⁿ-thâu-tôaⁿ hiàn-chè, ǹg in ê sîn-bêng sio-hiuⁿ ê lâng, góa lóng beh kā in siau-bia̍t.”

36Só͘-í, góa ê sim ūi-tio̍h Mô͘-ap pi-siong, góa ê sim-tn̂g ūi-tio̍h Kiat-ní Hap-lia̍t-siat ai-siong, chhin-chhiūⁿ phín-á ai-oàn ê siaⁿ. In só͘ chek-chū ê châi-bu̍t lóng sit--khì lah.

37In ta̍k-ê lâng thì kng-thâu, chián chhùi-chhiu, koah-siong chhiú-kut, io hâ môa-pò͘.

38Siōng Chú kóng, “ Mô͘-ap ta̍k-keng chhù ê chhù-téng kap kóng-tiûⁿ lóng ū thî-khàu ê siaⁿ; in-ūi góa húi-hoāi Mô͘-ap, chhin-chhiūⁿ lâng kòng-chhùi bô kah-ì ê khì-khū.

39Lín tio̍h tōa-siaⁿ thî-khàu! Mô͘-ap oân-choân húi-bia̍t lah! In kiàn-siàu bô bīn thang kìⁿ-lâng, chiâⁿ-chòe sì-chiu-ûi ê kok-ka thí-chhiò hō͘ lâng tio̍h-kiaⁿ ê tùi-siōng.”

40Siōng Chú kóng, “Khòaⁿ leh, ū chi̍t ê kok-ka chhin-chhiūⁿ eng-chiáu thí-khui i ê si̍t, chhiong lo̍h-lâi kong-kek Mô͘-ap.

41Mô͘-ap ê siâⁿ-tìn kap pó-lúi lóng hō͘ i chiàm--khì. Hit-sî, Mô͘-ap chiàn-sū ê sim ōe chhin-chhiūⁿ chhui-chūn ê hū-jîn-lâng hiah-ni̍h thàng-thiàⁿ.

42Mô͘-ap siū húi-bia̍t, bô koh chiâⁿ-chòe chi̍t ê kok-ka; in-ūi in chū-ko chū-tāi, pōe-poān góa Siōng Chú.

43Mô͘-ap ê chū-bîn ah, khióng-pò͘, hām-khiⁿ, oa̍h-tauh teh tng-tán lín.” Siōng Chú án-ni soan-pò͘.

44“Siám-pī khióng-pò͘ ê lâng ōe poa̍h-lo̍h hām-khiⁿ; tùi hām-khiⁿ tô-thoat ê lâng ōe hō͘ oa̍h-tauh tauh--tio̍h, in-ūi hêng-hoa̍t Mô͘-ap ê nî í-keng tiāⁿ-tio̍h.” Siōng Chú án-ni soan-pò͘.

45“Hiah-ê tô-lān khì Hi-si̍t-pún chhē-kiû pó-hō͘--ê, in ê khùi-la̍t í-keng ēng-chīn; m̄-kú, ū hé tùi Hi-si̍t-pún hoat, ū hé-iām tùi Se-hông ê siâⁿ chhut, sio-chīn Mô͘-ap -lâng ê thâu-hia̍h, kap ài sio-thâi ê lâng ê thâu-khak.

46Mô͘-ap ah, lí ū chai-hō lah! Pài Ki-boat sîn-bêng ê lâng ah, lín bia̍t-bông lah! Lín ê hāu-siⁿ hō͘ lâng lia̍h--khì, lín ê cha-bó͘-kiáⁿ mā chòe-hé siū-lia̍h.

47M̄-kú Siōng Chú mā ū kóng: Chiong-lâi góa ōe hō͘ Mô͘-ap siū-lia̍h ê lâng tò-tńg--lâi.” Iú-koan Mô͘-ap siū sím-phòaⁿ ê ōe, kàu chia ûi-chí.