Jeremiah 50 — Chinese TTVR (現代台語譯本羅馬字版)

1Ē-bīn sī koan-hē Pa-pí-lûn kap Pa-pí-lûn -lâng ê tōe, Siōng Chú thong-kè sian-ti Iâ-lī-bí só͘ kóng ê ōe.

2“Tio̍h tī lia̍t-pang thoân-pò, ǹg in soan-kò; tio̍h chhāi tōa-kî, ǹg lia̍t-pang soan-kò. M̄-thang ún-môa, tio̍h kóng, Pa-pí-lûn teh-beh lûn-hām lah! I ê sîn-bêng Pí-le̍k ōe chin kiàn-siàu, Má-tō͘-khek tio̍h-chhiⁿ-kiaⁿ; i ê sîn-siōng lóng chin kiàn-siàu, i ê ngó͘-siōng lóng tio̍h-chhiⁿ-kiaⁿ.”

3In-ūi tùi pak-hng ū chi̍t kok beh lâi kong-kek Pa-pí-lûn, beh hō͘ i ê tōe pha-hng, bô lâng koh tī hia khiā-khí; liân cheng-siⁿ mā cháu-liáu-liáu.

4Siōng Chú kóng, “Sî nā kàu, Í-sek-lia̍t -lâng kap Iû-tāi -lâng beh chòe-hé, ná kiâⁿ ná háu, lâi chhē Siōng Chú — in ê Siōng-tè.

5In lóng bīn ǹg Sek-an, teh mn̄g beh khì hia ê lō͘. In beh lâi kap Siōng Chú li̍p éng-oán ê iok, kap I kiat-liân.

6“Góa ê chú-bîn pìⁿ-chòe sit-bê ê iûⁿ; in ê bo̍k-chiá chhōa in kiâⁿ bê-lō͘, hō͘ in oat ji̍p-khì soaⁿ-lāi. In tùi tōa-soaⁿ kiâⁿ kàu sió-soaⁿ, chhē bô ka-kī ê iûⁿ-tiâu.

7Tú-tio̍h in--ê beh kā in thun-chia̍h; in ê tùi-te̍k kóng, ‘Goán án-ni chòe bô chōe. Che sī in-ūi in tek-chōe Siōng Chú, chiū-sī in chin-chiàⁿ thang an-hioh ê só͘-chāi, mā-sī in lia̍t-chó͘ só͘ ǹg-bāng ê Siōng Chú.’

8“Tio̍h lī-khui Pa-pí-lûn, tô-cháu thoat-chhut Pa-pí-lûn -lâng ê tōe, chhin-chhiūⁿ soaⁿ-iûⁿ-káng cháu tī iûⁿ-kûn ê thâu-chêng lī-khui.

9Góa beh hoat-tōng pak-hng tōa-kok ê liân-bêng chòe-hé lâi kong-kek Pa-pí-lûn. In beh pâi-tīn chìn-kong, kā Pa-pí-lûn -siâⁿ kong-phòa. In ê chìⁿ chhin-chhiūⁿ gâu siā-chìⁿ ê lâng só͘ siā ê chìⁿ, ta̍k-ki to siā-tio̍h bo̍k-phiau.

10Pa-pí-lûn ōe hō͘ lâng chhiúⁿ, chhiúⁿ-lia̍h i--ê lóng chhiúⁿ kah sim-móa-ì-chiok.” Siōng Chú án-ni soan-pò͘.

11Siōng Chú kóng, “ Pa-pí-lûn -lâng ah, lín chhiúⁿ góa ê sán-gia̍p, hoaⁿ-hí khoài-lo̍k, koh thiàu-lâi-thiàu-khì, chhin-chhiūⁿ teh lún ngó͘-kok ê gû-bú, chhin-chhiūⁿ ióng-béng ê bé tōa-siaⁿ háu;

12lín ê lāu-bú ōe hui-siông kiàn-siàu, siⁿ lín--ê ōe kám-kak làu-khùi; khòaⁿ leh, Pa-pí-lûn ōe pìⁿ-chòe siōng jio̍k-siáu ê kok-ka, pìⁿ-chòe ta-sò bô-chúi ê khòng-iá.

13In-ūi Siōng Chú hoat tōa siū-khì, Pa-pí-lûn it-tēng bô lâng khiā-khí, beh oân-choân pha-hng; tùi hia keng-kè--ê lóng ōe tio̍h-kiaⁿ, koh in-ūi in só͘ tú--tio̍h ê chai-hō kā in thí-chhiò.

14“Siā-chìⁿ ê peng ah, tio̍h pâi-tīn pau-ûi Pa-pí-lûn -siâⁿ; tio̍h ǹg i siā-chìⁿ, m̄-bián pó-sioh lín ê chìⁿ, in-ūi Pa-pí-lûn tek-chōe Siōng Chú.

15Lín tio̍h tī Pa-pí-lûn sì-ûi hoah-hiàm, ‘ Pa-pí-lûn í-keng tâu-hâng lah! I ê pó-lúi tó-hoāi, i ê siâⁿ-chhiûⁿ siū thiah-húi lah!’ Che sī Siōng Chú teh pò-siû, lín mā tio̍h tùi i pò-siû; i án-chóaⁿ tùi-thāi lâng, lín mā tio̍h án-ni tùi-thāi i.

16Iā-chéng--ê kap gia̍h liâm-le̍k-á siu-koah--ê, tio̍h lóng kā in tùi Pa-pí-lûn siau-bia̍t. Ūi-tio̍h beh siám-pī lâi chhim-hoān ê kun-tūi, siâⁿ-lāi só͘-ū kià-ku--ê lóng tò-khì pún-cho̍k, cháu tńg-khì ka-kī ê kò͘-hiong.”

17Í-sek-lia̍t sī hō͘ sai kóaⁿ-sòaⁿ ê iûⁿ; tāi-seng hō͘ A-su̍t -ông thun-chia̍h, āu-lâi hō͘ Pa-pí-lûn -ông Nî-pò͘-kah-nî-sat at-tn̄g kut-thâu.

18Só͘-í Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng, “Khòaⁿ leh, góa beh hêng-hoa̍t Pa-pí-lûn -ông kap i ê kok, chhin-chhiūⁿ góa hêng-hoa̍t A-su̍t -ông kâng-khoán.

19Góa beh chhōa Í-sek-lia̍t tò-tńg-lâi in ka-kī ê chháu-po͘; in beh tī Ka-bi̍t kap Pa-san chia̍h-chháu, koh tī Í-hoat-liân soaⁿ-khu kap Ki-lia̍t tōe-khu hióng-siū hia só͘ chhut-sán ê ngó͘-kok.

20Tī hit-ji̍t, tī hit-sî, Í-sek-lia̍t ê chōe-kò chhâ lóng bô, Iû-tāi ê chōe-ok mā chhē bô; in-ūi góa beh sià-bián góa lâu--lo̍h-lâi ê chú-bîn.” Siōng Chú án-ni soan-pò͘.

21Siōng Chú kóng, “Tio̍h chiūⁿ-khì kong-kek Bí-la-tāi-ong ê tōe kap Pí-kat ê chū-bîn; tio̍h kā in choân-pō͘ siau-bia̍t, chiàu góa só͘ hoan-hù ê it-chhè khì chòe.

22Pa-pí-lûn kéng-lāi ū kau-chiàn ê siaⁿ, koh ū tōa húi-bia̍t.

23Phah choân-tōe ê tōa-ki thûi Pa-pí-lûn, í-keng húi-hoāi tn̄g--khì lah! Lia̍t-kok khòaⁿ--tio̍h lóng tio̍h-kiaⁿ!

24Pa-pí-lûn ah, lí tùi-khòng góa Siōng Chú, só͘-í góa kā lí siat oa̍h-tauh, lí hō͘ i tauh--tio̍h kèng-jiân m̄ chai; lí hō͘ lâng chhē--tio̍h, lia̍h--tio̍h.”

25Siōng Chú í-keng khui bú-khì-khò͘, tī siū-khì tiong gia̍h-chhut I ê bú-khì; Chì-koân Siōng Chú — Bān-kun ê Thóng-sòe beh tùi-hù Pa-pí-lûn.

26Lín tio̍h tùi ta̍k-ê hong-hiòng chìn-kong; khui i ê chhek-chhng, kā chiàn-lī-phín thia̍p chòe-tui, chhin-chhiūⁿ thia̍p ngó͘-kok; choân-pō͘ húi-bia̍t, bô lâu pòaⁿ-hāng.

27Tio̍h thâi in só͘-ū ê chiàn-sū, kā in lóng-chóng siau-bia̍t. Pa-pí-lûn chhám ah! In siū hêng-hoa̍t ê ji̍t kàu lah!

28Tùi Pa-pí-lûn tô-cháu--chhut-lâi ê lān-bîn kóng, “Siōng Chú — lán ê Siōng-tè tī Sek-an teh pò-siû, in-ūi Pa-pí-lûn -lâng húi-hoāi I ê sèng-tiān.”

29“Tio̍h chio-chi̍p siā-chìⁿ ê peng kong-táⁿ Pa-pí-lûn, tī i ê sì-chiu-ûi chat-iâⁿ, liân chi̍t ê to m̄-thang hō͘ i cháu--khì. Tio̍h chiàu i ê só͘-chòe kā i pò-ho̍k; i án-chóaⁿ tùi-thāi lâng, lín mā tio̍h án-ni tùi-thāi i, in-ūi i kiau-ngō͘ pōe-ge̍k Siōng Chú — Í-sek-lia̍t sîn-sèng ê Siōng-tè.

30In ê siàu-liân-lâng ōe tī kóng-tiûⁿ hō͘ lâng thâi-sí; kâng hit-ji̍t, in ê chiàn-sū ōe hō͘ lâng châu-bia̍t.” Siōng Chú án-ni soan-pò͘.

31Chì-koân Siōng Chú — Bān-kun ê Thóng-sòe án-ni kóng, “Kiau-ngō͘ ê lâng, lí khòaⁿ, góa beh kong-kek lí, góa tùi-hù lí ê sî-ji̍t í-keng kàu.

32Kiau-ngō͘ ê lâng ōe poa̍h-tó, bô lâng kā i hû--khí-lâi; góa beh tiám-hé sio i hiah-ê siâⁿ-tìn, chiong i sì-ûi só͘-ū--ê choân-pō͘ sio-húi.”

33Siōng Chú — Bān-kun ê Thóng-sòe án-ni kóng, “ Í-sek-lia̍t -lâng kap Iû-tāi -lâng lóng siū khi-ap; hiah-ê lia̍h in khì--ê kā in lia̍h-tiâu-tiâu, m̄-khéng pàng in cháu.

34Kiù-sio̍k in--ê sī Siōng Chú — Bān-kun ê Thóng-sòe, góa ū tōa khùi-la̍t, beh thòe in sin-oan, hō͘ choân-tōe tit-tio̍h an-hioh, m̄-kú góa ōe hō͘ Pa-pí-lûn ê chū-bîn tōa kiaⁿ-hiâⁿ.

35To-kiàm ōe lâi kong-kek Pa-pí-lûn -lâng, kong-kek Pa-pí-lûn ê chū-bîn, kap in ê koaⁿ-oân, í-ki̍p ū tì-hūi ê lâng. Siōng Chú án-ni soan-pò͘.

36To-kiàm ōe lâi kong-kek su̍t-sū, in ōe pìⁿ-chòe gû-gōng; to-kiàm kong-kek Pa-pí-lûn ê ióng-sū, in chiū kiaⁿ-hiâⁿ.

37To-kiàm ōe lâi kong-kek i ê chiàn-bé chiàn-chhia, í-ki̍p só͘-ū tòa tī in tiong-kan ê gōa-cho̍k-lâng; in ōe chhin-chhiūⁿ hū-jîn-lâng hiah-ni̍h nńg-chiáⁿ; to-kiàm ōe lâi kong-kek i ê châi-bu̍t, in chiū siū chhiúⁿ-toa̍t.

38I ê hô-liû in-ūi khòng-hān ta-khok-khok; i sī pài ngó͘-siōng ê kok-ka, khióng-pò͘ ê sîn-bêng hō͘ lâng tian-kông.

39“Só͘-í, khòng-iá ê cháu-siù kap chhâi-lông beh tòa tī hia; tô-chiáu mā beh tī hia chhut-ji̍p; m̄-kú hia bô lâng tòa, éng-oán bô lâng tī hia khiā-khí.

40Tú chhin-chhiūⁿ Só͘-to-má, Gô-mô͘-la, í-ki̍p in hù-kūn ê siâⁿ-tìn siū Siōng-tè húi-bia̍t, Pa-pí-lûn bōe koh ū lâng tòa, mā bōe koh ū lâng tī hia kià-ku. Góa Siōng Chú án-ni soan-pò͘.

41Khòaⁿ leh, ū chi̍t ê bîn-cho̍k beh tùi pak-hng lâi; ū chi̍t ê kiông ê kok-ka kap chin chōe kun-ông tùi chin hn̄g ê só͘-chāi chún-pī beh chhut-cheng.

42In gia̍h keng gia̍h chhiuⁿ, chân-jím bô-chêng; in ê siaⁿ chhin-chhiūⁿ hái-éng hōa-hōa-háu. Pa-pí-lûn -lâng ah, in khiâ chiàn-bé, thoân-kiat tâng-sim, pâi-tīn beh kong-kek lí.

43Pa-pí-lûn -ông thiaⁿ-tio̍h chit-ê siau-sit, chhiú lóng nńg--lo̍h-khì; i hui-siông thòng-khó͘, chhin-chhiūⁿ sán-hū teh chhui-chūn.

44“Góa beh chhin-chhiūⁿ sai tùi Iok-tàn hô-piⁿ ê chhiū-nâ chhut--lâi, khì kong-kek chhiⁿ-chhùi chháu-po͘ ê iûⁿ-kûn, chin kín kā in kóaⁿ-cháu, lī-khui in ê kok-thó͘. Góa kéng-soán sím-mi̍h-lâng, chiū phài i thóng-tī chit-ê kok-ka. Siáⁿ-lâng ōe-tàng kap góa pí? Siáⁿ-lâng káⁿ thoân góa chhut-têng? Tó chit-ê thóng-tī-chiá káⁿ tùi-khòng góa?

45Lín tio̍h thiaⁿ Siōng Chú kong-kek Pa-pí-lûn kap i ê chū-bîn ê kè-ōe; in liân siōng jio̍k-siáu--ê to ōe hō͘ lâng thoa--khì. Góa it-tēng ōe hō͘ in khiā-khí ê só͘-chāi hong-hòe.

46Pa-pí-lûn tó-hoāi ê siaⁿ hō͘ tōe tōa tín-tāng; lâng ai-khàu ê siaⁿ thàng kàu lia̍t-pang.”