Jeremiah 20

Chinese TTVR (現代台語譯本羅馬字版)

← Chapter 19 Jump to: Chapter 21 →

1Siōng Chú sèng-tiān ê chóng-koán, Im-be̍k ê kiáⁿ chè-si Pa-si-hō͘-ní thiaⁿ-tio̍h sian-ti Iâ-lī-bí kóng ê ōe,

2chiū phah i, koh ēng chhâ-kông kā i khàu tī sèng-tiān pak-pêng ê Piān-ngá-bín-mn̂g.

3Tē-jī ji̍t, Pa-si-hō͘-ní chiah chiong sian-ti Iâ-lī-bí pàng-khui. Iâ-lī-bí tùi i kóng, “Siōng Chú bô beh koh kiò lí chòe Pa-si-hō͘-ní, beh kā lí kiò-chòe Má-ko-ní Bí-sat-pit.

4Siōng Chú kóng, ‘Góa beh hō͘ lí kap lí ê pêng-iú lóng tio̍h-kiaⁿ; lí beh chhin-ba̍k khòaⁿ-tio̍h in hō͘ tùi-te̍k thâi-sí. Góa beh chiong Iû-tāi -lâng kau tī Pa-pí-lûn -ông ê chhiú; i beh kā in lia̍h-khì Pa-pí-lûn, á-sī ēng to kā in thâi-sí.

5Góa mā beh chiong chit-ê siâⁿ só͘-ū ê châi-bu̍t, chiū-sī lín lô-khó͘ tit--tio̍h-ê kap pó-kùi ê mi̍h-kiāⁿ, í-ki̍p Iû-tāi lia̍t-ông ê pó-pòe, lóng kau hō͘ tùi-te̍k; in beh chiong só͘-ū ê it-chhè lóng chhiúⁿ--khì, tòa-khì Pa-pí-lûn.

6Pa-si-hō͘-ní, lí kap lí ke-lāi só͘-ū ê lâng lóng ōe siū-lia̍h khì Pa-pí-lûn; lí kap só͘-ū thiaⁿ lí kóng ké ū-giân ê pêng-iú, lóng ōe sí tī hia, tâi tī hia.’”

7Siōng Chú ah, lí phiàn góa, góa hō͘ lí pián--khì. Lí pí góa khah kiông, iâⁿ-kè góa. Góa ta̍k-ji̍t chiâⁿ-chòe lâng thí-chhiò ê tùi-siōng; in lóng hì-lāng góa.

8Góa ta̍k-piàn kóng-ōe lóng chin tōa-siaⁿ; góa hoah kóng, “Ū kiông-pō kap húi-bia̍t!” Siōng Chú ê ōe hāi góa ta̍k-ji̍t hō͘ lâng lóe-mē, thí-chhiò.

9Góa nā kóng “Góa bô beh koh thê-khí Siōng Chú, bô beh koh hōng I ê miâ kóng-ōe”, góa ê lāi-bīn chiū chhin-chhiūⁿ ū hé teh to̍h, chǹg-ji̍p góa ê kut-thâu; góa tòng bōe tiâu, bô hoat-tō͘ bô kóng.

10Góa koh thiaⁿ-kìⁿ chin chōe lâng sòe-siaⁿ kóng, “Hit-ê kóng ‘Ta̍k só͘-chāi ōe ū kiaⁿ-hiâⁿ’ ê lâng lâi lah, lán lâi kò i, lâi kā i khòng-kò.” Góa ê pêng-iú tán beh khòaⁿ góa hoān-chhò, in kóng: Tán i hō͘ lâng pián--khì, lán chiū ōe-tàng lia̍h-tio̍h ki-hōe kā i pò-ho̍k.

11Chóng-sī, Siōng Chú kap góa tông-chāi; I chhin-chhiūⁿ kiông-béng khó-phàⁿ ê ióng-sū. Hiah-ê ap-pek góa ê lâng lóng ōe poa̍h-tó sit-pāi, ōe kiàn-siàu làu-khùi; lâng éng-oán bōe bōe-kì-tit in ê kiàn-siàu.

12Siōng Chú — Bān-kun ê Thóng-sòe ah, lí kàm-chhat lâng ê sim-su liām-thâu, chiàu kong-gī sím-phòaⁿ. Góa chiong góa ê àn-kiāⁿ kau hō͘ lí, kiû lí hō͘ góa khòaⁿ-tio̍h lí chú-chhî kong-tō.

13Tio̍h ǹg Siōng Chú chhiùⁿ-koa! Tio̍h chheng-chàn Siōng Chú! In-ūi I kái-kiù siū ap-pek ê lâng thoat-lī siâ-ok ê lâng ê chhiú.

14Goān góa chhut-sì hit-ji̍t siū chiù-chó͘; goān góa ê lāu-bú siⁿ góa hit-ji̍t bô siū chiok-hok.

15Goān hit-ê kā góa ê lāu-pē pò siau-sit ê lâng siū chiù-chó͘! I kóng “Lí tit-tio̍h chi̍t ê ta-po͘-eⁿ”, hō͘ góa ê lāu-pē thiaⁿ-liáu chin hoaⁿ-hí.

16Goān hit-ê lâng chhin-chhiūⁿ hō͘ Siōng Chú húi-bia̍t, bô tit-tio̍h lîn-bín ê siâⁿ. Goān i chá-khí-sî thiaⁿ-tio̍h ai-khàu ê siaⁿ, tiong-tàu-sî thiaⁿ-tio̍h chiàn-cheng kéng-pò ê siaⁿ.

17In-ūi i bô tī góa chhut-sì í-chêng kā góa thâi-sí, bô hō͘ góa ê lāu-bú ê pak-tó͘ chiâⁿ-chòe góa ê hûn-bōng.

18Góa sī-án-chóaⁿ tio̍h chhut-sì? Góa ê keng-le̍k lóng sī lô-khó͘ kap iu-siong. Góa tio̍h tī siū bú-jio̍k ê tiong-kan kiat-sok góa ê jîn-seng sī--bô?

← Chapter 19 Jump to: Chapter 21 →