Jeremiah 2

Chinese TTVR (現代台語譯本羅馬字版)

← Chapter 1 Jump to: Chapter 3 →

1Siōng Chú ê ōe lîm-kàu góa, kóng,

2“Tio̍h tùi Iâ-lō͘-sat-léng -lâng tōa-siaⁿ hoah kóng, ‘Siōng Chú án-ni kóng: Góa ōe-kì-tit lí siàu-liân ê sî ê ài-chêng, sin-hun ê sî ê un-ài; tī khòng-iá, tī m̄-bat chèng-choh ê tōe, lí kā góa tè-tiâu-tiâu.

3Í-sek-lia̍t sī Siōng Chú sèng ê chú-bîn, sī Siōng Chú chho͘-se̍k ê ké-chí; só͘-ū thun-chia̍h i--ê lóng ū chōe, chai-hō ōe lîm-kàu in. Siōng Chú án-ni soan-pò͘!’”

4Ngá-kok ê hō͘-tāi, Í-sek-lia̍t ta̍k chi-cho̍k, tio̍h thiaⁿ Siōng Chú ê ōe.

5Siōng Chú án-ni kóng: Lín ê chó͘-sian kiám bat hoat-kiàn góa ū sím-mi̍h m̄-tio̍h, kèng-jiân lī-khui góa hn̄g-hn̄g, khì kun-tè hu-bû ê sîn-bêng, ka-kī soah chiâⁿ-chòe hu-bû.

6In bô mn̄g: Hit-ê chhōa goán chhut Ai-ki̍p, chhōa goán keng-kè khòng-iá kap khi-khu ê soa-bô͘, keng-kè ta-sò kap o͘-àm ê só͘-chāi, bô lâng kiâⁿ--kè, bô lâng tòa ê tōe, hit-ūi Siōng Chú tī tó-ūi?

7Góa chhōa lín chìn-ji̍p pûi koh súi ê tōe, hō͘ lín chia̍h lāi-bīn ê ké-chí kap hó ê mi̍h-kiāⁿ; lín chi̍t-ē ji̍p--lâi, chiū sńg-tn̄g góa ê thó͘-tōe, ù-jiám góa sù hō͘ lín ê sán-gia̍p.

8Chè-si m̄-bat mn̄g “Siōng Chú tī tó-ūi”, kà lu̍t-hoat--ê tìⁿ m̄ bat góa, koaⁿ-oân ngó͘-ge̍k góa; sian-ti hōng Pa-le̍k ê miâ thoân sìn-sit, tè bô lō͘-ēng ê sîn-bêng.

9Só͘-í, góa Siōng Chú kóng: Góa beh khòng-kò lín, beh kap lín ê hō͘-tāi cheng-piān.

10Lín tio̍h khì sai-pêng ê Ki-thê chiah-ê tó khòaⁿ, khì tang-pêng ê Ki-ta̍t tiâu-cha, khòaⁿ in kiám bat chòe chit-khoán tāi-chì.

11Ū tó chi̍t kok bat ōaⁿ-kè in ê sîn-bêng? Kî-si̍t hiah-ê lóng m̄-sī sîn. M̄-kú góa ê chú-bîn chiong in êng-kng ê Siōng-tè ōaⁿ chòe bô lō͘-ēng ê sîn-bêng.

12Thiⁿ ah, lín kiám bōe in-ūi án-ni tio̍h-kiaⁿ, kiám bōe in-ūi án-ni kiaⁿ-hiâⁿ phi̍h-phi̍h-chhoah? Siōng Chú án-ni soan-kò.

13Góa ê chú-bîn chòe siang-têng ê pháiⁿ tāi-chì: In pàng-sak góa chit-ê oa̍h-chúi ê goân-thâu, khì ó͘ chi̍t ê bōe chek-chúi ê chúi-tî.

14Í-sek-lia̍t kiám sī lô͘-lē? Kiám chhut-sì chiū chòe lâng ê lô͘-châi? Ná ōe chiâⁿ-chòe la̍h-bu̍t?

15Tùi-te̍k chhin-chhiūⁿ siàu-chòng ê sai ǹg i hm̄-hm̄-háu, tùi i tōa-siaⁿ hoah. In hō͘ i ê tōe hong-hòe, hō͘ i ê siâⁿ húi-hoāi, bô lâng tòa.

16Ai-ki̍p ê Bēng-húi-su -lâng kap Tap-pí-le̍k -lâng thì-kng lí ê thâu-khak.

17Che kiám m̄-sī lí ka-kī jiá--lâi-ê? Siōng Chú — lí ê Siōng-tè chhōa lí kiâⁿ-lō͘ ê sî, lí pàng-sak I.

18Taⁿ, lí khì Ai-ki̍p lim Nî-lô-hô ê chúi kiám ōe-tàng tit-tio̍h sím-mi̍h lī-ek? Lí khì A-su̍t lim Iù-hoat-la-tí-hô ê chúi kiám ōe-tàng tit-tio̍h sím-mi̍h hó-chhù?

19Lí ka-kī ê chōe-ok beh hêng-hoa̍t lí; lí ka-kī ê put-tiong beh khòng-kò lí. Án-ni, lí chiū ōe chheng-chhó bêng-pe̍k: Pàng-sak Siōng Chú — lí ê Siōng-tè, bô kiaⁿ-ùi góa, sī jōa-á-ni̍h siâ-ok, jōa-á-ni̍h put-hēng. Chì-koân Siōng Chú — Bān-kun ê Thóng-sòe án-ni soan-pò͘.

20Lí tùi kó͘-chá chiū kòng-tn̄g lí ê taⁿ, tháu-khui lí ê soh, kóng “Góa m̄ ho̍k-sāi lí”. Lí tī ta̍k-ê soaⁿ-lûn-á, tī ta̍k-châng chhiⁿ-chhùi ê chhiū ē-bīn, chhin-chhiūⁿ ki-lú tó--teh.

21Lí goân-lâi sī góa chai-chèng te̍k-soán ê phû-tô-chhiū, sī sûn-chéng ê phû-tô-chhiū, kèng-jiân kā góa pìⁿ-chòe iá-chéng ê bái chhiū-ki.

22Lí ēng kiⁿ, ēng chin chōe sat-bûn sóe, m̄-kú góa iáu khòaⁿ ōe chhut lí chōe-ok ê hûn-jiah. Chì-koân ê Siōng Chú án-ni soan-kò.

23Lí ná ōe kóng “Góa bô phah lâ-sâm ka-kī, bô khì tè Pa-le̍k”? Lí khòaⁿ lí tī soaⁿ-kok tiong ê hêng-ûi, chiū chai ka-kī ê só͘-chòe, ká-ná gâu cháu ê tan-hong lo̍k-tô-bú, sì-kòe loān-chông.

24Lí koh chhin-chhiūⁿ koàn-sì tòa tī khòng-iá ê iá-lû-bú, io̍k-hé-kong-sim ê sî chiū phi̍hⁿ-phe̍hⁿ-chhoán, siáu ê sî, siáⁿ-lâng kā i khòng-chè ōe tiâu? Kang ê lû-á chin kín chiū ōe-tàng chhē-tio̍h i; kau-phòe ê kùi-choeh, it-tēng chhē i ōe tio̍h.

25Lí m̄-thang tè lâng cháu kah ôe phòa--khì, m̄-thang hèng kah nâ-âu ta; lí kèng-jiân kóng, “Bô-chhái-kang lah, bô hoat-tō͘ lah! Góa to ài-tio̍h siⁿ-hūn-lâng, góa beh tè in cháu.”

26Chha̍t-á hō͘ lâng lia̍h--tio̍h, ōe án-chóaⁿ kiàn-siàu, Í-sek-lia̍t -ke, pau-koat in ê ông, in ê koaⁿ-tiúⁿ, chè-si, kap sian-ti, mā ōe án-ni kiàn-siàu.

27In tùi chhâ-thâu kóng “Lí sī góa ê lāu-pē”, tùi chio̍h-thâu kóng “Lí sī góa ê lāu-bú”. In ka-chiah-phiaⁿ ǹg góa, m̄-khéng bīn khòaⁿ góa; kàu tú-tio̍h chai-lān ê sî, chiah kā góa kóng, “Kiû lí lâi kái-kiù goán!”

28Lín ūi ka-kī chō ê sîn-bêng tī tó-ūi? Lín tú-tio̍h chai-lān ê sî, kiò in khí-lâi kiù lín! Iû-tāi ah, lín ê sîn-bêng chhin-chhiūⁿ lín ê siâⁿ-tìn hiah chōe!

29Lín ná beh kap góa cheng-piān? Lín lóng pōe-poān góa. Siōng Chú án-ni soan-kò.

30Bô-chhái góa teh tok-chek lín ê kiáⁿ-jî, in lóng m̄-khéng siū koán-kàu. Lín ēng to thâi-sí sian-ti, chhin-chhiūⁿ hiong-béng ê sai teh thun-chia̍h.

31Lín chit sè-tāi ê lâng, tio̍h thiaⁿ Siōng Chú ê ōe! Tùi lín Í-sek-lia̍t -lâng lâi kóng, góa kiám chhin-chhiūⁿ khòng-iá, á-sī o͘-àm gûi-hiám ê tōe? Góa ê Chú-bîn ná ōe kóng “Goán chū-iû lah, bô beh koh tńg-lâi lí chia”?

32Siàu-liân ê lú-chú kiám ōe bōe-kì-tit i ê chu-pó? Sin-niû kiám ōe bōe-kì-tit ka-kī ê sin-niû-saⁿ? M̄-kú góa ê chú-bîn m̄-chai jōa kú í-chêng chiū bōe-kì-tit góa.

33Lín chiah gâu chhē ài-jîn, liân siōng-pháiⁿ ê cha-bó͘ mā tio̍h kā lí chhéng-kàu.

34Lín ê saⁿ-á-ku ū bû-ko͘, sàn-chhiah-lâng ê huih, kî-si̍t in pèng bô thau-the̍h lín chhù-lāi ê mi̍h-kiāⁿ. Sui-jiân lín chòe chiah-ê tāi-chì,

35lín iáu kóng, “Góa bô chōe! Siōng Chú í-keng kā góa sià-bián lah.” Tio̍h chai, góa it-tēng ōe sím-mn̄g lín, in-ūi lín bô beh sêng-jīn ka-kī ê chōe.

36Lín ná chông-lâi-chông-khì, put-sî teh kái-piàn lō͘-hiòng? Lín tâu-khò Ai-ki̍p, ōe chhin-chhiūⁿ í-chêng óa-khò A-su̍t án-ni chū-chhú-kiàn-siàu.

37Lín it-tēng ōe chhin-chhiūⁿ hu-ló͘, siang-chhiú mo͘h thâu-khak lī-khui Ai-ki̍p, in-ūi Siōng Chú í-keng khì-sak lín só͘ óa-khò--ê; lín bōe-tàng in-ūi tâu-khò in tit-tio̍h lī-ek.

← Chapter 1 Jump to: Chapter 3 →