Jeremiah 37

Chinese TTVR (現代台語譯本羅馬字版)

← Chapter 36 Jump to: Chapter 38 →

1Pa-pí-lûn -ông Nî-pò͘-kah-nî-sat siat-li̍p Iok-se-a ê kiáⁿ Se-tí-ka tāi-thòe Iok-ngá-kèng ê kiáⁿ Iok-ngá-kun choh Iû-tāi -ông.

2M̄-kú Se-tí-ka, i ê jîn-sîn, kap choân-kok jîn-bîn m̄ thiaⁿ-thàn Siōng Chú thong-kè sian-ti Iâ-lī-bí kóng ê ōe.

3Se-tí-ka -ông phài Sī-lī-bí-ngá ê kiáⁿ Iû-kah, Má-se-ngá ê kiáⁿ chè-si Se-hoan-ngá khì kā sian-ti Iâ-lī-bí kóng, “Chhiáⁿ lí thòe goán kî-kiû Siōng Chú — lán ê Siōng-tè.”

4Hit-sî, Iâ-lī-bí iáu-bē hō͘ lâng koaiⁿ-lo̍h kaⁿ, iáu ōe-tàng tī jîn-bîn ê tiong-kan chhut-chhut-ji̍p-ji̍p;

5koh ûi-kong Iâ-lō͘-sat-léng ê Pa-pí-lûn kun-tūi hut-jiân thiat-thè, in-ūi in thiaⁿ-kìⁿ Hoat-ló í-keng phài kun-tūi tùi Ai-ki̍p chhut-hoat.

6Siōng Chú tùi sian-ti Iâ-lī-bí kóng,

7“Lí kā in kóng, ‘Siōng Chú — Í-sek-lia̍t ê Siōng-tè án-ni kóng: Lín tio̍h kā phài lín lâi kiû-mn̄g góa ê Iû-tāi -ông án-ni kóng: Lí khòaⁿ-bāi--leh, hiah-ê chhut-lâi beh oān-chō͘ lí ê Hoat-ló kun-tūi ōe thiat-thè tò-khì Ai-ki̍p.

8Pa-pí-lûn ê kun-tūi it-tēng ōe koh lâi kong-táⁿ chit-ê siâⁿ, kā i chiàm-léng, pàng-hé sio.

9Siōng Chú án-ni kóng, lín m̄-thang chū-ngó͘ khi-phiàn, siūⁿ-kóng Pa-pí-lûn -lâng it-tēng ōe lī-khui lín. Kî-si̍t, in bōe lī-khui.

10Chiū-sī-kóng lín kā lâi kong-táⁿ ê Pa-pí-lûn choân-kun phah-pāi, chhun chi̍t-kóa siū-siong ê peng-á, in mā ōe tùi iâⁿ-pâng khí--lâi, pàng-hé sio chit-ê siâⁿ.’”

11Pa-pí-lûn kun-tūi ūi-tio̍h beh siám-pī Hoat-ló ê kun-tūi, thiat-thè lī-khui Iâ-lō͘-sat-léng.

12Iâ-lī-bí chiū tùi Iâ-lō͘-sat-léng chhut-hoat khì Piān-ngá-bín tōe-khu, beh tī chhin-cho̍k ê tiong-kan kè-sêng i ê sán-gia̍p.

13I khì kàu Piān-ngá-bín-mn̂g ê sî, Hap-ná-nî-ngá ê sun, Sī-lī-bí-ngá ê kiáⁿ siú-ōe-tūi ê koaⁿ-tiúⁿ I-lī-ngá kā Iâ-lī-bí lia̍h--khí-lâi, kóng, “Lí beh tùi Pa-pí-lûn -lâng tâu-hâng ho͘hⁿ.”

14Iâ-lī-bí kóng, “Lí o͘-pe̍h kóng! Góa bô beh khì tâu-hâng Pa-pí-lûn -lâng!” M̄-kú I-lī-ngá m̄ thiaⁿ, kā i lia̍h--khí-lâi, kau hō͘ koaⁿ-oân.

15Hiah-ê koaⁿ-oân lóng chin khì Iâ-lī-bí, chiū kā i phah, kā i koaiⁿ tī kiong-têng su-kì-koaⁿ Iok-ná-tan ê chhù, hit-keng chhù í-keng kái chòe kaⁿ-lô.

16In chiong Iâ-lī-bí koaiⁿ tī tōe-lô kúi-nā ji̍t.

17Se-tí-ka -ông phài lâng khì kā Iâ-lī-bí chhōa--lâi, tī ông-kiong su-hā mn̄g i, “Siōng Chú kiám ū kā lí kóng sím-mi̍h?” Iâ-lī-bí ìn kóng, “Ū! Lí ōe hō͘ Pa-pí-lûn -ông lia̍h--khì.”

18Koh kā Se-tí-ka -ông kóng, “Góa ū tek-chōe lí sím-mi̍h, á-sī tek-chōe lí ê jîn-sîn kap chiah-ê jîn-bîn, lí kèng-jiân kā góa koaiⁿ-lo̍h kaⁿ?

19Hiah-ê tùi lí ū-giân, kóng Pa-pí-lûn -ông it-tēng bōe lâi kong-táⁿ lín kap chit-tè thó͘-tōe ê sian-ti, taⁿ tī tó-ūi?

20Góa ê chú, góa ê ông, chhiáⁿ lí thiaⁿ, ún-chún góa ê khún-kiû, m̄-thang sàng góa koh tò-khì su-kì-koaⁿ Iok-ná-tan ê chhù; nā bô, góa ōe sí tī hia.”

21Se-tí-ka -ông chiū hā-lēng, kā Iâ-lī-bí khu-liû tī hō͘-ōe-tūi ê tiâⁿ, ta̍k-ji̍t tùi piáⁿ-tiàm-koe the̍h chi̍t hūn mī-pau hō͘ i, ti̍t-kàu siâⁿ-lāi ê mī-pau lóng chia̍h-liáu-liáu; Iâ-lī-bí chiū án-ni it-ti̍t hō͘ lâng khu-liû tī hō͘-ōe-tūi ê tiâⁿ--ni̍h.

← Chapter 36 Jump to: Chapter 38 →