Jeremiah 42

Chinese TTVR (現代台語譯本羅馬字版)

← Chapter 41 Jump to: Chapter 43 →

1Só͘-ū ê kun-koaⁿ, pau-koat Ka-lī-a ê kiáⁿ Iok-hap-lân, Hô-sa-ngá ê kiáⁿ Iâ-sat-nî-a, í-ki̍p só͘-ū ê jîn-bîn, bô-lūn chun-kùi á-sī pi-bî, lóng khì kìⁿ sian-ti Iâ-lī-bí,

2tùi i kóng, “Chhiáⁿ chiap-siū goán ê chhéng-kiû, thòe goán chiah-ê chhun--lo̍h-lâi ê lâng ǹg Siōng Chú — lí ê Siōng-tè kî-tó. Lí ū khòaⁿ--tio̍h, goán pún-lâi lâng chin chōe, m̄-kú hiān-chāi chhun chiah chió.

3Chhiáⁿ thòe goán kî-kiû Siōng Chú — lí ê Siōng-tè, chí-sī goán eng-kai kiâⁿ ê lō͘, tio̍h án-chóaⁿ chòe.”

4Sian-ti Iâ-lī-bí kā in kóng, “Án-ni góa chai. Hó! Góa ōe chiàu lín ê chhéng-kiû, ǹg Siōng Chú — lín ê Siōng-tè kî-tó. Siōng Chú kā góa kóng sím-mi̍h, góa it-tēng ōe kā lín kóng, bōe kā lín ún-môa.”

5In chiū tùi Iâ-lī-bí kóng, “Goán nā bô chiàu Siōng Chú — lí ê Siōng-tè phài lí lâi thoân-ta̍t hō͘ goán ê ta̍k-kù ōe khì chòe, goān I tī lán tiong-kan chòe kong-chèng khó-khò ê kiàn-chèng-jîn.

6Sī goán chhiáⁿ lí thòe goán ǹg Siōng Chú khún-kiû, só͘-í, I tùi goán kóng ê ōe bô-lūn sī hó á-sī bái, goán lóng beh thiaⁿ-thàn Siōng Chú — goán ê Siōng-tè, án-ni goán chiah ōe sū-sū sūn-lī.”

7Cha̍p ji̍t āu, Siōng Chú tùi Iâ-lī-bí kóng-ōe.

8Iâ-lī-bí chiū kiò Ka-lī-a ê kiáⁿ Iok-hap-lân, í-ki̍p kap i chòe-hé ê kun-koaⁿ, jîn-bîn, bô-lūn chun-kùi á-sī pi-bî, lóng khì i hia.

9I kā in kóng, “Lín ū chhiáⁿ góa ūi-tio̍h lín ǹg Siōng Chú — Í-sek-lia̍t ê Siōng-tè kî-tó, I án-ni kóng,

10‘Lín nā iû-goân tòa tī chit-tè thó͘-tōe, góa chiū beh kā lín tiông-kiàn, bōe kā lín thiah-húi; beh kā lín chai-chèng, bōe kā lín pu̍ih-chhut; in-ūi góa ūi-tio̍h góa kàng hō͘ lín ê chai-hō kám-kak chin siong-sim.

11Lín teh kiaⁿ ê Pa-pí-lûn -ông, m̄-bián kiaⁿ i! In-ūi góa kap lín tông-chāi, beh kái-kiù lín, hō͘ lín tit-tio̍h chū-iû. Siōng Chú án-ni soan-pò͘.

12Góa beh tùi lín si lîn-bín, mā beh hō͘ Pa-pí-lûn -ông lîn-bín lín, hō͘ lín tò-tńg-lâi lín ê thó͘-tōe.’

13“M̄-kú lín nā bô beh lâu tiàm chia, bô beh sūn-chiông Siōng Chú — lín ê Siōng-tè ê ōe, tian-tò kóng,

14‘M̄, goán beh khì Ai-ki̍p; hia bô chiàn-cheng, bōe thiaⁿ-tio̍h sàu-kak ê siaⁿ, koh ū mi̍h-kiāⁿ thang chia̍h bōe iau-sí. Goán beh khì tòa hia.’

15Taⁿ, Iû-tāi chhun--lo̍h-lâi ê lâng ah, tio̍h thiaⁿ Siōng Chú ê ōe! Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng, ‘Lín nā kian-chhî beh khì Ai-ki̍p, beh kià-ku tī hia,

16lín teh kiaⁿ ê to-kiàm ōe jip kàu hia; lín teh kiaⁿ ê ki-hng mā ōe tè lín kàu Ai-ki̍p, hō͘ lín sí tī hia.

17Só͘-ū kian-koat beh kià-ku tī Ai-ki̍p ê lâng it-tēng ōe in-ūi chiàn-loān, ki-hng, un-e̍k sí tī hia, bô chi̍t ê ōe-tàng oa̍h--lo̍h-lâi, thoat-lī góa beh kàng hō͘ in ê chai-hō.’

18“Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng, ‘Lín nā khì Ai-ki̍p, góa chiū beh tùi lín hoat tōa siū-khì, chhin-chhiūⁿ í-chêng tùi Iâ-lō͘-sat-léng ê chū-bîn hoat tōa siū-khì kâng-khoán. Lín ōe chiâⁿ-chòe lâng iàm-ò͘ⁿ, chiù-chó͘, bú-jio̍k ê tùi-siōng, hō͘ lâng tio̍h-kiaⁿ; lín mā bōe-tàng koh khòaⁿ-tio̍h lín ê kò͘-hiong.’

19“Tùi lín chiah-ê Iû-tāi chhun--lo̍h-lâi ê lâng, Siōng Chú kóng, ‘M̄-thang khì Ai-ki̍p!’ Lín tio̍h chheng-chhó chai-iáⁿ, góa kin-á-ji̍t í-keng kā lín kéng-kò.

20Lín í-keng hoān tì-miā ê chhò-gō͘; lín chhiáⁿ góa khì kiû-mn̄g Siōng Chú — lín ê Siōng-tè, lín kóng, ‘Chhiáⁿ thòe goán ǹg Siōng Chú — lán ê Siōng-tè kî-tó, chiong Siōng Chú — lán ê Siōng-tè tùi lí kóng ê ōe lóng kā goán kóng, goán it-tēng beh thiaⁿ-thàn.’

21Taⁿ góa chiong Siōng Chú ê ōe kā lín kóng lah, lín soah m̄ thiaⁿ-thàn Siōng Chú — lín ê Siōng-tè phài góa lâi kā lín kóng ê ta̍k-kù ōe.

22Só͘-í, lín tio̍h khak-si̍t chai, lín ōe tī beh khì kià-ku ê tōe in-ūi tú-tio̍h chiàn-loān, ki-hng, un-e̍k bia̍t-bông.”

← Chapter 41 Jump to: Chapter 43 →