Jeremiah 35

Chinese TTVR (現代台語譯本羅馬字版)

← Chapter 34 Jump to: Chapter 36 →

1Iok-se-a ê kiáⁿ Iok-ngá-kèng chòe Iû-tāi -ông ê sî, Siōng Chú kā Iâ-lī-bí kóng,

2“Lí khì Lī-kah -cho̍k hia, kā in chhōa-lâi Siōng Chú sèng-tiān ê chi̍t ê pâng-keng, the̍h chiú hō͘ in lim.”

3Góa chiū khì kā Hap-pa-sé-nî-ngá ê sun, Iâ-lī-bí ê kiáⁿ Ngá-sat-nî-a, i ê hiaⁿ-tī, i ê hāu-siⁿ, í-ki̍p Lī-kah choân-cho̍k ê lâng,

4lóng chhōa-lâi Siōng Chú ê sèng-tiān, ji̍p-khì I-ki-tāi-lī ê kiáⁿ Siōng-tè tiōng-iōng ê lâng Hap-lân hiah-ê kiáⁿ ê pâng-keng; hit-ê pâng-keng óa-kūn koaⁿ-oân ê pâng-keng, tī Sa-liông ê kiáⁿ sèng-tiān mn̂g-kháu ê siú-ōe Má-se-ngá pâng-keng ê lâu-téng.

5Góa ēng chiú kā chiú-ô͘, chiú-poe tò-tīⁿ, hē tī Lī-kah -cho̍k ê lâng thâu-chêng, tùi in kóng, “Chhiáⁿ lim.”

6In kóng, “Goán bô lim-chiú. Goán ê chó͘-sian Lī-kah ê kiáⁿ Iok-ná-ta̍t ū kā goán kau-tài, ‘Lín kap lín ê hō͘-tāi éng-oán to m̄-thang lim-chiú.

7M̄-thang khí-chhù, m̄-thang iā-chéng, m̄-thang chai-chèng phû-tô, mā m̄-thang ū phû-tô-hn̂g; tio̍h chi̍t-sì-lâng tòa tī pò͘-pîⁿ, lín chiah ōe-tàng tī kià-ku ê tōe tn̂g-hè-siū.’

8Goán chó͘-sian Lī-kah ê kiáⁿ Iok-ná-ta̍t kau-tài goán ê ōe, goán lóng ū chun-siú. Goán kap goán ê bó͘-kiáⁿ, chi̍t-sì-lâng lóng bô lim-chiú,

9bô khí-chhù tòa, bô phû-tô-hn̂g, bô thó͘-tōe, bô chèng-choh,

10kan-ta tòa tī pò͘-pîⁿ, lóng chiàu goán ê chó͘-sian Iok-ná-ta̍t ê bēng-lēng.

11Pa-pí-lûn -ông Nî-pò͘-kah-nî-sat lâi kong-táⁿ chit-tè thó͘-tōe ê sî, goán kóng, ‘Kiâⁿ, lán lâi-khì Iâ-lō͘-sat-léng, siám-bih Pa-pí-lûn kap Sū-lī-a ê kun-tūi.’ Án-ni, goán chiah lâi tòa tiàm Iâ-lō͘-sat-léng.”

12Siōng Chú hoan-hù Iâ-lī-bí khì kā Iû-tāi -lâng kap Iâ-lō͘-sat-léng ê chū-bîn kóng, “Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng, ‘Lín bô beh thiaⁿ góa ê kà-sī, m̄ sūn-thàn góa ê ōe sī--bô?

14Lī-kah ê kiáⁿ Iok-ná-ta̍t kau-tài i ê hō͘-tāi m̄-thang lim-chiú, in chiū lóng chun-siú it-ti̍t kàu kin-á-ji̍t. M̄-kú, góa put-toān kā lín kéng-kài, lín lóng m̄ thiaⁿ-thàn.

15Góa chi̍t-piàn koh chi̍t-piàn chhe-phài góa ê po̍k-jîn sian-ti khì lín hia, kā lín kóng: Lín ta̍k-ê lâng tio̍h hôe-thâu, lī-khui siâ-ok ê tō-lō͘, kái-chèng lín ê hêng-ûi, bô koh khì tè pa̍t-ê sîn-bêng, ho̍k-sāi in, án-ni lín chiū ōe-tàng tòa tī góa sù hō͘ lín kap lín ê chó͘-sian ê thó͘-tōe. M̄-kú lín lóng bô beh thiaⁿ, bô beh chun-siú.

16Lī-kah ê kiáⁿ Iok-ná-ta̍t ê hō͘-tāi ōe-tàng chun-siú in ê chó͘-sian hō͘ in ê bēng-lēng, m̄-kú lín chiah-ê jîn-bîn lóng bô beh thiaⁿ-thàn góa.

17Só͘-í, góa Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng: Góa beh chiong góa só͘ kóng it-chhè ê chai-hō kàng hō͘ Iû-tāi -lâng kap Iâ-lō͘-sat-léng só͘-ū ê chū-bîn; in-ūi góa kā lín kà-sī, lín bô beh thiaⁿ, kā lín kiò, lín bô beh ìn.’”

18Āu-lâi, Iâ-lī-bí tùi Lī-kah -cho̍k kóng, “Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng: Lín ū thiaⁿ-thàn lín ê chó͘-sian Iok-ná-ta̍t kau-tài lín ê ōe, chun-siú i só͘-ū ê bēng-lēng, chiàu i kā lín hoan-hù--ê khì chòe,

19só͘-í, Siōng Chú — Bān-kun ê Thóng-sòe, Í-sek-lia̍t ê Siōng-tè án-ni soan-pò͘: Lī-kah ê kiáⁿ Iok-ná-ta̍t éng-oán ū lâng tī góa ê bīn-chêng sū-hōng góa.”

← Chapter 34 Jump to: Chapter 36 →