Jeremiah 46

Chinese TTVR (現代台語譯本羅馬字版)

← Chapter 45 Jump to: Chapter 47 →

1Koan-hē lia̍t-kok, Siōng Chú ê ōe lîm-kàu sian-ti Iâ-lī-bí.

2Chiam-tùi Ai-ki̍p: Koan-hē Ai-ki̍p -ông Nî-ko ê kun-tūi, in tī Iok-se-a ê kiáⁿ Iok-ngá-kèng choh Iû-tāi -ông tē-sì nî, tī Iù-hoat-la-tí-hô hô-piⁿ ê Ka-ki-bí-si hō͘ Pa-pí-lûn -ông Nî-pò͘-kah-nî-sat phah-pāi.

3“Tio̍h chún-pī tōa-sòe tún-pâi, chhut-tīn kau-chiàn!

4Tio̍h thò bé-oaⁿ, khiâ-bé, pâi-tūi, tì thâu-khoe, bôa chhiuⁿ, chhēng chiàn-kah!”

5M̄-kú, Siōng Chú kóng, “Sī-án-chóaⁿ góa khòaⁿ-tio̍h in kiaⁿ-hiâⁿ thiat-thè? In ê ióng-sū thâi-su, piàⁿ sìⁿ-miā tô-cháu, m̄-káⁿ oa̍t-thâu; sì-chiu-ûi chhiong-móa khióng-pò͘!

6Siōng gâu-cháu--ê mā cháu bōe lī, liân ióng-sū to bōe-tàng tô-thoat; tī pak-hng, Iù-hoat-la-tí-hô hô-piⁿ, in lóng poa̍h-tó peh bōe khí--lâi.

7Chit-ê chhin-chhiūⁿ Nî-lô-hô tiòng-móa, chhin-chhiūⁿ kang-hô giâ-éng chhèng-koân--ê sī sím-mi̍h-lâng?

8Sī Ai-ki̍p! I chhin-chhiūⁿ Nî-lô-hô tiòng-móa, chhin-chhiūⁿ kang-hô giâ-éng chhèng-koân; i kóng, ‘Góa beh tiòng-móa, beh im-móa choân-tōe; góa beh húi-hoāi siâⁿ-tìn, siau-bia̍t hia ê chū-bîn.’

9Chiàn-bé, chhiong ah! Chiàn-chhia, tu̍t-kek! Giâ tún-pâi ê Kó͘-si̍t kap Hut ê ióng-sū, khui-keng ê Lū-tí-a kun-peng, chhiong--chhut-khì!”

10Chit-ji̍t sī Chì-koân Siōng Chú — Bān-kun ê Thóng-sòe pò-siû ê ji̍t, I beh hêng-hoa̍t te̍k-jîn. To-kiàm ōe thun-chia̍h, chia̍h kah pá, ōe lim huih, lim kah boán-chiok; tī pak-hng Iù-hoat-la-tí-hô hô-piⁿ, ū chè-mi̍h beh hiàn hō͘ Chì-koân Siōng Chú — Bān-kun ê Thóng-sòe.

11Ai-ki̍p -lâng ah, tio̍h khì Ki-lia̍t chhē jú-hiuⁿ! Lín chia̍h chiah chōe io̍h-á lóng bô-hāu, bōe-tàng kā lín i-hó.

12Lia̍t-kok ū thiaⁿ-tio̍h lí siū ê lêng-jio̍k; choân-tōe chhiong-móa lí ai-khàu ê siaⁿ; ióng-sū kap ióng-sū sio-lòng, nn̄g ê chòe-chi̍t-ē poa̍h-tó.

13Ē-bīn sī koan-hē Pa-pí-lûn -ông Nî-pò͘-kah-nî-sat kong-táⁿ Ai-ki̍p, Siōng Chú tùi sian-ti Iâ-lī-bí só͘ kóng ê ōe.

14Tio̍h tī Ai-ki̍p pò-iông, tī Bi̍t-toa̍t soan-pò͘, tī Bēng-húi-su kap Tap-pí-le̍k soan-pò͘, kóng, “Tio̍h pâi-tīn, chún-pī chok-chiàn! Chiàn-cheng ōe thun-bia̍t lín it-chhè só͘ ū--ê.”

15Lín ê ióng-sū sī-án-chóaⁿ poa̍h-tó? In-ūi Siōng Chú kā in chhia-tó, hō͘ in khiā bōe tiâu.

16In chiàn-pāi sì-sòaⁿ, tāi-ke saⁿ thún-ta̍h, hō͘-siōng kóng, “Khí--lâi! Lán tò-lâi-khì lán ê pún-cho̍k, tńg-lâi-khì lán ê kò͘-hiong, siám-pī khi-ap-chiá ê to-kiàm.”

17In tī hia hoah kóng, “ Ai-ki̍p -ông Hoat-ló kan-ta ōe-hiáu kóng tōa-siaⁿ-ōe; i í-keng sit-khì i ê ki-hōe.”

18Tōa-kun-ông, Siōng Chú — Bān-kun ê Thóng-sòe án-ni kóng, “Góa kí góa ê sìⁿ-miā li̍p-sè, Nî-pò͘-kah-nî-sat lâi ê sî, i ōe chhin-chhiūⁿ chhiau-oa̍t chèng-soaⁿ ê Tha-po̍k-soaⁿ, chhin-chhiūⁿ tī hái-piⁿ ê Ka-bi̍t-soaⁿ.

19Ai-ki̍p -lâng ah, tio̍h kā siū-lia̍h beh ēng ê mi̍h-kiāⁿ khoán hó-sè, in-ūi Bēng-húi-su ōe siū sio-húi, pha-hng, bô lâng khiā-khí.

20“ Ai-ki̍p sī pûi koh súi ê gû-bú, m̄-kú tùi pak-hng lâi ê gû-bông í-keng kàu lah! In í-keng lâi lah!

21Ai-ki̍p chhiàⁿ--lâi ê peng, chhin-chhiūⁿ tiâu-lāi pûi ê gû-á, in lóng thiat-thè tô-cháu, m̄-káⁿ kè-sio̍k kau-chiàn; in-ūi in hoān-lān ê ji̍t lâi lah, siū hêng-hoa̍t ê sî í-keng kàu lah.

22“ Ai-ki̍p tô-cháu, chhin-chhiūⁿ chôa teh sô hoat-chhut siaⁿ; te̍k-jîn beh kui-tīn chòe-hé lâi, chhin-chhiūⁿ chhò-chhiū-á ê lâng gia̍h pó͘-thâu kā i chhò-tiāu.

23Siōng Chú kóng: I ê chhiū-nâ sui-jiân chin ām, te̍k-jîn mā ōe kā chhò-liáu-liáu; in-ūi te̍k-jîn pí chháu-meh khah chōe, bōe-sǹg--tit.

24Ai-ki̍p ê jîn-bîn beh siū bú-jio̍k kiàn-siàu, in ōe hō͘ pak-hng ê lâng cheng-ho̍k.”

25Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng, “Lí khòaⁿ, góa beh hêng-hoa̍t Tí-pí-su ê sîn-bêng A-bûn, hêng-hoa̍t Ai-ki̍p, í-ki̍p i ê sîn-bêng kap kun-ông; góa mā beh hêng-hoa̍t Hoat-ló kap só͘-ū óa-khò i ê lâng.

26Góa beh chiong in kau tī ài-beh thâi in ê lâng ê chhiú, chiū-sī Pa-pí-lûn -ông Nî-pò͘-kah-nî-sat kap i ê jîn-sîn ê chhiú. M̄-kú, Ai-ki̍p chiong-lâi ōe koh ū lâng khiā-khí, kap chá-chêng kâng-khoán.” Siōng Chú án-ni soan-pò͘.

27“Góa ê po̍k-jîn Ngá-kok, m̄-bián kiaⁿ! Í-sek-lia̍t, m̄-bián sit-chì! Góa beh tùi chin hn̄g ê só͘-chāi kái-kiù lí, tùi lí siū-lia̍h ê tōe kái-kiù lí ê hō͘-tāi; Ngá-kok ê hō͘-tāi ōe tò-lâi ka-kī ê hiong-thó͘ an-ku-lo̍k-gia̍p, bô lâng ōe koh hō͘ in kiaⁿ-hiâⁿ.

28Góa ê po̍k-jîn Ngá-kok m̄-bián kiaⁿ, in-ūi góa kap lí tông-chāi. Góa kóaⁿ lí khì hiah-ê kok-ka, góa beh kā in oân-choân húi-bia̍t. Lí leh, góa bōe kā lí oân-choân siau-bia̍t, m̄-kú bōe-tàng bô hêng-hoa̍t lí; góa beh chiàu kong-gī koán-kàu lí.” Siōng Chú án-ni soan-pò͘.

← Chapter 45 Jump to: Chapter 47 →