Jeremiah 17

Chinese TTVR (現代台語譯本羅馬字版)

← Chapter 16 Jump to: Chapter 18 →

1Siōng Chú kóng, “ Iû-tāi jîn-bîn ah, lín ê chōe sī ēng thih-pit siá--ê, ēng soān-chio̍h-to khek--ê; siá tī lín ê sim-pán, khek tī lín chè-tôaⁿ ê kak.

2Lín lóng teh siàu-liām tī ta̍k-ê soaⁿ-lûn-á, iá-tōe koân ê só͘-chāi, kap ta̍k-châng chhiⁿ-chhùi ê chhiū ē-bīn ê chè-tôaⁿ kap A-sià-la lú-sîn ê thiāu-siōng. In-ūi lín tī kéng-lāi ê soaⁿ-thâu-tôaⁿ só͘ hoān ê chōe, góa beh hō͘ lín ê châi-pó hō͘ tùi-te̍k chhiúⁿ--khì.

4Lín ōe sit-khì góa sù hō͘ lín ê sán-gia̍p; góa beh hō͘ lín ê tùi-te̍k kā lín lia̍h-khì lín m̄-bat ê kok-ka ho̍k-sāi in, in-ūi lín jiá góa siū-khì; góa siū-khì ê hé éng-oán bōe hoa.”

5Siōng Chú kóng, “Óa-khò sè-kan-lâng, siong-sìn jio̍k-thé ê khùi-la̍t, sim lī-khui Siōng Chú ê lâng, chit-khoán lâng ōe siū chiù-chó͘.

6In ōe chhin-chhiūⁿ soa-bô͘ tiong ê sòe-châng chhiū-á, hēng-hok lâi ê sî khòaⁿ bōe tio̍h; in ōe tòa tī ta-sò ê khòng-iá, bô lâng khiā-khí ê kiâm-tōe.

7“Óa-khò Siōng Chú, choan-sim sìn-khò góa ê lâng, chit-khoán lâng chin ū hok-khì!

8In chhin-chhiūⁿ chhiū chai tī chúi-piⁿ, tèng-kun tī khoe-chúi piⁿ, m̄ kiaⁿ iām-jia̍t, hio̍h chhiⁿ-chhùi bō͘-sēng; khòng-hān ê sî lóng m̄-bián khòa-lū, ōe put-toān kiat ké-chí.

9“Lâng ê sim pí sím-mi̍h lóng khah khúi-chà, bô io̍h thang i, sím-mi̍h-lâng bat ōe thàu?

10Góa Siōng Chú bat lâng ê sim, chhâ-giām lâng ê sim-su, beh chiàu ta̍k-ê lâng ê só͘-chòe pò-èng in.”

11Ēng bô chèng-tong ê chhiú-tōaⁿ hoat-châi--ê, chhin-chhiūⁿ iá-chiáu teh pū m̄-sī ka-kī siⁿ ê nn̄g, tiong-liân ê sî ōe sit-khì châi-hù, kàu lō͘-bé ōe pìⁿ-chòe gû-gōng ê lâng.

12Goán ê sèng-só͘ sī êng-kng ê pó-chō, tùi kó͘-chá chiū khiā tī koân-koân ê só͘-chāi.

13Siōng Chú ah, lí sī Í-sek-lia̍t ê ǹg-bāng! Khì-sak lí--ê lóng ōe kiàn-siàu; in ōe siau-sit, chhin-chhiūⁿ miâ siá tī thô͘-kha, in-ūi in khì-sak Siōng Chú — oa̍h-chúi ê goân-thâu.

14Siōng Chú ah, kiû lí i-tī góa, góa chiū ōe tit-tio̍h i-hó; kiû lí chín-kiù góa, góa chiū ōe tit-tio̍h kái-kiù. Lí sī góa só͘ chheng-chàn--ê.

15Lâng tùi góa kóng, “Siōng Chú kéng-kò ê ōe tī tó-ūi? Nā ū, tio̍h hō͘ i si̍t-hiān.”

16Siōng Chú ah! Góa m̄-bat tô-pī chòe bo̍k-chiá ê chit-hūn bô kun-tè lí, mā m̄-bat ǹg-bāng in ū chi̍t ji̍t ōe tú-tio̍h chai-lān. Góa ê chhùi só͘ kóng--ê lí lóng chai.

17Kiû lí m̄-thang kā góa heh-kiaⁿ, in-ūi lí sī góa hoān-lān ê sî ê pī-lān-só͘.

18Kiû lí hō͘ pek-hāi góa ê lâng kiàn-siàu kiaⁿ-hiâⁿ, m̄-thang hō͘ góa kiàn-siàu kiaⁿ-hiâⁿ; kiû lí kàng chai-hō hō͘ in, kā in thiat-tóe siau-bia̍t.

19Siōng Chú tùi góa kóng, “Lí khì khiā tī Iû-tāi kun-ông chhut-ji̍p Iâ-lō͘-sat-léng ōe keng-kè ê Piān-ngá-bín-mn̂g, kap ta̍k-ê siâⁿ-mn̂g-kháu,

20tùi in kóng, ‘ Iû-tāi kun-ông kap jîn-bîn, í-ki̍p só͘-ū tùi chiah-ê siâⁿ-mn̂g chhut-ji̍p ê Iâ-lō͘-sat-léng chū-bîn, tio̍h chù-ì thiaⁿ Siōng Chú ê ōe.

21Siōng Chú kóng: Lín tio̍h sòe-jī, m̄-thang tī An-hioh-ji̍t poaⁿ mi̍h-kiāⁿ, tùi Iâ-lō͘-sat-léng chiah-ê siâⁿ-mn̂g chhut-ji̍p,

22mā m̄-thang poaⁿ jīm-hô mi̍h-kiāⁿ chhut-mn̂g, bô-lūn sím-mi̍h kang-chok lóng m̄-thang chòe. Tio̍h chiàu góa tùi lín chó͘-sian ê bēng-lēng, siú An-hioh-ji̍t chòe sèng-ji̍t.’

23M̄-kú in m̄ thiaⁿ; in ngī-sim, m̄ siū-kà.

24“Siōng Chú koh kóng: Lín nā chù-ì thiaⁿ góa ê ōe, bô tī An-hioh-ji̍t poaⁿ mi̍h-kiāⁿ tùi chiah-ê siâⁿ-mn̂g chhut-ji̍p, siú chit-ji̍t chòe sèng-ji̍t, bô chòe jīm-hô kang-chok,

25án-ni, lín chiū ōe ū sòa-chiap Tāi-pi̍t chē ông-ūi ê kun-ông kap in ê koaⁿ-oân khiâ-bé chē bé-chhia, kap Iû-tāi -lâng, Iâ-lō͘-sat-léng chū-bîn, chòe-hé tùi chiah-ê siâⁿ-mn̂g chhut-ji̍p; chit-ê siâⁿ mā ōe éng-oán ū lâng khiā-khí.

26Lín mā ōe ū jîn-bîn tùi Iû-tāi ta̍k siâⁿ-tìn, Iâ-lō͘-sat-léng chiu-ûi ta̍k chng-siā, Piān-ngá-bín tōe-khu, soaⁿ-po͘, soaⁿ-tōe, kap Nî-kek-hu tòa sio-hòa-chè, pêng-an-chè, sò͘-chè, jú-hiuⁿ, í-ki̍p siā-un-chè lâi góa ê sèng-tiān.

27M̄-kú, in nā bô beh thiaⁿ-thàn góa, bô siú An-hioh-ji̍t chòe sèng-ji̍t, tī An-hioh-ji̍t poaⁿ mi̍h-kiāⁿ tùi Iâ-lō͘-sat-léng ê siâⁿ-mn̂g chhut-ji̍p, góa chiū beh pàng-hé sio siâⁿ-mn̂g; tōa-hé ōe thun-chia̍h Iâ-lō͘-sat-léng ê kiong-tiān, bô lâng phah ōe hoa.”

← Chapter 16 Jump to: Chapter 18 →