Jeremiah 25

Chinese TTVR (現代台語譯本羅馬字版)

← Chapter 24 Jump to: Chapter 26 →

1Iok-se-a ê kiáⁿ Iok-ngá-kèng choh Iû-tāi -ông tē-sì nî, chiū-sī Nî-pò͘-kah-nî-sat choh Pa-pí-lûn -ông ê tē-it nî, Siōng Chú chiong iú-koan Iû-tāi jîn-bîn ê ōe thoân hō͘ Iâ-lī-bí.

2Sian-ti Iâ-lī-bí chiū chiong chiah-ê ōe kā só͘-ū ê Iû-tāi jîn-bîn kap Iâ-lō͘-sat-léng ê chū-bîn kóng,

3“Tùi A-bûn -ông ê kiáⁿ Iok-se-a choh-ông tē-cha̍p-saⁿ nî kàu kin-á-ji̍t, chit jī-cha̍p-saⁿ nî lâi, Siōng Chú put-sî tùi góa kóng-ōe, góa mā kè-sio̍k chiong I ê ōe thoân hō͘ lín, m̄-kú lín lóng bô beh thiaⁿ-thàn.

4Siōng Chú sui-jiân chi̍t-piàn koh chi̍t-piàn phài I ê po̍k-jîn chèng sian-ti lâi lín chia, m̄-kú lín oân-choân m̄ thiaⁿ-thàn.

5In kā lín kóng, ‘Lín ta̍k-ê lâng tio̍h hóe-kái, lī-khui siâ-ok ê tō-lō͘, pàng-sak chōe-ok ê hêng-ûi; án-ni, lín chiah ōe-tàng éng-éng-oán-oán tòa tī Siōng Chú sù hō͘ lín kap lín ê chó͘-sian ê thó͘-tōe.

6Só͘-í Siōng Chú kóng: Lín m̄-thang khì tè pa̍t-ê sîn-bêng, ho̍k-sāi kèng-pài in; m̄-thang pài lín ê chhiú chō ê mi̍h, jiá góa siū-khì; án-ni góa chiū bōe kàng chai-hō hō͘ lín. M̄-kú, lín lóng m̄ thiaⁿ-thàn, tian-tò khì pài ka-kī ê chhiú chō ê ngó͘-siōng, jiá góa siū-khì, ka-kī jiá hō-toan.’”

8Siōng Chú — Bān-kun ê Thóng-sòe kóng, “In-ūi lín m̄ thiaⁿ-thàn góa ê ōe,

9góa beh tiàu pak-hng ê bîn-cho̍k kap góa ê po̍k-jîn Pa-pí-lûn -ông Nî-pò͘-kah-nî-sat, lâi kong-kek chit-ê thó͘-tōe kap hiah-ê chū-bîn, í-ki̍p chiu-ûi ê bîn-cho̍k. Góa beh kā in thiat-tóe siau-bia̍t, hō͘ chit-ê tōe éng-oán pha-hng, hō͘ lâng tio̍h-kiaⁿ thí-chhiò. Siōng Chú án-ni soan-kò.

10Góa mā beh hō͘ in bô koh ū hoaⁿ-hí khoài-lo̍k ê siaⁿ, bô koh ū hun-iàn hí-khèng ê siaⁿ, bô lâng oe-bō, bô lâng tiám-teng.

11Choân-kok lóng ōe pha-hng, hō͘ lâng tio̍h-kiaⁿ. Chiah-ê kok-ka ōe ho̍k-sāi Pa-pí-lûn -ông chhit-cha̍p nî.

12Chhit-cha̍p nî móa liáu-āu, góa beh in-ūi Pa-pí-lûn -ông kap chit-ê bîn-cho̍k só͘ hoān ê chōe kā in hêng-hoa̍t, siau-bia̍t chit-ê kok-ka, hō͘ hit-ê tōe éng-oán hong-hòe. Siōng Chú án-ni soan-pò͘.

13Góa beh hō͘ góa chiam-tùi chit-ê kok-ka só͘ kóng ê ōe si̍t-hiān, mā beh hō͘ kì-chài tī chit-pún chheh koan-hē Iâ-lī-bí tùi lia̍t-kok ê ū-giân lóng si̍t-hiān.

14Góa beh chiàu Pa-pí-lûn -lâng ê hêng-ûi kap in ê chhiú só͘ chòe--ê pò-èng in; ōe ū chin chōe kok kap tōa kun-ông lia̍h in khì chòe lô͘-lē.”

15Siōng Chú — Í-sek-lia̍t ê Siōng-tè án-ni kā góa kóng, “Lí tio̍h tùi góa ê chhiú kā chit-poe siū-khì ê chiú chiap--khì, the̍h-khì hō͘ góa phài lí khì ê ta̍k-kok lim.

16In lim-liáu ōe tang-tó-sai-oai, khí-siáu, in-ūi góa beh hō͘ in tú-tio̍h chiàn-loān.”

17Góa chiū tùi Siōng Chú ê chhiú kā chit-poe chiú chiap--kè-lâi, the̍h-khì hō͘ Siōng Chú phài góa khì ê ta̍k-kok lim;

18pau-koat Iâ-lō͘-sat-léng kap Iû-tāi ê siâⁿ-tìn, Iû-tāi ê kun-ông kap léng-siù, hō͘ chiah-ê siâⁿ-tìn pha-hng siū khì-sak; hō͘ lâng thí-chhiò, chiù-chó͘, chhin-chhiūⁿ kin-á-ji̍t án-ni;

19mā pau-koat Ai-ki̍p -ông Hoat-ló, i ê jîn-sîn, léng-siù kap só͘-ū ê jîn-bîn,

20í-ki̍p gōa-cho̍k-lâng, O͘-su tōe-khu ê kun-ông, Hui-lī-sū ê chu-ông: A-si̍t-ki-lûn, Ka-sat, Í-kek-lûn, í-ki̍p A-si̍t-tu̍t chhun--lo̍h-lâi ê lâng;

21Í-tong -lâng, Mô͘-ap -lâng, A-bûn -lâng;

22Thài-ní kap Se-tùn ê kun-ông, Tōe-tiong-hái iân-hái tōe-khu ê kun-ông;

23Tí-tān, Thê-má, Pò͘-su, kap thì pìn-piⁿ ê bîn-cho̍k,

24A-la-pek ê kun-ông, soa-bô͘ tōe-khu ta̍k-cho̍k ê ông;

25Sim-lī, Í-lân, Bí-tí-a só͘-ū ê kun-ông;

26pak-hng bô-lūn hn̄g á-sī kūn ê kun-ông. Choân sè-kài ê ta̍k-kok lóng beh lim chit-poe chiú; chòe-āu Pa-pí-lûn -ông mā tio̍h lim.

27Siōng Chú tùi góa kóng, “Lí tio̍h kā in kóng, ‘Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng: Lín tio̍h lim chit-poe chiú lim kah chùi, lim kah thò͘, lim kah poa̍h-tó, lim kah peh bōe khí--lâi, in-ūi góa beh hō͘ lín tú-tio̍h chiàn-loān.

28In nā m̄-khéng chiap lí chit-poe chiú khì lim, lí tio̍h kā in kóng: Siōng Chú — Bān-kun ê Thóng-sòe án-ni kóng: Lín it-tēng tio̍h lim!

29Góa kì-jiân tùi chit-chō hōng góa ê miâ khí ê siâⁿ khai-sí kàng chai-hō, lín kiám ōe-tàng bián siū hêng-hoa̍t? Lín it-tēng bōe! In-ūi góa í-keng bēng-lēng to-kiàm lâi kong-kek choân-tōe ê chū-bîn. Siōng Chú — Bān-kun ê Thóng-sòe án-ni soan-kò.’

30“Só͘-í lí tio̍h chiong góa kau-tài ê ōe tùi in soan-káng, chek-pī in: Siōng Chú tùi thiⁿ-téng tōa-siaⁿ hoah, tùi I tòa sèng ê só͘-chāi hoah-siaⁿ, I tùi bo̍k-tiûⁿ ê iûⁿ-kûn tōa-siaⁿ hoah; tùi tōe-chiūⁿ só͘-ū ê chū-bîn hoah-siaⁿ, chhin-chhiūⁿ ta̍h phû-tô ê lâng teh hoah.

31Siōng Chú hoah ê siaⁿ ōe thoân kàu thiⁿ-piⁿ-hái-kak, in-ūi I beh khòng-kò bān-cho̍k, beh sím-phòaⁿ só͘-ū ê lâng. Siâ-ok ê lâng, I beh hō͘ in sí tī to-ē. Siōng Chú án-ni soan-kò.”

32Siōng Chú — Bān-kun ê Thóng-sòe koh kóng, “Tio̍h chù-ì, ōe ū chai-lān tùi chit-kok thòaⁿ kàu hit-kok, ōe ū tōa pō-hong tùi sè-kài ê chīn-thâu ká--khí-lâi.

33Kàu hit-ji̍t, tùi tōe ê chit-pêng-thâu kàu hit-pêng-thâu, chi̍t-sì-kòe lóng sī Siōng Chú thâi-sí ê lâng. Bô lâng ūi-tio̍h in thî-khàu, bô lâng kā in siu sin-si, bô lâng kā in tâi; hiah-ê si-thé lóng beh pìⁿ-chòe tōe-bīn ê pùn.

34“Jîn-bîn ê bo̍k-chiá ah, lín tio̍h ai-khàu âu-kiò! Iûⁿ-kûn ê léng-siù ah, lín tio̍h ai-siong, tī thô͘-soa-hún kō-lâi-kō-khì! Lín beh hō͘ lâng châu-bia̍t ê ji̍t-chí kàu lah. Lín ōe siak-tó, chhin-chhiūⁿ kùi-tiōng ê hûi-khì siak kah chhùi-chhùi.

35Bo̍k-chiá bô lō͘ thang tô-cháu; iûⁿ-kûn ê léng-siù mā bô hoat-tō͘ tô-thoat.

36Tio̍h chù-ì thiaⁿ, bo̍k-chiá teh âu-kiò, iûⁿ-kûn ê léng-siù teh ai-khàu, in-ūi Siōng Chú teh húi-hoāi in ê bo̍k-tiûⁿ.

37Siōng Chú hoat-chhut béng-lia̍t ê siū-khì; pêng-an chhiⁿ-chhùi ê bo̍k-tiûⁿ pìⁿ-chòe hong-po͘.

38Siōng Chú chhin-chhiūⁿ siàu-chòng ê sai lī-khui hia̍t; in ê thó͘-tōe, in-ūi khi-ap-chiá ê siū-khì, koh in-ūi Siōng Chú béng-lia̍t ê siū-khì, pìⁿ-chòe pha-hng ê só͘-chāi.”

← Chapter 24 Jump to: Chapter 26 →