Jeremiah 19

Chinese TTVR (現代台語譯本羅馬字版)

← Chapter 18 Jump to: Chapter 20 →

1Siōng Chú án-ni kóng, “Lí tio̍h khì kā sio-hûi-lâng bóe hûi-pân, koh chhōa jîn-bîn tiong-kan ê tiúⁿ-ló kap chè-si tiong-kan siū chun-tiōng--ê,

2kè Hap-ní-se-mn̂g, khì Him-lūn-chú Soaⁿ-kok, tī hia soan-pò͘ góa hoan-hù lí ê ōe,

3kóng, ‘ Iû-tāi kun-ông kap Iâ-lō͘-sat-léng ê chū-bîn, tio̍h thiaⁿ Siōng Chú ê ōe! Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng: Khòaⁿ leh, góa beh kàng chai-hō tī chit-ê só͘-chāi, hō͘ thiaⁿ--tio̍h ê lâng lóng kiaⁿ-chi̍t-tiô.

4In-ūi in kap in ê lia̍t-chó͘, í-ki̍p Iû-tāi kun-ông lóng khì-sak góa, kā in m̄-bat ê sîn-bêng sio-hiuⁿ, hō͘ chit-ê só͘-chāi pìⁿ-chòe gōa-pang-lâng ê tōe, chi̍t-sì-kòe lóng sī bû-ko͘ ê lâng ê huih.

5In koh ūi-tio̍h Pa-le̍k khí soaⁿ-thâu-tôaⁿ, chiong in ê kiáⁿ-jî chòe sio-hòa-chè hiàn hō͘ Pa-le̍k. Góa m̄-bat bēng-lēng in chòe chit-khoán tāi-chì, m̄-bat thê-khí, liân siūⁿ to m̄-bat siūⁿ--kè.

6Lín tio̍h chai, sî-ji̍t chi̍t-ē kàu, chit-ê só͘-chāi bōe koh kiò-chòe Tô-hui-te̍k á-sī Him-lūn-chú Soaⁿ-kok, beh kiò-chòe Tô͘-sat ê soaⁿ-kok. Siōng Chú án-ni soan-kò.

7Góa beh tī chia hō͘ Iû-tāi kap Iâ-lō͘-sat-léng jîn-bîn ê kè-bô͘ lo̍k-khong, mā beh hō͘ in ê tùi-te̍k thâi-iâⁿ, hō͘ in sí tī siàu-siūⁿ in sìⁿ-miā ê lâng ê chhiú; in ê si-thé ōe chiâⁿ-chòe khong-tiong ê pe-chiáu kap tōe-chiūⁿ ê iá-siù ê chia̍h-mi̍h.

8Góa beh hō͘ chit-ê siâⁿ chiâⁿ-chòe thang kiaⁿ-hiâⁿ, hō͘ lâng thí-chhiò ê tùi-siōng; tùi chia keng-kè ê lâng ōe in-ūi in só͘ tú--tio̍h ê chai-hō tio̍h-kiaⁿ, kā in thí-chhiò.

9Tùi-te̍k, chiū-sī siàu-siūⁿ in sìⁿ-miā ê lâng, ōe lâi pau-ûi chit-ê siâⁿ, kā in pek kah in tio̍h chia̍h ka-kī ê kiáⁿ, cha-bó͘-kiáⁿ, í-ki̍p in ê pêng-iú ê bah.’

10“Lí kóng soah, tio̍h kā hit-ê hûi-pân siak-phòa, hō͘ kap lí chòe-hé khì ê lâng chhin-ba̍k khòaⁿ--tio̍h,

11koh kā in kóng, ‘Siōng Chú — Bān-kun ê Thóng-sòe án-ni kóng: Góa beh phah chit-ê siâⁿ kap chiah-ê jîn-bîn, chhin-chhiūⁿ kā sio-hûi-lâng ê hûi-khì siak-phòa, phòa kah bōe-pó͘--tit. Lâng beh tī Tô-hui-te̍k bâi-chòng sí-lâng, tâi kah bô só͘-chāi thang tâi.

12Siōng Chú kóng: Góa beh án-ni tùi-thāi chit-ê só͘-chāi kap chia ê chū-bîn, hō͘ chit-ê siâⁿ kap Tô-hui-te̍k kâng-khoán.

13Iâ-lō͘-sat-léng ê chhù í-ki̍p Iû-tāi kun-ông ê kiong-tiān mā ōe kap Tô-hui-te̍k kâng-khoán siū phah lâ-sâm, in-ūi in tī chhù-téng kā thiⁿ-téng ê bān-siōng sio-hiuⁿ, ǹg pa̍t-ê sîn-bêng hiàn tiān-chiú-chè.’”

14Iâ-lī-bí tùi Siōng Chú chhe i khì thoân-ta̍t bēng-lēng ê Tô-hui-te̍k tò--lâi, khiā tī Siōng Chú sèng-tiān ê tiâⁿ, tùi jîn-bîn kóng,

15“Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng: Khòaⁿ leh, góa beh kàng chai-hō hō͘ chit-ê siâⁿ kap i chiu-ûi ê siâⁿ-tìn, in-ūi hiah-ê chū-bîn ngī-sim kò͘-chip, m̄-khéng thiaⁿ góa ê ōe.”

← Chapter 18 Jump to: Chapter 20 →