Jeremiah 7

Chinese TTVR (現代台語譯本羅馬字版)

← Chapter 6 Jump to: Chapter 8 →

1Siōng Chú ê ōe lîm-kàu Iâ-lī-bí, kóng,

2“Lí tio̍h khì khiā tī Siōng Chú sèng-tiān ê mn̂g-kháu, soan-káng chiah-ê ōe: “Só͘-ū ji̍p-lâi kèng-pài Siōng Chú ê Iû-tāi -lâng, tio̍h chù-ì thiaⁿ Siōng Chú ê ōe.

3“Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng: “Tio̍h kái-chèng lín ê giân-hêng-kú-chí, án-ni góa chiū hō͘ lín tòa tī chit-tè thó͘-tōe.

4M̄-thang siong-sìn hiah-ê pe̍h-chha̍t-ōe, kóng, ‘Che sī Siōng Chú ê tiān! Che sī Siōng Chú ê tiān! Siōng Chú ê tiān tī chia! An-choân lah!’

5“Lín nā si̍t-chāi kái-chèng giân-hêng-kú-chí, tī lâng kap lâng ê tiong-kan si̍t-hêng kong-pêng chèng-ti̍t,

6bô khi-ap kià-ku ê chhut-gōa-lâng, ko͘-jî, kóaⁿ-hū, bô tī chit-ê só͘-chāi bô͘-hāi bû-ko͘ ê lâng, bô pài pa̍t-ê sîn-bêng, kā ka-kī jiá hō-toan,

7góa chiū beh hō͘ lín éng-oán tòa tī góa sù hō͘ lín ê chó͘-sian khiā-khí ê chit-ê só͘-chāi.

8“Lín khòaⁿ, lín kèng-jiân siong-sìn hiah-ê bô lō͘-ēng ê pe̍h-chha̍t-ōe.

9Lín ná ōe-ēng-tit thau-the̍h, bô͘-hāi, kan-îm, chiù ké-chōa, kā Pa-le̍k sio-hiuⁿ, khì tè lín m̄-bat ê sîn-bêng,

10koh lâi chit-keng hōng góa ê miâ khí ê sèng-tiān kèng-pài góa, kóng ‘Goán ū kiù lah’, thang kè-sio̍k khì chòe hiah-ê khó-ò͘ⁿ ê sū?

11Chit-keng hōng góa ê miâ khí ê sèng-tiān, lín kā i khòaⁿ-chòe thó͘-húi-á khut sī--bô? Lín tio̍h chai, lín teh chòe siáⁿ, góa lóng ū khòaⁿ--tio̍h! Siōng Chú án-ni kóng.

12“Lín khì Sī-lô khòaⁿ-bāi--leh. Kó͘-chá, góa tī hia siat-li̍p kèng-pài góa ê só͘-chāi, m̄-kú lín tio̍h khì khòaⁿ, góa in-ūi góa ê chú-bîn Í-sek-lia̍t ê chōe-ok, án-chóaⁿ tùi-hù hit-ê só͘-chāi.

13Hiān-chāi lín chòe chiah-ê tāi-chì, góa it-chài kā lín khoàn-kài, m̄-kú lín lóng m̄ thiaⁿ; kā lín kiò, lín mā m̄ ìn;

14só͘-í, góa beh chhin-chhiūⁿ tùi-hù Sī-lô án-ni húi-hoāi chit-keng lín só͘ óa-khò, hōng góa ê miâ khí ê sèng-tiān, í-ki̍p chit-tè góa sù hō͘ lín kap lín chó͘-sian ê thó͘-tōe.

15Góa mā beh kā lín tùi góa ê bīn-chêng kóaⁿ-cháu, chhin-chhiūⁿ í-chêng góa chiong lín ê chhin-cho̍k Í-hoat-liân ê hō͘-tāi kóaⁿ-cháu siâng-khoán.”

16Lí m̄-bián ūi-tio̍h chit-ê jîn-bîn kî-tó, m̄-bián ūi-tio̍h in tōa-siaⁿ ai-kiû, mā m̄-bián thòe in tùi góa khún-kiû, in-ūi góa lóng bô beh thiaⁿ.

17Lí kiám bô khòaⁿ-tio̍h in tī Iû-tāi ê siâⁿ-tìn kap Iâ-lō͘-sat-léng ê koe-lō͘ teh chhòng sím-mi̍h?

18Gín-á khioh-chhâ, lāu-pē hiâⁿ-hé, lāu-bú chhiau mī-hún chòe piáⁿ, hiàn hō͘ Thian-hō͘, koh kā pa̍t-ê sîn-bêng hiàn tiān-chiú-chè, thiau-kang jiá góa siū-khì.

19Siōng Chú kóng: Kî-si̍t in m̄-sī siong-hāi tio̍h góa, sī siong-tio̍h ka-kī, hāi ka-kī kiàn-siàu.

20Só͘-í Chì-koân ê Siōng Chú án-ni kóng: Góa beh chiong góa béng-lia̍t ê siū-khì piàⁿ tī chit-ê só͘-chāi ê chū-bîn kap tōng-bu̍t sin-chiūⁿ, í-ki̍p chhân-iá ê chhiū-ba̍k kap thó͘-tōe ê chhut-sán. Góa ê siū-khì ōe chhin-chhiūⁿ tōa-hé teh to̍h bô lâng phah ōe hoa.

21Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng, “Lín hiàn-chè ê sî, chòe lín chiong sio-hòa-chè ê bah chham chòe-hé chia̍h-chia̍h--khì.

22Góa chhōa lín ê chó͘-sian chhut Ai-ki̍p ê sî, góa m̄-bat tùi in thê-khí sio-hòa-chè kap kî-tha ê chè-sū, mā m̄-bat bēng-lēng in tio̍h án-ni chòe.

23Góa kan-ta kā in bēng-lēng chit-hāng sū, ‘Lín tio̍h thiaⁿ góa ê ōe, kiâⁿ góa só͘ bēng-lēng lín ê lō͘, góa chiū beh chòe lín ê Siōng-tè, lín chòe góa ê chú-bîn, thang hō͘ lín sū-sū sūn-lī.’

24M̄-kú in m̄ thiaⁿ-thàn, m̄ chù-ì thiaⁿ góa ê ōe, hoán-tńg chiàu in siâ-ok ê sim kò͘-chip pōe-poān góa; m̄-nā bô kái-siān, tian-tò koh-khah pháiⁿ.

25Tùi lín ê chó͘-sian chhut Ai-ki̍p kàu kin-á-ji̍t, góa it-chài phài góa ê po̍k-jîn sian-ti khì in hia.

26M̄-kú in iû-goân m̄ thiaⁿ, m̄ chù-ì thiaⁿ góa ê ōe; tian-tò ngī-sim kò͘-chip, pí in ê lia̍t-chó͘ chòe koh-khah pháiⁿ ê sū.

27“ Iâ-lī-bí, lí tio̍h chiong chiah-ê ōe lóng kā in kóng, m̄-kú in bōe thiaⁿ; lí án-chóaⁿ kā in kiò, in mā bōe kā lí ìn.

28Lí tio̍h kā in kóng, ‘Lín chit-ê bîn-cho̍k m̄ thiaⁿ-thàn Siōng Chú — lín ê Siōng-tè ê ōe, m̄-khéng siū kà-sī. Lín tiong-kan bô koh ū chin-si̍t; lín ê chhùi liân chi̍t kù sêng-si̍t khó-khò ê ōe to bô.’”

29Iâ-lō͘-sat-léng ah, tio̍h thì kng-thâu, kā thâu-mn̂g hiat-ka̍k! Tio̍h tī chhiū-á chhò-liáu-liáu ê soaⁿ-téng chhiùⁿ ai-ko! Siōng Chú í-keng chiong jiá I siū-khì ê sè-tāi pàng-sak lah!

30Iû-tāi ê jîn-bîn chòe góa khòaⁿ-chòe siâ-ok ê sū, tī kèng-pài góa ê sèng-tiān chhāi khó-ò͘ⁿ ê ngó͘-siōng, kā chit-ê tiān phah lâ-sâm. Siōng Chú án-ni kóng.

31In tī Him-lūn-chú Soaⁿ-kok khí Tô-hui-te̍k ê soaⁿ-thâu-tôaⁿ, sio in ê kiáⁿ-jî hiàn chòe chè. Góa m̄-bat bēng-lēng in chòe chit-khoán tāi-chì, liân siūⁿ to m̄-bat siūⁿ--kè.

32Lín tio̍h chai, sî-ji̍t chi̍t-ē kàu, hit-ê só͘-chāi bōe koh kiò-chòe Him-lūn-chú Soaⁿ-kok á-sī Tô-hui-te̍k, beh kiò-chòe “Tô͘-sat ê soaⁿ-kok”. In-ūi pa̍t-ūi bô-kàu só͘-chāi bâi-chòng sí-lâng, in ōe tī Tô-hui-te̍k tâi sin-si. Siōng Chú án-ni soan-kò.

33Chit-ê jîn-bîn ê si-thé, ōe chiâⁿ-chòe khong-tiong ê pe-chiáu kap tōe-chiūⁿ ê iá-siù ê chia̍h-mi̍h; bô lâng lâi kā in kóaⁿ-cháu.

34Hit-sî, góa beh hō͘ Iû-tāi ê siâⁿ-tìn kap Iâ-lō͘-sat-léng ê koe-lō͘ oân-choân bô hoaⁿ-hí khoài-lo̍k ê siaⁿ, bô koh ū hun-iàn hí-khèng ê siaⁿ, in-ūi chit-ê tōe beh pìⁿ-chòe hong-po͘.

← Chapter 6 Jump to: Chapter 8 →