Jeremiah 21

Chinese TTVR (現代台語譯本羅馬字版)

← Chapter 20 Jump to: Chapter 22 →

1Siōng Chú ê ōe lîm-kàu Iâ-lī-bí. Hit-sî, Iû-tāi -ông Se-tí-ka chhe-phài Má-ki-ngá ê kiáⁿ Pa-si-hō͘-ní, kap Má-se-ngá ê kiáⁿ chè-si Se-hoan-ngá khì Iâ-lī-bí hia. In iau-kiû, kóng,

2“ Pa-pí-lûn -ông Nî-pò͘-kah-nî-sat phài kun-tūi lâi kong-táⁿ chit-ê siâⁿ, chhiáⁿ thòe goán khún-kiû Siōng Chú, bô-tiāⁿ-tio̍h Siōng Chú ōe ēng kî-biāu ê hong-hoat hō͘ Nî-pò͘-kah-nî-sat thiat-thè.”

3Iâ-lī-bí chiū tùi in kóng, “Lín khì kā Se-tí-ka kóng,

4‘Siōng Chú — Í-sek-lia̍t ê Siōng-tè án-ni kóng: Se-tí-ka, lí hiah-ê chhut-khì siâⁿ-gōa tí-khòng Pa-pí-lûn -ông kap i ê kun-tūi--ê, góa beh chiong in chhiú--ni̍h gia̍h ê bú-khì lóng siu tò-lâi khǹg tī siâⁿ-lāi.

5Góa beh tī tōa siū-khì tiong ēng só͘-ū ê khùi-la̍t kong-kek lín.

6Góa beh kong-kek siâⁿ-lāi só͘-ū ê jîn-bîn kap tōng-bu̍t, in ōe in-ūi un-e̍k sí.

7Lí kap lí ê koaⁿ-oân, í-ki̍p keng-kè chiàn-loān, un-e̍k, ki-hng chhun--lo̍h-lâi ê lâng, góa beh chiong in kau hō͘ Pa-pí-lûn -ông Nî-pò͘-kah-nî-sat, chiū-sī beh hāi lín sìⁿ-miā ê tùi-te̍k. Pa-pí-lûn -ông bōe lîn-bín lín, bōe tông-chêng lín, ōe ēng to-kiàm thâi-sí lín, bōe chhiú-hā-liû-chêng. Siōng Chú án-ni soan-kò.’”

8Siōng Chú koh hoan-hù Iâ-lī-bí tùi jîn-bîn kóng, “Siōng Chú án-ni kóng, ‘Góa kā oa̍h-lō͘ kap sí-lō͘ pâi tī lín ê bīn-chêng, lín ka-kī soán-te̍k.

9Lâu tī siâⁿ-lāi ê lâng, nā m̄-sī hō͘ lâng thâi-sí, chiū-sī gō-sí á-sī pīⁿ-sí; m̄-kú lín nā chhut-siâⁿ khì kā Pa-pí-lûn -lâng tâu-hâng, chiū ōe oa̍h.

10Góa í-keng koat-tēng bô beh sù hok-khì, beh kàng chai-hō tī chit-ê siâⁿ. Chit-ê siâⁿ beh kau tī Pa-pí-lûn -ông ê chhiú; i ōe pàng-hé sio chit-ê siâⁿ.’ Siōng Chú án-ni soan-kò.”

11Siōng Chú hoan-hù Iâ-lī-bí kā Tāi-pi̍t ê hō͘-tāi — Iû-tāi ông-sek kóng, “Lín tio̍h chù-ì thiaⁿ góa Siōng Chú kóng ê ōe. Lín ta̍k-ji̍t tio̍h péng-kong-hêng-gī, tùi khi-ap ê lâng ê chhiú kái-kiù siū ap-chè ê lâng, chiah bián lín siâ-ok ê hêng-ûi jiá góa siū-khì, chhin-chhiūⁿ hé teh to̍h bô lâng phah ōe hoa.

13Iâ-lō͘-sat-léng, góa beh kong-kek lí; lí chē tī koân-koân ê soaⁿ-téng, chhin-chhiūⁿ tōa chio̍h chhāi tī pêng-goân. Lí khoa-kháu bô lâng ōe-tàng kong-kek lí, ōe-tàng kong-ji̍p lí tô-siám ê só͘-chāi.

14M̄-kú, góa beh in-ūi lí ê hêng-ûi kā lí chhú-hoa̍t. Góa beh pàng-hé sio Iâ-lō͘-sat-léng ê kiong-tiān; tōa-hé ōe thun-bia̍t siâⁿ sì-chiu-ûi só͘-ū ê it-chhè. Siōng Chú án-ni soan-kò.”

← Chapter 20 Jump to: Chapter 22 →