Jeremiah 49

Chinese TTVR (現代台語譯本羅馬字版)

← Chapter 48 Jump to: Chapter 50 →

1Koan-hē A-bûn -lâng, Siōng Chú án-ni kóng, “ Í-sek-lia̍t lóng bô lâng sī--bô? Lín lóng bô lâng thang kè-sêng sán-gia̍p sī--bô? Sī-án-chóaⁿ hō͘ pài Bí-le̍k-kong ê lâng chhim-chiàm Ka-tek chi-cho̍k ê thó͘-tōe, tòa tī hiah-ê siâⁿ?

2“Siōng Chú kóng: Khòaⁿ leh, sî-ji̍t chi̍t-ē kàu, A-bûn -lâng ê siú-to͘ La-pa ōe thoân-chhut kau-chiàn ê siaⁿ, La-pa ōe pìⁿ-chòe hong-hòe ê thô͘-tui; in ê siâⁿ-tìn ōe hō͘ hé sio. Í-chêng in chhim-chiàm Í-sek-lia̍t, hiān-chāi Í-sek-lia̍t ōe tùi in siu-hôe kok-thó͘.

3Hi-si̍t-pún -lâng, tio̍h ai-khàu, in-ūi Ai -siâⁿ pìⁿ-chòe hong-po͘. La-pa ê chū-bîn, tio̍h âu-kiò, the̍h môa-pò͘ hâ-io; tio̍h thî-khàu, tī siâⁿ-chhiûⁿ lāi sì-kòe chông; in-ūi Bí-le̍k-kong kap i ê chè-si, í-ki̍p koaⁿ-oân ōe chòe-chi̍t-ē hō͘ lâng lia̍h--khì.

4Pōe-poān ê chú-bîn ah, lín sī-án-chóaⁿ teh khoa-kháu ka-kī ê khùi-la̍t? Lín ê khùi-la̍t í-keng chiām-chiām soe-thè, ná iáu-teh óa-khò ka-kī ê châi-pó, siūⁿ-kóng bô lâng ōe lâi chhim-hoān?

5Chì-koân Siōng Chú — Bān-kun ê Thóng-sòe án-ni kóng: Khòaⁿ leh, lín ōe hō͘ tùi chiu-ûi kok-ka lâi ê khióng-pò͘ pau-ûi; lín beh tô-cháu, sûi-lâng kò͘ sìⁿ-miā, bô lâng ōe-tàng kā chiah-ê sì-sòaⁿ ê lān-bîn chū-chi̍p--khí-lâi.

6“M̄-kú, āu-lâi góa ōe hō͘ siū-lia̍h ê A-bûn -lâng tò-tńg--lâi.” Siōng Chú án-ni soan-pò͘.

7Koan-hē Í-tong, Siōng Chú — Bān-kun ê Thóng-sòe án-ni kóng, “Tī Thê-bān bōe-tàng koh chhē-tio̍h tì-hūi sī--bô? Bêng-lí ê lâng bô hoat-tō͘ thang thê-kiong hó ê kiàn-gī sī--bô? In ê tì-hūi lóng bô--khì sī--bô?

8Tí-tān ê chū-bîn ah, kóaⁿ-kín thiat-thè tô-cháu, khì bih--khí-lâi; góa hêng-hoa̍t Í-sò ê sî kàu lah, góa beh kàng chai-hō hō͘ i.

9Bán-phû-tô--ê nā khì lí hia, kiám bōe lâu tām-po̍h? Chha̍t nā mî--sî lâi thau, kiám m̄-sī the̍h in só͘ ài ê mi̍h nā-tiāⁿ?

10M̄-kú góa beh kā Í-sò pak kah kng-liu-liu; i ún-ba̍t ê só͘-chāi ōe lō͘-hiān, bô só͘-chāi thang bih; i ê hō͘-tāi, chhin-cho̍k, chhù-piⁿ lóng ōe siū siau-bia̍t, bô chhun pòaⁿ-ê.

11Tio̍h chiong lín ê ko͘-jî pàng hō͘ góa, góa ōe pó-choân in ê sìⁿ-miā; lín ê kóaⁿ-hū mā tio̍h óa-khò góa.”

12Siōng Chú kóng, “Lí khòaⁿ, liân hiah-ê bô eng-kai siū hêng-hoa̍t--ê mā tio̍h lim hêng-hoa̍t ê poe, lí kiám ōe-tàng bián siū hêng-hoa̍t? Bô khó-lêng! Lí it-tēng tio̍h lim.

13Góa kí ka-kī li̍p-sè, Pho-su-la ōe pìⁿ-chòe hong-hòe ê só͘-chāi, siū lêng-jio̍k, siū chiù-chó͘, hō͘ lâng tio̍h-kiaⁿ; hù-kūn ê siâⁿ-tìn mā ōe éng-oán pha-hng.” Siōng Chú án-ni soan-pò͘.

14Góa tùi Siōng Chú hia thiaⁿ-tio̍h siau-sit, I chhe sù-chiá khì lia̍t-kok, kóng, “Lín tio̍h chū-chi̍p lâi kong-kek Í-tong, kap i kau-chiàn.”

15Siōng Chú tùi Í-tong kóng, “Góa beh hō͘ lí tī lia̍t-kok tiong pìⁿ-chòe jio̍k-siáu, hō͘ sè-kan-lâng khòaⁿ-khin.

16Lín tòa tī chio̍h-tōng lāi, tī soaⁿ-téng teh kò͘-siú, sui-jiân chhin-chhiūⁿ eng-chiáu choh-siū tī koân ê só͘-chāi, góa mā beh tùi hia kā lí thoa--lo̍h-lâi; lí m̄-thang hō͘ ka-kī ê siaⁿ-sè, sim-lāi ê kiau-ngō͘ phiàn--khì.” Siōng Chú án-ni soan-pò͘.

17Siōng Chú kóng, “ Í-tong ōe hō͘ lâng gông-ngia̍h, tùi hia keng-kè ê lâng lóng ōe tio̍h-kiaⁿ, koh in-ūi i tú--tio̍h ê chai-hō kā i thí-chhiò. Chhin-chhiūⁿ Só͘-to-má, Gô-mô͘-la kap hù-kūn ê siâⁿ-tìn tó-hoāi, Í-tong mā ōe án-ni siū húi-bia̍t, bōe koh ū lâng tòa, mā bōe koh ū lâng tī hia kià-ku.

19Góa beh chhin-chhiūⁿ sai tùi Iok-tàn hô-piⁿ ê chhiū-nâ chhut--lâi, khì kong-kek chhiⁿ-chhùi chháu-po͘ ê iûⁿ-kûn, chin kín kā in kóaⁿ-cháu, lī-khui in ê kok-thó͘. Góa kéng-soán sím-mi̍h-lâng, chiū phài i thóng-tī chit-ê kok-ka. Siáⁿ-lâng ōe-tàng kap góa pí? Siáⁿ-lâng káⁿ thoân góa chhut-têng? Tó chit-ê thóng-tī-chiá káⁿ tùi-khòng góa?

20Lín tio̍h thiaⁿ Siōng Chú kong-kek Í-tong kap Thê-bān chū-bîn ê kè-ōe; in liân siōng jio̍k-siáu--ê to ōe hō͘ lâng thoa--khì. Góa it-tēng ōe hō͘ in khiā-khí ê só͘-chāi hong-hòe.

21Í-tong tó-hoāi ê siaⁿ ōe hō͘ tōe tōa tín-tāng; lâng hoah-hiu ê siaⁿ ōe thàng kàu Âng-hái.

22I ê tùi-te̍k ōe chhin-chhiūⁿ eng-chiáu thí-si̍t chhiong lo̍h-lâi kong-kek Pho-su-la; hit-sî, Í-tong chiàn-sū ê sim ōe chhin-chhiūⁿ chhui-chūn ê hū-jîn-lâng hiah-ni̍h thàng-thiàⁿ.”

23Koan-hē Tāi-má-sū-kek, Siōng Chú kóng, “ Hap-má kap A-ní-poa̍t ê lâng hui-siông put-an; in thiaⁿ-tio̍h pháiⁿ siau-sit chiū sit-táⁿ, chhin-chhiūⁿ hái-éng lōng-lōng-kún, bōe pêng-chēng.

24Tāi-má-sū-kek ê lâng sit-khì ióng-khì, in oa̍t-tńg-sin beh tô-cháu, soah hō͘ thòng-khó͘ iu-chhiû khîⁿ-tiâu-tiâu, chhin-chhiūⁿ chhui-chūn ê hū-jîn-lâng kâng-khoán.

25Chit-ê hō͘ lâng o-ló ê siâⁿ, góa só͘ hoaⁿ-hí ê siâⁿ, sī-án-chóaⁿ ōe siū pàng-sak, oân-choân pha-hng?

26In ê siàu-liân-lâng ōe tī kóng-tiûⁿ hō͘ lâng thâi-sí; kâng hit-ji̍t, in ê chiàn-sū ōe hō͘ lâng châu-bia̍t. Góa beh pàng-hé sio Tāi-má-sū-kek ê siâⁿ-chhiûⁿ, sio-húi Piān Hap-ta̍t ê kiong-tiān.” Siōng Chú — Bān-kun ê Thóng-sòe án-ni soan-pò͘.

28Koan-hē hō͘ Pa-pí-lûn -ông Nî-pò͘-kah-nî-sat phah-pāi ê Ki-ta̍t kap Hā-só hiah-ê kok-ka, Siōng Chú án-ni kā Pa-pí-lûn -lâng kóng, “Khí--lâi, chiūⁿ-khì kong-kek Ki-ta̍t, châu-bia̍t hiah-ê tang-hng ê lâng.

29Khì chhiúⁿ in ê pò͘-pîⁿ kap iûⁿ-kûn, í-ki̍p in ê tiùⁿ-bō͘ kap só͘-ū ê kang-khū; lo̍k-tô mā lóng kā chhiúⁿ--khì; tio̍h kā in hoah kóng, ‘Lín hō͘ khióng-pò͘ pau-ûi lah!’

30“Siōng Chú kóng: Hā-só ê chū-bîn, tio̍h kóaⁿ-kín tô-cháu, cháu-khì hn̄g koh chhim ê só͘-chāi bih--khí-lâi; in-ūi Pa-pí-lûn -ông Nî-pò͘-kah-nî-sat siat-kè beh hāi lín, koat-tēng beh kong-kek lín.

31“Siōng Chú koh kóng: Khí--lâi! Khì kong-kek hiah-ê bô-khòa-bô-lū an-jiân khiā-khí ê lâng, in bô siâⁿ-mn̂g, bô mn̂g-chhòaⁿ, sī ka-kī tan-to̍k khiā-khí ê chū-bîn.

32In ê lo̍k-tô ōe hō͘ lâng chhiúⁿ--khì; in chōe-chōe cheng-siⁿ ōe hō͘ lâng kiap--khì; góa beh kā só͘-ū thì pìn-piⁿ ê lâng kóaⁿ-sòaⁿ khì ta̍k só͘-chāi; góa beh tùi sì-chiu-ûi kàng chai-hō hō͘ in. Hā-só ōe chiâⁿ-chòe chhâi-lông tòa ê só͘-chāi, éng-oán hong-hòe, bô lâng khiā-khí, mā bô lâng tī hia kià-ku.” Siōng Chú án-ni soan-pò͘.

34Iû-tāi -ông Se-tí-ka tú chē-ūi ê sî, koan-hē Í-lân, Siōng Chú ê ōe lîm-kàu sian-ti Iâ-lī-bí.

35Siōng Chú — Bān-kun ê Thóng-sòe án-ni kóng, “Khòaⁿ leh, góa beh at-chi̍h Í-lân -lâng ê keng, che sī in sio-chiàn ê sî siōng chú-iàu ê bú-le̍k.

36Góa beh hō͘ hong tùi thiⁿ ê sì-bīn chhe--lâi, kā Í-lân -lâng kóaⁿ-sòaⁿ khì ta̍k só͘-chāi; choân-tōe ta̍k-kok lóng ū Í-lân ê lān-bîn.

37Siōng Chú koh kóng: Góa beh hō͘ Í-lân -lâng tī siàu-siūⁿ in ê sìⁿ-miā ê tùi-te̍k bīn-chêng kiaⁿ-hiâⁿ; góa beh tùi in hoat siū-khì, kàng chai-hō hō͘ in, koh beh ēng chiàn-cheng kā in thiat-tóe siau-bia̍t.

38Siōng Chú kóng: Góa beh siau-bia̍t Í-lân ê kun-ông kap koaⁿ-oân, tī hia siat-li̍p góa ê pó-chō.

39M̄-kú chiong-lâi ū chi̍t ji̍t, góa beh hō͘ Í-lân siū-lia̍h ê lâng tò-tńg--lâi.” Siōng Chú án-ni soan-pò͘.

← Chapter 48 Jump to: Chapter 50 →