Jeremiah 11

Chinese TTVR (現代台語譯本羅馬字版)

← Chapter 10 Jump to: Chapter 12 →

1Siōng Chú tùi góa kóng,

2“Lí tio̍h thiaⁿ chheng-chhó chit-ê iok ê lōe-iông, jiân-āu kā Iû-tāi -lâng kap Iâ-lō͘-sat-léng ê chū-bîn soan-pò͘.

3Lí tio̍h tùi in kóng, ‘Siōng Chú — Í-sek-lia̍t ê Siōng-tè án-ni kóng: M̄ thiaⁿ-thàn chit-ê iok ê ōe ê lâng, it-tēng ōe siū chiù-chó͘.

4Chit-ê iok sī góa chhōa lín ê chó͘-sian chhut Ai-ki̍p, thoat-lī chù-thih ê hé-lô͘ ê sî bēng-lēng in--ê, kóng: Lín tio̍h thiaⁿ-thàn góa ê ōe, si̍t-hêng góa só͘ bēng-lēng lín--ê, án-ni lín chiū thang chiâⁿ-chòe góa ê chú-bîn, góa chòe lín ê Siōng-tè,

5thang si̍t-hiān góa tùi lín ê chó͘-sian só͘ li̍p-sè--ê, chiong lín kin-á-ji̍t khiā-khí chit-tè lâu lin kap bi̍t ê tōe sù hō͘ in.’” Góa ìn kóng, “Siōng Chú, Amen!”

6Siōng Chú koh tùi góa kóng, “Lí tio̍h khì Iû-tāi ê siâⁿ-tìn kap Iâ-lō͘-sat-léng ê koe-lō͘ soan-pò͘, ‘Lín tio̍h chhiat-si̍t chun-hêng chit-ê iok ê ōe.

7Góa tùi chhōa lín ê chó͘-sian lī-khui Ai-ki̍p hit-ji̍t kàu kin-á-ji̍t, it-chài giâm-giâm kā in kéng-kài, kiò in tio̍h thiaⁿ-thàn góa ê ōe.

8M̄-kú in m̄-nā bô beh chù-ì thiaⁿ, koh chiàu in kò͘-chip siâ-ok ê sim chòe tāi-chì. In-ūi in m̄ chiàu góa ê bēng-lēng chun-siú chit-ê iok, só͘-í góa chiàu chit-ê iok kā in hêng-hoa̍t.’”

9Siōng Chú koh tùi góa kóng, “Tī Iû-tāi -lâng kap Iâ-lō͘-sat-léng ê chū-bîn tiong-kan, ū lâng kè-bô͘ beh pōe-poān góa.

10In koh tńg-khì hoān in ê chó͘-sian m̄ thiaⁿ-thàn góa ê ōe ê chōe, khì ho̍k-sāi pa̍t-ê sîn-bêng. Í-sek-lia̍t -ke kap Iû-tāi -ke lóng phò-hoāi góa kap in chó͘-sian só͘ li̍p ê iok.

11Só͘-í, Siōng Chú án-ni kóng, ‘Góa beh kàng chai-hō hō͘ in, in bô hoat-tō͘ cháu-siám. In kā góa ai-kiû, góa mā m̄ thiaⁿ.

12Hit-sî, Iû-tāi ta̍k siâⁿ-tìn ê lâng kap Iâ-lō͘-sat-léng ê chū-bîn, ōe khì ai-kiû in sio-hiuⁿ ho̍k-sāi ê sîn-bêng. M̄-kú tī in tú-tio̍h chai-lān ê sî, chiah-ê sîn-bêng lóng bōe-tàng kā in kái-kiù.

13Iû-tāi ah, lín ê sîn-bêng chhin-chhiūⁿ lín ê siâⁿ-tìn hiah chōe; lín ūi-tio̍h thang kiàn-siàu ê Pa-le̍k só͘ khí sio-hiuⁿ ê tôaⁿ, chhin-chhiūⁿ Iâ-lō͘-sat-léng ê koe-lō͘ hiah chōe.’

14Iâ-lī-bí ah, lí m̄-bián ūi-tio̍h chiah-ê jîn-bîn kî-tó, m̄-bián ūi-tio̍h in tōa-siaⁿ khún-kiû, in-ūi in tú-tio̍h chai-lān ê sî tùi góa ai-kiû, góa bô beh kā thiaⁿ.”

15Siōng Chú tùi Iû-tāi -lâng kóng, “Góa só͘ thiàⁿ ê chú-bîn, lín chòe hiah chōe pháiⁿ, iáu ōe-tàng tī góa ê sèng-tiān chhòng sím-mi̍h? Lín hē-goān, hiàn bah, kiám chiū ōe kā lín siau-tû chai-hō, hō͘ lín sim-an hoaⁿ-hí?

16Góa Siōng Chú bat kā lín hō-miâ chòe chhiⁿ-chhùi, bō͘-sēng, kiat kah kui-châng ké-chí ê kaⁿ-ná-chhiū, m̄-kú taⁿ góa beh ēng lûi-kong sih-nà sio i ê chhiū-hio̍h, kòng-tn̄g i ê chhiū-oe.

17“Góa Siōng Chú — Bān-kun ê Thóng-sòe kā lín chai-chèng, m̄-kú taⁿ í-keng soan-pò͘ beh kàng chai-hō kong-kek lín; in-ūi Í-sek-lia̍t -lâng kap Iû-tāi -lâng lóng chòe pháiⁿ, ǹg Pa-le̍k sio-hiuⁿ, jiá góa siū-khì.”

18Siōng Chú chí-sī góa, góa chiah chai ū lâng beh tùi-hù góa.

19Góa chhin-chhiūⁿ chi̍t chiah beh hō͘ lâng khan-khì thâi sûn-liông ê iûⁿ-á, m̄ chai in siat-kè beh bô͘-hāi góa. In kóng, “Lán kā chit-châng chhiū kap i ê ké-chí lóng húi-tiāu! Lán lâi kā chit-ê lâng thâi--sí, hō͘ lâng bōe-kì-tit i ê miâ.”

20Góa chiū kî-tó kóng, “Siōng Chú — Bān-kun ê Thóng-sòe! Lí kàm-chhat lâng ê sim-su liām-thâu, chiàu kong-gī sím-phòaⁿ. Góa chiong góa ê àn-kiāⁿ kau hō͘ lí, kiû lí hō͘ góa khòaⁿ-tio̍h lí thòe góa chú-chhî kong-tō.”

21A-ná-tu̍t -lâng tùi góa kóng, “Lí bōe-ēng-tit hōng Siōng Chú ê miâ thoân-ta̍t I ê ōe, chiah bián sí tī goán ê chhiú-thâu.” Chiam-tùi hiah-ê beh bô͘-hāi góa ê A-ná-tu̍t -lâng,

22Siōng Chú — Bān-kun ê Thóng-sòe án-ni kóng, “Góa beh hêng-hoa̍t A-ná-tu̍t -lâng, in ê siàu-liân-lâng beh sí tī to-ē, in ê hāu-siⁿ cha-bó͘-kiáⁿ beh in-ūi ki-hng sí.

23In liân chi̍t ê to bōe-tàng lâu--teh, in-ūi góa hêng-hoa̍t in ê sî, góa beh kàng chai-hō hō͘ in.”

← Chapter 10 Jump to: Chapter 12 →