Jeremiah 6

Chinese TTVR (現代台語譯本羅馬字版)

← Chapter 5 Jump to: Chapter 7 →

1Piān-ngá-bín -lâng, tio̍h tô-miā! Kóaⁿ-kín cháu lī-khui Iâ-lō͘-sat-léng! Tio̍h tī Thê-ko-a pûn sàu-kak; tī Pek Hap-ki-lîm khí hé-hun chòe sìn-hō! Chai-lān kap giâm-tiōng ê húi-hoāi tùi pak-hng pek óa--lâi lah!

2Sek-an sui-jiân chhin-chhiūⁿ súi koh iù-siù ê lú-chú, m̄-kú góa beh kā lí húi-bia̍t.

3Chhin-chhiūⁿ bo̍k-chiá chhōa iûⁿ-kûn, lia̍t-kok ê kun-ông beh chhōa kun-tūi lâi, tī chit-ê siâⁿ ê chiu-ûi chat-iâⁿ kong-kek i.

4In beh hā-lēng, “Chún-pī chhut-chiàn! Lâi, thàn tiong-tàu lán lâi-khì kā in kong-kek!” Ū lâng ōe kóng, “Chin bái! Ji̍t-thâu teh-beh lo̍h-soaⁿ, teh-beh àm lah.”

5“Khí--lâi! Lán tio̍h thàu-mî kā kong-kek, húi-hoāi in ê pó-lúi!”

6Siōng Chú — Bān-kun ê Thóng-sòe án-ni kóng, “Lín tio̍h chhò chhiū-á, chō thô͘-tui, kong-kek Iâ-lō͘-sat-léng. Chit-ê siâⁿ chhiong-móa khi-ap pak-siah, eng-kai siū hêng-hoa̍t.

7Chíⁿ án-chóaⁿ chhèng chúi chhut--lâi, chit-ê siâⁿ mā kâng-khoán chōe-ok koàn-boán, kui-ê siâⁿ lóng ōe-tàng thiaⁿ-tio̍h pō-le̍k kap húi-hoāi ê siaⁿ; góa mā put-sî khòaⁿ-tio̍h siâⁿ-lāi ū pīⁿ-thiàⁿ kap siong-hûn.

8Iâ-lō͘-sat-léng, lí tio̍h siū koán-kàu, chiah bián góa kap lí so͘-oán, hō͘ lí pìⁿ-chòe hong-hòe bô lâng tòa ê só͘-chāi.”

9Siōng Chú — Bān-kun ê Thóng-sòe án-ni kóng, “ Í-sek-lia̍t só͘ chhun ê lâng lóng ōe hō͘ lâng lia̍h--khì, chhin-chhiūⁿ phû-tô hō͘ lâng bán-liáu-liáu; lí tio̍h chhin-chhiūⁿ bán phû-tô ê lâng, chhiú koh chhun ji̍p-khì phû-tô-tîn kā bán hō͘ chheng-khì.”

10Góa ìn kóng, “Góa nā kā lâng thoân-ta̍t lí ê ōe, kā lâng kéng-kò, kiám ū lâng beh thiaⁿ? In kā hī-á that--khí-lâi, bô beh thiaⁿ. In chiong Siōng Chú ê ōe tòng-chòe sńg-chhiò, chi̍t-sut-á to bô ài thiaⁿ.

11M̄-kú góa móa-pak lóng sī Siōng Chú ê siū-khì, tòng bōe tiâu.” Siōng Chú tùi góa kóng, “Lí tio̍h chiong góa ê siū-khì piàⁿ tī koe-lō͘ ê gín-á kap kiat kui-kûn ê siàu-liân-lâng sin-chiūⁿ; hiah-ê ang-bó͘, lāu-lâng, tn̂g-hè-siū--ê, lóng ōe hō͘ lâng lia̍h--khì.

12Góa beh hō͘ in ê chhù, chhân-hn̂g, kap in ê bó͘, lóng pìⁿ-chòe pa̍t-lâng ê; góa beh chhun-chhiú kong-kek chit-tè thó͘-tōe ê chū-bîn. Siōng Chú án-ni soan-kò.

13In tùi siōng pi-bî--ê kàu siōng ū koân-sè--ê lóng siàu-siūⁿ put-gī-chi-châi; liân sian-ti kap chè-si to lóng hêng-ûi khúi-chà.

14Góa ê chú-bîn siū-tio̍h siong-hāi, in lóng bô-iàu-bô-kín. In kóng, ‘Pêng-an bô-sū! Pêng-an bô-sū!’ Kî-si̍t lóng bô pêng-an.

15In chòe khó-ò͘ⁿ ê sū, kiám chai kiàn-siàu? In si̍t-chāi ū-kàu bōe-kiàn-siàu! In ōe chhin-chhiūⁿ pa̍t-kok ê lâng hō͘ tùi-te̍k thâi--sí; góa kā in hêng-hoa̍t, in ōe oân-choân húi-bia̍t.” Siōng Chú án-ni soan-kò.

16Siōng Chú tùi I ê chú-bîn kóng, “Lín tio̍h tī lō͘--ni̍h chù-ì koan-chhat, kā lâng mn̄g kó͘-chá ê lō͘, khòaⁿ hit-tiâu siōng-hó ê lō͘ tī tó-ūi, chiū khì kiâⁿ; án-ni, lín ê sim-sîn chiū ōe tit-tio̍h an-hioh.” M̄-kú in kóng, “M̄! Goán bô beh kiâⁿ hit-tiâu lō͘.”

17Siōng Chú koh kā in chí-phài siú-bōng ê ōe-peng, kiò in tio̍h thiaⁿ sàu-kak ê siaⁿ. M̄-kú in kóng, “M̄! Goán bô beh thiaⁿ.”

18Só͘-í, Siōng Chú kóng, “Lia̍t-kok ah, thiaⁿ leh! Kiàn-chèng-jîn ah, tio̍h koan-chhat, khòaⁿ in ōe tú-tio̍h sím-mi̍h tāi-chì.

19Tāi-tōe ah, thiaⁿ leh! Góa beh hō͘ chiah-ê jîn-bîn siū chai-lān, che sī in kan-kan-kúi-kúi ê hō͘-kó; in m̄ thiaⁿ-thàn góa ê ōe, kū-choa̍t góa ê lu̍t-hoat.

20In hiàn Sī-pa ê jú-hiuⁿ hō͘ góa, tòa chin hn̄g ê só͘-chāi chhut-sán ê chhiong-pô͘ lâi hō͘ góa, góa chiah bô teh hi-hán. Lín ê sio-hòa-chè, góa bô beh chiap-la̍p; lín ê seng-lé, góa bô hoaⁿ-hí.

21Só͘-í, góa beh kā poàn-kha-chio̍h hē tī chiah-ê jîn-bîn ê thâu-chêng, hō͘ pē kap kiáⁿ chòe-hé poa̍h-tó, hō͘ chhù-piⁿ kap pêng-iú lóng bia̍t-bông.”

22Siōng Chú án-ni kóng, “Ū chi̍t ê bîn-cho̍k beh tùi pak-hng lâi; ū chi̍t ê kiông ê kok-ka tùi chin hn̄g ê só͘-chāi chún-pī beh chhut-cheng.

23In gia̍h keng gia̍h chhiuⁿ, chân-jím bô-chêng; in ê siaⁿ chhin-chhiūⁿ hái-éng hōa-hōa-háu. Sek-an ê chū-bîn ah, in khiâ chiàn-bé, thoân-kiat tâng-sim, pâi-tīn beh kong-kek lí.”

24Iâ-lō͘-sat-léng ê chū-bîn kóng, “Goán thiaⁿ-tio̍h in ê siau-sit, chhiú lóng nńg--lo̍h-khì; goán hui-siông thòng-khó͘, chhin-chhiūⁿ sán-hū teh chhui-chūn.

25M̄-thang chhut-khì iá-gōa, mā m̄-thang cháu-khì koe-lō͘, in-ūi chi̍t-sì-kòe ū bú-chong ê tùi-te̍k, lóng chin khióng-pò͘.”

26Siōng Chú tùi I ê chú-bîn kóng, “Tio̍h chhēng môa-saⁿ sám hé-hu, tio̍h chhin-chhiūⁿ sí ko͘-kiáⁿ tōa-siaⁿ ai-khàu, in-ūi chân-hāi sìⁿ-miā--ê ōe hut-jiân lâi kong-kek lín.”

27Siōng Chú tùi Iâ-lī-bí kóng, “Góa beh hō͘ lí tī góa ê chú-bîn tiong-kan, chhin-chhiūⁿ kàm-tēng-su, chhin-chhiūⁿ khó-chhat-koaⁿ, phêng-phòaⁿ khó-giām in ê só͘-chòe.

28In chhin-chhiūⁿ tâng kap thih hiah-ni̍h kò͘-chip pōe-poān góa; chō-iâu jiá tāi-chì, kui-ê hú-pāi-liáu-liáu.

29Lâng tōa-la̍t iô hong-kūi, lô͘ ê hé hiâⁿ koh-khah iām, kā iân sio-iûⁿ; liān liáu koh liān, m̄-kú lóng bô-chhái-kang, in-ūi in ê siâ-ok tû bōe chīn, chhin-chhiūⁿ iân ê cha̍p-chit iûⁿ bōe tiāu.

30In ōe hō͘ lâng kiò-chòe ‘bô kè-ta̍t ê gûn’, in-ūi Siōng Chú í-keng kā in tàn hiat-ka̍k.”

← Chapter 5 Jump to: Chapter 7 →