Proverbs 2

Welsh 1955 (Beibl William Morgan - Argraffiad 1955)

← Chapter 1 Jump to: Chapter 3 →

1Fy mab, os derbynni di fy ngeiriau, ac os cuddi fy ngorchmynion gyda thi;

2Fel y parech i'th glust wrando ar ddoethineb, ac y gogwyddech dy galon at ddeall;

3Ie, os gwaeddi ar ôl gwybodaeth, os cyfodi dy lef am ddeall;

4Os ceisi hi fel arian, os chwili amdani fel am drysorau cuddiedig;

5Yna y cei ddeall ofn yr ARGLWYDD, ac y cei wybodaeth o DDUW.

6Canys yr ARGLWYDD sydd yn rhoi doethineb: allan o'i enau ef y mae gwybodaeth a deall yn dyfod.

7Y mae ganddo ynghadw i'r rhai uniawn wir ddoethineb: tarian yw efe i'r sawl a rodiant yn uniawn.

8Y mae efe yn cadw llwybrau barn, ac yn cadw ffordd ei saint.

9Yna y cei di ddeall cyfiawnder, a barn, ac uniondeb, a phob llwybr daionus.

10Pan ddelo doethineb i mewn i'th galon, a phan fyddo hyfryd gan dy enaid wybodaeth;

11Yna cyngor a'th gynnal, a synnwyr a'th geidw:

12I'th achub oddi wrth y ffordd ddrwg, ac oddi wrth y dyn a lefaro drawsedd;

13Y rhai a ymadawant â llwybrau uniondeb, i rodio mewn ffyrdd tywyllwch;

14Y rhai a ymlawenychant i wneuthur drwg, ac a ymddigrifant yn anwiredd y drygionus;

15Y rhai sydd â'u ffyrdd yn geimion, ac yn gildyn yn eu llwybrau:

16I'th wared oddi wrth y fenyw estronaidd, oddi wrth y ddieithr wenieithus ei geiriau;

17Yr hon a ymedy â llywodraethwr ei hieuenctid, ac a ollwng dros gof gyfamod ei DUW.

18Canys y mae ei thŷ yn gŵyro at angau, a'i llwybrau at y meirw.

19Pwy bynnag a elo i mewn ati hi, ni ddychwelant, ac nid ymafaelant yn llwybrau y bywyd.

20Fel y rhodiech di ar hyd ffordd gwŷr da, a chadw llwybrau y cyfiawn.

21Canys y gwŷr cyfiawn a breswyliant y ddaear, a'r rhai perffaith a gânt aros ynddi.

22Ond yr annuwiolion a dorrir oddi ar y ddaear, a'r troseddwyr a ddiwreiddir allan ohoni.

← Chapter 1 Jump to: Chapter 3 →