Isaiah 1

Ilonggo (Maayong Balita nga Biblia (2012))

Jump to: Chapter 2 →

1Ini nga libro nagasugid sang mga mensahe ni Isaias nga anak ni Amoz, nahanungod sa Juda kag Jerusalem nga ginpahayag sang Dios sang panahon nga sanday Uzias, Jotam, Acaz, kag Ezequias amo ang mga hari sang Juda.

2Magpamati kamo, O duta kag langit, kay ang Ginoo nagsiling: “Ang mga anak nga akon ginsagod nagbato sa akon.

3Ang mga baka nakakilala sang ila agalon, kag ang mga asno nakatultol sang pasungan nga ginapakan-an sa ila sang ila agalon. Mas maayo pa sila sang sa akon mga tawo nga Israelinhon, kay ang akon mga tawo wala makahangop.”

4Tapos ka gid, ikaw nga makasasala nga pungsod. Kamo nga dunot kag malaut nga mga tawo! Ang inyo mga sala nagadaldal sa inyo sa kalainan! Ginsikway kag gintalikdan ninyo ang Ginoo, ang balaan nga Dios sang Israel.

5Ngaa nagapadayon kamo sa pagbato sa iya? Luyag pa gid bala kamo nga silutan? O Israel, ang imo ulo nalikupan na sing mga pilas, kag ang imo tagipusoon kag hunahuna masakiton.

6Halin sa imo alimpudwan tubtob sa imo dapadapa wala gid sing bahin nga maayo. Puno ikaw sing mga lagob, mga hubag kag mga pilas. Ang imo mga pilas wala mahugasi ukon mabugkosi. Wala ini mabulong.

7Ang imo pungsod ginlaglag kag ang imo mga siudad ginsunog. Samtang nagatan-aw ikaw, ang mga dumoluong nag-agaw sang imo duta kag nagpangguba sang tanan nga mga butang.

8Ang Jerusalem amo lamang ang nabilin, isa ka siudad nga nakibon, subong sang isa ka mahuyang nga payag nga balantayan sa talamnan sang ubas, ukon isa ka palapala sa talamnan sang atimon.

9Kon ang Ginoo sang mga hangaway wala magbilin sing mga tawo nga mabuhi, kuntani ang Jerusalem naguba sing bug-os subong sang Sodoma kag Gomorra.

10O Jerusalem, ang imo mga pangulo kag ang imo mga pumoluyo kaangay sang Sodoma kag Gomorra. Pamatii ang ginasiling sang Ginoo sa inyo. Talupangda ang ginatudlo sang aton Dios sa inyo.

11Nagasiling sia, “Nagahunahuna bala kamo nga naluyagan ko ini tanan nga mga halad nga ginadulot ninyo sa akon? Natak-an na ako sang mga karnero nga inyo ginasunog subong mga halad kag sang sapay sang inyo pinatambok nga mga sapat. Wala ako malipay sang dugo sang mga baka nga toro, mga karnero kag mga kanding.

12Sin-o bala ang nagsiling sa inyo nga dalhon ninyo ini tanan sa inyo pag-abot sa pagsimba sa akon? Sin-o bala ang nagsiling sa inyo sa paglibutlibot sa akon Templo?

13Wala na ako sing kinahanglan sang inyo mga dulot nga wala sing pulos. Ginasum-oran ako sang baho sang insyenso nga inyo ginadulot. Indi na ako makaagwanta sang inyo mga Piesta sa Lati, sang inyo mga Adlaw nga Inugpahuway kag sang inyo mga pagtililipon. Ini tanan gindagtaan tungod sang inyo mga sala.

14Naakig ako sa inyo mga Piesta sa Lati kag balaan nga mga adlaw. Natak-an na ako sini kag indi na ako makabatas.

15“Kon magbayaw kamo sang inyo mga kamot sa pagpangamuyo indi ako magsapak sa inyo. Bisan daw ano kadamo sang inyo mga pangamuyo, indi ako magpamati kay ang inyo mga kamot nabulit sang dugo.

16Magpaninlo kamo sang inyo kaugalingon. Untati ninyo ini tanan nga mga kalautan nga inyo ginahimo sa akon atubang. Untati na ninyo ang paghimo sing malaut,

17kag tun-i ninyo ang paghimo sing matarong. Tinguhaa ninyo ang pagpaluntad sang katarungan, buligi ninyo ang mga ginapigos, ihatag sa mga ilo ang ila mga kinamatarong, kag apini ang mga balo.”

18Ang Ginoo nagasiling, “Karon, athagon ta ini nga butang. Nagpula ikaw tungod sang dagta sang sala, pero tinloan ko ikaw nga magputi gid kaayo. Bisan pa ang dagta sang imo sala tama kapula, pero manginmaputi ka subong sang bulbol sang karnero.

19Kon magtuman ka lamang sa akon, magakaon ka sing maayo nga mga patubas sang duta.

20Pero kon indi ka magtuman kag magbato ka sa akon, mapatay ka. Ako, ang Ginoo, amo ang naghambal sini.”

21Ang siudad nga sang una anay matutom, karon kaangay na sang isa ka babayi nga nagabaligya sang iya dungog! Sang una ang matarong nga mga tawo nagaestar didto, pero karon ang mga manugpatay lamang amo ang nabilin.

22O Jerusalem, sang una kaangay ikaw sang pilak, pero karon wala ikaw sing pulos. Sang una pareho ikaw sang maayo nga bino, pero karon tubig ka na lang.

23Ang imo mga pangulo mga rebelde kag mga kaabyanan sang mga makawat. Nagabaton sila pirme sing mga regalo kag mga hamham. Wala nila ginaapini ang mga ilo sa korte, ukon nagapamati kon magpangayo sing tabang ang mga balo sa ila mga kaso.

24Gani karon, pamatii ang ginasiling sang Ginoo sang mga hangaway, ang gamhanan nga Dios sang Israel, “Magatimalos ako sa inyo, kamo nga mga kaaway ko, kag indi na kamo makatublag sa akon.

25Magasilot ako sa inyo. Tunawon ko kamo subong sang pagpapuraw sang metal, kag kuhaon ko ang inyo mga kahigkuan.

26Hatagan ko kamo sing mga pangulo kag mga palamangkutan subong sang una. Dayon ang Jerusalem pagatawgon nga matarong kag matutom nga siudad.”

27Tungod kay ang Ginoo matarong, luwason niya ang Jerusalem kag ang tagsatagsa didto nga nagahinulsol.

28Pero dugmokon niya ang tagsatagsa nga nagapakasala kag nagabato sa iya. Pamatyon niya ang tagsatagsa nga nagasikway sa iya.

29Magakahuya kamo nga nagsimba kamo sa mga kahoy kag nagpahimo sing mga hardin nga ginasimbahan.

30Mapatay kamo kaangay sang nagakalaya nga kahoy nga terebinto, pareho sang isa ka hardin nga wala mabunyagi.

31Subong sang mamala nga kahoy nga masunog sa isa ka agsik sang kalayo, amo man ang gamhanan nga mga tawo malaglag paagi sa ila malaut nga mga binuhatan, kag wala sing isa nga makapauntat sang kalaglagan.

Jump to: Chapter 2 →