Isaiah 31

Ilonggo (Maayong Balita nga Biblia (2012))

← Chapter 30 Jump to: Chapter 32 →

1Ang mga nagakadto sa Ehipto sa pagpangayo sang bulig tapos gid! Nagasalig sila sa daku nga kusog sang mga hangaway sang Ehipto—mga kabayo, mga karwahi sa inaway, kag mga soldado. Pero wala sila nagasalig sa Ginoo, ang balaan nga Dios sang Israel, ukon nagapangayo sang bulig sa iya.

2Nakahibalo sia kon ano ang iya himuon! Nagapadala sia sing kalaglagan. Tumanon niya ang iya ginsiling sa pagsilot sang malaut nga mga tawo kag sang mga nagaapin sa ila.

3Ang mga Ehiptohanon indi mga dios kundi mga tawo lamang. Ang ila mga kabayo pareho man lang sang iban nga mga kabayo. Kon ang Ginoo magsilot, ang mabakod nga pungsod marumpag kag ang maluya nga pungsod nga ginabuligan sini mapukan. Sila nga duha malaglag.

4Ang Ginoo nagsiling sa akon, “Subong sang isa ka leon nga indi matabog sang mga manugbantay gikan sa napatay sini nga sapat bisan daw ano ang ila pagsinggit; sa amo man, wala man sing makapugong sa akon, ang Ginoo sang mga hangaway, sa pag-apin sang Bukid sang Sion.

5Subong sang isa ka pispis nga nagalupadlupad sa ibabaw sang iya pugad sa pag-apin sang iya mga buto, ako man, ang Ginoo sang mga hangaway, magaapin sang Jerusalem kag tabangan ko ini.”

6Ang Dios nagsiling, “Mga tawo sang Israel, nagpakasala kamo batok sa akon kag ginsumpong ninyo ako. Pero karon, balik kamo sa akon!

7Ang tion magaabot nga tanan kamo magahaboy sang inyo malaut nga mga diosdios nga nahimo ninyo sa pilak kag bulawan.

8Ang Asiria malaglag sa inaway, pero indi sa tawhanon nga gahom. Ang mga taga-Asiria malagyo sa inaway, kag ang ila pamatan-on nga mga lalaki mangin-ulipon.

9Ang ila hari malagyo sa kahadlok, kag ang mga opisyales kulbaan gid sing tama nga bayaan nila ang ila mga bandera sa inaway.” Ang Ginoo amo ang naghambal, ang Ginoo nga ginasimba sa Jerusalem, kag ang iya kalayo nagadabdab didto para sa mga halad.

← Chapter 30 Jump to: Chapter 32 →