Isaiah 8

Ilonggo (Maayong Balita nga Biblia (2012))

← Chapter 7 Jump to: Chapter 9 →

1Ang Ginoo nagsiling sa akon, “Kuha ka sing isa ka malapad nga sulolatan kag isulat ini nga mga pulong sa dalagku nga mga letra: ‘Madali Mag-agaw, Madasig Mangawat.’

2Kuha ka sing duha ka masaligan nga mga tawo, ang pari nga si Urias, kag si Zacarias nga anak ni Jeberequias subong mga saksi.”

3Sang ulihi, nagpakighirop ako sa akon asawa. Nagbusong sia kag nagbata sang isa ka lalaki. Ang Ginoo nagsiling sa akon, “Hingalani sia, ‘Madali Mag-agaw, Madasig Mangawat.’

4Sa indi pa makahibalo ang bata magtawag ‘Nanay’ kag ‘Tatay,’ ang tanan nga manggad sang Damasco kag ang tanan nga mga inagaw sang Samaria pagadalhon sang hari sang Asiria.”

5Ang Ginoo naghambal sa akon liwat.

6Nagsiling sia, “Tungod kay ginsikway sini nga mga tawo ang nagailig sing mahinay nga mga tubig sa Sapa sang Siloe kag nagakurog sila sa atubang ni Haring Rezin kag ni Haring Peca,

7ako, ang Ginoo magadala sang hari sang Asiria kag sang tanan niya nga mga hangaway sa pagsalakay sang Juda. Magasalakay sila kaangay sang nagabaha nga tubig sang Suba sang Eufrates, nga nagapalanglapaw sa iya mga pangpang.

8Magalambas sila sa Juda subong sang baha nga ang tubig taga-abaga kag lapawan ang tanan nga mga butang.” Ang Dios kaupod naton! Ang iya nagahumlad nga mga pakpak nagaapin sang duta.

9Mga kapungsoran! Magtipon kamo nga may kahadlok! Pamati, kamo nga yara sa malayo nga mga bahin sang duta. Maghanda kamo sa pagpakig-away, pero magkahadlok! Sigi, maghanda kamo, pero magkahadlok!

10Magplano kamo! Pero indi ini magmadinalag-on. Ihambal ang luyag ninyo nga ihambal! Pero wala ini tanan sing pulos tungod kay ang Dios kaupod namon.

11Sa iya daku nga gahom ang Ginoo nagpaandam sa akon nga indi magsunod sa mga pagginawi sini nga mga tawo. Nagsiling sia,

12“Indi ka magbuylog sa mga padihot sang mga tawo kag indi ka magkahadlok sang ila ginakahadlukan.

13Dumdoma nga ako, ang Ginoo sang mga hangaway, balaan. Ako ang dapat mo kahadlukan.

14Tungod sang akon makakulogmat nga pagkabalaan, kaangay ako sang bato nga sa diin ang mga tawo nagakasandad, kaangay ako sang siod nga magadakop sang mga tawo sang mga ginharian sang Juda kag Israel, kag sang mga tawo sang Jerusalem.

15Madamo ang masandad kag mapukan. Malaglag kag masiod sila.”

16Kamo nga akon mga gintuton-an dapat magbantay kag magtipig sang mga mensahe nga ginhatag sang Dios sa akon.

17Ang Ginoo nagtago sang iya kaugalingon sa iya mga tawo, pero nagasalig ako kag nagalaom sa iya.

18Yari ako, upod sa mga anak nga ginhatag sang Ginoo sa akon. Ang Ginoo sang mga hangaway, nga ang iya trono yara sa Bukid sang Sion, naghimo sa aton nga buhi nga mga mensahe sa mga tawo sang Israel.

19Ang mga tawo magasugo sa inyo sa pagpamangkot sang mga mensahe halin sa mga manughimalad kag mga tawo nga nagakonsulta sang mga patay, nga nagakutibkutib kag nagawiriwiri. Magasiling sila, “Indi bala nga ang mga tawo dapat magpamangkot sa mga espiritu, kag ang mga buhi sa ila mga patay?”

20Magasabat ka sa ila, “Pamatii ang ginatudlo sang Ginoo sa inyo! Indi kamo magpamati sa mga tawo nga nagakonsulta sang mga patay, ang ila ginasiling indi makapahilayo sang kagamo.”

21Ang mga tawo magadalangdalang sa duta, mawad-an sing paglaom kag gutom. Sa ila kagutom kag sa ila kaakig, pakamalauton nila ang ila hari kag ang ila Dios. Magatangla sila sa langit,

22ukon magatamod sa duta, pero wala sila sing makita kundi kagamo kag kadulom, makakulogmat nga kadudulman sa diin sila gintabog.

← Chapter 7 Jump to: Chapter 9 →