Isaiah 22

Ilonggo (Maayong Balita nga Biblia (2012))

← Chapter 21 Jump to: Chapter 23 →

1Amo ini ang mensahe nahanungod sa Kapatagan sang Palanan-awon. Ano bala ang nagakahanabo? Ngaa bala ang tanan nga mga pumoluyo sang siudad nagakinasadya sa mga atop sang mga balay?

2Ang bug-os nga siudad nagakinagula, napuno sing ginahod kag kinalipay. Ang inyo mga tawo nga nagkalamatay sa sini nga inaway wala magkalamatay tungod sa pagpakig-away.

3Ang tanan ninyo nga mga pangulo nagpalagyo kag nabihag sa wala pa sila makapana sing bisan isa ka baslay.

4Karon pabay-i ninyo ako sa paghibi sing tudo. Indi kamo magtinguha sa paglipay sa akon, tungod kay madamo sang akon mga tawo nga nagkalamatay.

5Amo ini ang tion sang pagkahadlok, pagkalutos kag pagsalangisag sa Kapatagan sang Palanan-awon, kag ang Ginoong Dios sang mga hangaway amo ang nagpadala sini sa aton. Ang mga pader sang aton siudad narumpag, kag ang pagsinggit sing tabang naglanog sa mga kabakuloran.

6Ang mga soldado nga may mga pana nga nagasakay sa mga kabayo nag-abot halin sa duta sang Elam. Ang mga soldado halin sa duta sang Kir nakahanda na sang ila mga taming.

7Ang mapatubason nga kapatagan sang Juda puno sing mga karwahi sa inaway kag ang mga soldado nga nagasakay sa mga kabayo nagtindog sa atubangan sang mga pwerta sang Jerusalem.

8Ang tanan nga mga pamakod sang Juda nagkalaguba. Sang mahanabo ini, ginpagwa ninyo ang mga hinganiban halin sa talaguan sini.

9Nakita ninyo ang mga lugar sa diin ang mga pader sang Jerusalem kinahanglan kaayuhon. Gin-usisa ninyo ang mga balay sa Jerusalem kag ginpangguba ninyo ang iban sini agod makakuha kamo sing mga bato nga ipakaayo sa mga pader sang siudad. Agod nga may pundohan kamo sing tubig,

11naghimo kamo sing tangke sang tubig sa gintung-an sang duha ka pader nga inyo tipunan sang tubig nga nagailig halin sa daan nga punong. Pero wala kamo magsapak sa Dios, nga nagplano sini tanan halin pa sang una, kag nagbuot nga mahimo ini.

12Dayon ang Ginoong Dios sang mga hangaway nagtawag sa inyo sa paghibi kag sa paglalaw, sa pagkiskis sang inyo mga ulo kag sa pagbayu sang sako.

13Sa baylo, nagkinadlaw kamo kag nagkinasadya. Nag-ihaw kamo sang mga karnero kag mga baka agod kaunon, kag nag-ininom kamo sing bino. Nagsiling kamo, “Makaon kita kag mag-inom kay buas mapatay man lang kita.”

14Ang Ginoong Dios sang mga hangaway nagsiling gid sa akon, “Ining kalautan indi mapatawad tubtob sa kamatayon. Ako, ang Ginoong Dios sang mga hangaway, amo ang naghambal sini.”

15Ang Ginoong Dios sang mga hangaway nagsugo sa akon nga kadtuan ko si Sibna, ang manugdumala sang panimalay sang hari kag singganan sia,

16“Abi mo sin-o ka na gid? Ano bala ang kinamatarong mo sa paghimo sang imo kaugalingon nga lulobngan sa daku nga bato sa kilid sang bakulod?

17Ayhan gamhanan ikaw, pero dakpon ka kag ihaboy sang Ginoo.

18Ang Ginoo magapatiyog sa imo nga daw bola kag ihaboy ka sa isa ka malapad nga duta. Mapatay ka didto sa kilid sang mga karwahi sa inaway nga imo ginapabugal. Manginkahuloy-an ikaw sa panimalay sang imo agalon.

19Pahalinon ka sang Ginoo sa imo obra, kag kuhaon ka sa imo mataas nga palangakuan.”

20Ang Ginoo nagsiling kay Sibna, “Kon mahanabo ini, ipadala ko ang akon alagad nga si Eliaquim nga anak ni Helkias.

21Ipasuksok ko sa iya ang imo kapa kag paha, kag ihatag ko sa iya ang tanan nga kagamhanan nga imo anay sang una. Manginkaangay sia sang amay sa mga tawo sang Jerusalem kag Juda.

22Hatagan ko sia sing bug-os nga kagamhanan sa idalom sang hari, ang kaliwat ni David. Sia ang magauyat sang mga yabi sang opisina, ang iya abrihan wala sing may magasira, kag ang iya masirhan wala sing magaabri.

23Akon sia palig-unon kaangay sang palpal, kag magahatag sia sing kadungganan sa bug-os niya nga panimalay.

24“Pero ang tanan niya nga mga pariente kag mga kabataan manginpalas-anon niya. Magakalabit ini sa iya subong sang mga kolon kag mga yahong nga nagakabit sa isa ka palpal!

25Kon matabo ini, siling sang Ginoo sang mga hangaway, ang palpal nga natibsok sing maayo magahuyang kag matumba kag amo ini ang katapusan sang tanan nga nagakabit sa sini.” Ang Ginoo amo ang naghambal sini.

← Chapter 21 Jump to: Chapter 23 →