Isaiah 10

Ilonggo (Maayong Balita nga Biblia (2012))

← Chapter 9 Jump to: Chapter 11 →

1Tapos gid kamo! Nagahimo kamo sang indi matarong nga mga kasugoan nga nagapigos sang akon mga tawo.

2Amo ini ang inyo paagi sa pagkuha sang kinamatarong kag hustisya sang mga imol. Amo ini ang inyo paagi sa pagkuha sang pagkabutang sang mga balo kag mga ilo.

3Ano ang himuon ninyo kon ang Dios magsilot sa inyo? Ano ang himuon ninyo kon magpadala sa inyo sia sing kalalat-an gikan sa malayo nga pungsod? Diin kamo makadto sa pagpangayo sang bulig? Diin ninyo taguon ang inyo mga manggad?

4Mapatay kamo sa inaway ukon guyoron subong mga bihag. Wala sapayan sini ang kaakig sang Ginoo wala mag-ugdaw, kundi ang iya kamot nabayaw pa sa pagsilot.

5Ang Ginoo nagsiling, “Ginagamit ko ang Asiria subong sang balakol sa pagsilot sang akon mga ginakaakigan.

6Ginpadala ko ang Asiria sa pagsalakay sa isa ka pungsod nga indi diosnon nga nagpaakig sa akon. Ginpadala ko sila sa pagpang-agaw, pagpangawat kag pagtasak sang mga tawo kaangay sang lunang sa mga dalan.”

7Pero ang hari sang Asiria may malain nga tuyo. Nagpamat-od sia sa paglaglag sang madamo nga mga pungsod.

8Nagapabugal sia, “Ang tanan nga mga pangulo sang akon mga hangaway hari!

9Gin-agaw ko ang mga siudad sang Calno kag Carquemis, subong man ang mga siudad sang Hamat kag Arpad. Gin-agaw ko man ang Samaria kag Damasco.

10Ginsilutan ko ang mga ginharian nga nagasimba sa mga diosdios, mga diosdios nga mas madamo pa sang sa yadto didto sa Jerusalem kag Samaria.

11Ginlaglag ko ang Samaria kag ang tanan niya nga mga diosdios, kag amo man ini ang akon himuon sa Jerusalem kag sa mga imahen nga ginasimba didto.”

12Pero ang Ginoo nagasiling, “Kon matapos ko na ang akon himuon sa Bukid sang Sion kag sa Jerusalem, silutan ko ang hari sang Asiria tungod sang tanan nga pagpabugal kag pagpahambog niya.”

13Ang hari sang Asiria nagapabugal, “Ako gid sini tanan ang naghimo. Gamhanan ako, maalam kag maabtik. Ginkuha ko ang mga dulonan sa tunga sang mga pungsod kag ginkuha ko ang ila mga pagkabutang nga ila natipon. Kaangay sang isa ka toro nga baka gintasak ko ang mga nagaestar didto.

14Ang mga kapungsoran sa kalibutan kaangay sang pugad sang pispis, kag gintipon ko ang ila mga manggad kaangay sang pagtipon ko sang mga itlog. Wala sing pakpak nga nagkapakapa sa pagpahadlok sa akon, ukon nag-iyagak sa akon!”

15Pero ang Ginoo nagasiling, “Makasiling bala ang wasay nga mas gamhanan pa sia sang sa tawo nga nagagamit sa iya? Labi pa bala ka importante ang lagari sang sa tawo nga nagagamit sini? Ang balakol wala nagadala sang tawo kundi ang tawo nagadala sang balakol.”

16Ang Ginoo sang mga hangaway magapadala sing balatian sa pagsilot sang iya mabakod nga mga hangaway. Sa ila mga lawas may kalayo nga nagapadayon sa pagdabdab.

17Ang Dios, ang kapawa sang Israel, manginkalayo. Ang balaan nga Dios sang Israel mangin-isa ka nagadabdab nga kalayo nga magasunog sang tanan sa isa lang ka adlaw, bisan ang mga sapinit kag mga talungon.

18Ang madamol nga mga kagulangan kag ang mga kaumhan pagalaglagon sing bug-os, pareho sang paglaglag sang isa ka makamamatay nga balatian sang isa ka tawo.

19Diutay lang ang mabilin sa mga kakahuyan nga bisan ang isa ka bata makaisip sini.

20Ang tion magaabot nga ang mga tawo sang Israel nga nagkalabilin nga buhi indi na magsalig sa pungsod nga diutayan lang magpapas sa ila. Magasalig na gid sila sa Ginoo, ang balaan nga Dios sang Israel.

21Pila lamang ka bilog sang mga tawo sang Israel ang magabalik sa ila gamhanan nga Dios.

22Bisan karon may madamo nga mga tawo sa Israel subong sang mga balas sa baybayon, pila lamang ka bilog ang magabalik. Ang kalaglagan natigana para sa mga tawo, kag nagakabagay gid ini.

23Huo, sa bug-os nga duta ang Ginoong Dios sang mga hangaway magapadala sing kalaglagan, suno sa iya ginsiling nga iya himuon.

24Ang Ginoong Dios sang mga hangaway nagasiling sa iya mga tawo nga nagaestar sa Sion, “Indi kamo magkahadlok sa mga taga-Asiria, bisan nga ginapaantos nila kamo subong sang ginhimo sang mga Ehiptohanon.

25Sa indi lamang madugay tapuson ko ang akon pagsilot sa inyo kag dayon papason ko sila.

26Ako, ang Ginoo sang mga hangaway, magahanot sa ila sang akon latigo subong sang akon paghanot sang mga tawo sa Midian sa Igang sang Oreb. Pagasilutan ko ang Asiria subong sang akon pagsilot sang Ehipto.

27Kon mag-abot ina nga tion, hilwayon ko kamo sa gahom sang Asiria, kag ang ila gota indi na magpabug-at sa inyo liog.”

28Ang mga kaaway nag-agaw sang siudad sang Ayat! Gin-agyan nila ang Migron! Ginbilin nila ang ila mga dala sa Mikmas!

29Nakalampuwas sila sa alagyan kag nagpabilin sila sing isa ka gab-i sa Geba! Ang mga tawo sa banwa sang Rama ginakulbaan, kag ang mga tawo sa Gebeat nga amo ang banwa ni Haring Saul nagpalalagyo.

30Mga pumoluyo sang Galim, magsinggit kamo! Mga pumoluyo sang Laisa, magpamati kamo! Mga pumoluyo sang Anatot, magsabat kamo!

31Ang mga pumoluyo sang Madmena kag Gebim nagapalalagyo sa pagluwas sang ila mga kabuhi.

32Karon gid nga adlaw ang mga kaaway yara sa banwa sang Nob, kag didto nagaumol sila sa Bukid sang Sion, sa siudad sang Jerusalem.

33Ang Ginoo, ang Ginoo sang mga hangaway, magapukan sa ila, pareho sang mga sanga sang kahoy nga gintapas. Ang labing bugalon kag labing mataas sa ila tanan pagautdon kag pagapanuboon.

34Ang Ginoo magatapas sa ila kaangay sang kahoy sa tunga sang kagulangan nga ginapulod sang wasay, pareho sang pagkapukan sang labing maayo nga mga kahoy sang Libano!

← Chapter 9 Jump to: Chapter 11 →