Isaiah 18

Ilonggo (Maayong Balita nga Biblia (2012))

← Chapter 17 Jump to: Chapter 19 →

1Sa unhan sang mga suba sang Etiopia, may isa ka duta sa diin mabatian ang kapakapa sang mga pakpak.

2Halin sa sina nga duta ang mga embahador magaabot paagi sa suba sang Nilo kag nagasakay sa sakayan nga nahimo sa mga tabun-ak. Balik kamo pauli, madasig nga mga mensahero! Dalha ninyo ang mensahe pabalik sa inyo duta nga ginbahin sang mga suba, sa inyo mabakod kag gamhanan nga pungsod, sa inyo mga tawo nga matag-as kag mapino sing supat nga ginakahadlukan sa bug-os nga kalibutan.

3Pamati, ang tagsatagsa sa kalibutan, ang tagsatagsa nga nagaestar sa duta! Bantayi ninyo ang isa ka bandera nga pagabatakon sa putokputokan sang mga bukid! Magpamati sa tunog sang trumpeta!

4Ang Ginoo nagsiling sa akon, “Magatamod ako gikan sa langit subong kahipos sang mga tun-og nga nagaporma sa magin-ot nga kagab-ihon sang tig-alani, subong kahipos sang pagsilak sang adlaw sa udto.

5Sa wala pa mapamupo ang mga ubas, sa tapos magkalapulak ang mga bulak kag ang mga ubas madali na lang maluto, ang kaaway magalaglag sang mga Etiopiahanon subong kahapos sang pag-utod sang isa ka sundang sang mga sanga sang ubas.

6Ang mga bangkay sang ila mga soldado mabilin para sa mga kapispisan kag talunon nga mga sapat. Sa tion sang tingadlaw ang mga kapispisan magakaon sa ila, kag sa tion sang tigtulognaw ang mga kasapatan magakaon man sa ila.”

7Ang isa ka tion magaabot nga ang Ginoo sang mga hangaway magabaton sing mga dulot gikan sa sini nga duta nga ginabahin sang mga suba, gikan sa sining mabakod kag gamhanan nga pungsod, gikan sa sining mga tawo nga matag-as kag mapino sing supat nga ginakahadlukan sa bug-os nga kalibutan. Magakadto sila sa Bukid sang Sion, sa diin ginasimba ang Ginoo sang mga hangaway.

← Chapter 17 Jump to: Chapter 19 →